ރޯދަ މަހު ސަރުކާރު އޮފީސްތައް ނިމޭ ގަޑި މެންދުރު ފަހު 2:00 އަށް ބަދަލުކޮށްފި

ރޯދަ މަހު ސަރުކާރު އޮފީސްތައް ނިމޭ ގަޑި 2:00 އަށް ރައީސުލް ޖުމްހޫރިއްޔާ އަބްދުﷲ ޔާމިން މިއަދު ބަދަލުކުރައްވައިފިއެވެ.

މީގެ ކުރިން ރައީސުލްޖުމްހޫރިއްޔާ ނިންމަވާފައިވަނީ ރޯދަ މަހު ހެނދުނު 10:00 އިން މެންދުރު ފަހު 2:30 އަށް ސަރުކާރު މުވައްޒަފުން މަސައްކަތަށް ނުކުތުމަށެވެ.

ރައީސް އޮފީހުން  ބުނީ ރޯދަ މަހު ސަރުކާރު އޮފީސްތައް ނިމޭ ގަޑި 2:00 އަށް އަވަސްކުރީ 2:30 އޮފީސްތައް ނިމޭގޮތަށް އޮތުމުން މުވައްޒަފުންނަށް ދަތިތަކަކާއި ކުރިމަތިވާނެކަމަށް ބެލެވޭތީކަމަށެވެ.

ރޯދަމަހުގެ ސަރުކާރު އޮފީސްތައް ނިމޭ ވަގުތު 2:30 ކަމަށް މީގެ ކުރިން ހަމަޖައްސާފައި އޮތުމުން "ހޯޕް ފޯ ވިމެން" ޖަމިއްޔާއިން ވަނީ އެކަމާއި ކަންބޮޑުވުން ފާޅުކޮށްފައެވެ. އެ ޖަމިއްޔާއިން ބުނެފައިވަނީ ރޯދަ މަހުގެ މެންދުރު ފަހުގެ ވަގުތަކީ ގިނަ އަދަދެއްގެ އަންހެނުން ބަދިގޭ މަސައްކަތުގައި ޝާމިލުވެ އުޅޭ ވަގުތެއްކަމަށެވެ. އަދި ސަރުކާރު ވަޒީފާތަކުގައި މަސައްކަތްކުރާ އަންހެނުންނަށް ރޯދަ މަހުގެ ވަގުތު އެހެން އޮތުމުން ދަތިވާނެ ކަމަށް އެ ޖަމިއްޔާއިން ބުނެފައިވެއެވެ.

ރައީސް އޮފީހުން ބުނެފައިވަނީ ސަރުކާރު އޮފީސްތަކުގެ ވަގުތު ރައީސް ޔާމިން ކަނޑައަޅުއްވާފައި ވަނީ ރައްޔިތުންނަށް އެންމެ ލުއި ފަސޭހަވާނެގޮތަށް ބައްލަވައިގެން ކަމަށެވެ.