ހައްދުފަނައަޅާފައިވާ މީހުންގެ ބާރު ގަދަވަމުން އަންނަ މައްސަލައިގެ ޒިންމާ ނަންގަވަން ޖެހޭނީ ރައީސް ވަހީދު: އެމްޑީޕީ

ހައްދުފަހަނަ އަޅާފައިވާ މީހުންގެ ބާރު ސިޔާސީ މައިދާނުގައި ގަދަވަމުން އަންނަ މައްސަލައިގެ ޒިންމާ ނަންގަވަން ޖެހޭނީ ރައީސް މުހައްމަދު ވަހީދު ކަމަށް އެމްޑީޕީގެ ވަގުތީ ރައީސް މުހައްމަދު ނަޝީދު ވިދާޅުވެއްޖެއެވެ .

ރައީސް މުހައްމަދު ނަޝީދުގެ އޮފީހުން މިއަދު ނެރުނު ބަޔާނެއްގައި ބުނެފައިވަނީ،  އެމެރިކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރާއި، އެމެރިކާއިން ސައުތު އޭޝިޔާއަށް ކަނޑައަޅުއްވާފައި ހުންނަވާ އެސިސްޓަންޓް ސެކްރެޓަރީ އޮފް ސްޓޭޓްގެ ނާއިބް މިއަދު ރައީސް ނަޝީދުގެ އަރިހަށް އިހްތިރާމުގެ ޒިޔާރަތެއް ކުރައްވާފައިވާ ކަމަށެވެ. އެ ޒިޔާރަތުގައި ރައީސް ނަޝީދުގެ ފަރާތުން އެމްޑީޕީ  އިދިކޮޅު ޕާޓީއެއްގެ ގޮތުގައި ކުރަމުންއަންނަ މަސައްކަތްތަކުގެ މައުލޫމާތު އަރުވާފައިވާ ކަމަށް އެ އޮފީހުން ބުނެއެވެ. މިގޮތުން އެމެރިކާގެ ޑިޕްލޮމޭޓުންނަށް އެރުވި މައުލޫމާތުތަކުގެ ތެރޭގައި ރައީސް ނަޝީދުގެ ވެރިކަން 2012 ވަނަ އަހަރު ވައްޓާލާފައިވަނީ "ބަޣާވާތަކުން" ކަމަށް ވިދާޅުވެފައިވެއެވެ. އަދި އެކަމުގެ އަޑީގައި ތިބީ ހައްދުފަހަނަ އަޅާފައިވާ ބައެއްކަމަށް ވެސް އެ ބައްދަލުވުމުގައި ރައީސް ނަޝީދު ވިދާޅުވެފައިވެއެވެ. 

ރައީސް މުހައްމަދު ވަހީދުގެ ސަރުކާރުން ހައްދު ފަހަނަ އަޅާފައިވާ މީހުންނަށް ސިޔާސީ މަގާމުތައް ދީފައިވާކަމަށް ވެސް އެމްޑީޕީން ވަނީ ތުހުމަތުކޮށްފައިއެވެ. ދީނީ ގޮތުން ހައްދުފަހަނަ އަޅާފައިވާ މީހުންގެ އަސަރުތައް ރާއްޖޭގެ ސިޔާސީ މަޝްރަޙަށް ފޯރާކަމަށް ވެސް އެމްޑީޕީން ވަނީ ތުހުމަތު ކޮށްފައިވެއެވެ. ރައީސް ވަހީދުގެ ވެރިކަމުގައި ހައްދުފަހަނަ އަޅާފައިވާ މީހުންނަށް ޖާގަ ދީ، މެދުމިނުގެ މީހުންނާއި ހައްދުފަހަނައަޅާފައިވާ މީހުންނާއި ވަރަށްބޮޑަށް ތަފާތުކުރަމުން ގޮސްފައިވާކަމަށް ވެސް  ރައީސް ނަޝީދު ވިދާޅުވެފައިވެއެވެ.

"މިހާރު ރާއްޖޭގެ ސިޔާސީ މަސްރަހު ގައި ހައްދުފަހަނައަޅާފައިވާ މީހުންގެ ބާރު ގަދަވަމުން ދިއުމުގެ ޒިންމާ ނަންގަވަންޖެހިވަޑައިގަންނަވާނީ، ކުރީގެ ރައީސް ޑރ. ވަހީދު ކަމުގެ މައުލޫމާތު ވެސް ބައްދަލުވުމުގައި އެމެރިކާ ސަރުކާރަށް ވާނީ އަރުވައިފައެވެ." ރައީސް ނަޝީދުގެ އޮފީހުން ނެރުނު ބަޔާނެއްގައި ބުނެފައިވެއެވެ.

ހައްދު ފަހަނަ އަޅާފައިވާ ބަޔަކު ސިޔާސީގޮތުން ބާރުގަދަވަމުން އަންނަކަމަށް އެމްޑީޕީން ތުހުމަތުކޮށްފައިވީ ނަމަވެސް އެއީ ކޮންބައެއްކަން ހާމަކޮށްފައެއް ނުވެއެވެ.

މި މައްސަލަތަކުގެ އިތުރުން މިއަދުގެ ބައްދަލު ކުރެއްވުމުގައި، ދިވެހި ސަރުކާރުން އިންޑިޔާގެ ޖީއެމްއާރުބޭރުކޮށްލުމުން ރާއްޖެއަށް ލިބުނު ގެއްލުމުގެ ބަދަލު، އެކަން ކުރި މީހުންގެ އަތުންހޯދުމަށް އެމްޑީޕީއިން ކުރަމުންދާ މަސައްކަތާއި ބެހޭ މައުލޫމާތު ވެސް ރައީސްނަޝީދު ވަނީ ހިއްސާ ކުރައްވައިފައެވެ.

X