ކުޅުދުއްފުށީ ހޮސްޕިޓަލުންދޭ ޚިދުމަތްތަކާމެދު ހިތްހަމަނުޖުހިގެން އިހްތިޖާޖަށް ނުކުމެއްޖެ
21 ޖޫން 2014 11:08
ކުޅުދުއްފުށީ ހޮސްޕިޓަލުގެ ހިދުމަތްތަކާމެދު ހިތްހަމަނުޖެހިގެން އިހްތިޖާޖްކުރަނީ: ފޮޓޯ ކުޅުދުއްފުށި ޑޮޓް ކޮމް
ތިލަދުންމަތީ ދެކުނުބުރީ ކުޅުދުއްފުށީ ރީޖަނަލް ހޮސްޕިޓަލުން ފޯރުވައިދޭ ޙިދުމަތްތަކާއިމެދު ހިތްހަމަނުޖެހި އެރަށުގެ ގިނަބަޔަކު މިއަދު އިހްތިޖާޖަށް ނުކުމެއްޖެއެވެ.
ކުޅުދުއްފުށިން "ދުވަސް" ނޫހާއި ވާހަކަދެއްކި މީހަކު ބުނީ އެރަށު ރައްޔިތުންގެ ގިނަބަޔަކު ހޮސްޕިޓަލް ދޮށަށް އެއްވެފައިވާކަމަށެވެ. އެރަށު މީހުން ހަޅުތާލަށް ނުކުތީ ހޮސްޕިޓަލުގެ ފެންވަރުދަށްވެ "ރައްޔިތުންނަށް ހިދުމަތް ފޯރުކޮށްދޭ" މިންވަރަށްވުރެ އެތަނުގެ ހާލަތު ގޯސްވުމުންކަމަށްވެސް އޭނާ ބުންޏެެވެ.
"ފާއިތުވީ މަހެއްހާ ދުވަހުގެތެރޭގައި ވަރަށް ނޭދެވޭ ކަންތައްތަެއް ހިނގާފައި އެބައޮތް. އެކްސްރޭއެއް ނެގޭނެ ގޮތެއް ވެސް ނެތް. ބައެއް އަންހެނުން ވިހެއުމަށް ފަޅާލުމަށްފަހު (އޮޕަރޭޝަނަށް) ފަހާނެ ޑޮކްޓަރެއް ނެތިގެން އެއޮތްގޮތަށް މާލެ ގެންދާން އެބަޖެހޭ. މިފަދަ ހާލަތެއްގައި ހޮސްޕިޓަލުގެ ފެންވަރު މިއޮތީ،" އިހްތިޖާޖުގެ ބައިވެރިއެއް ބުންޏެވެ.
ހދ. އަތޮޅު ކައުންސިލުން އިއްޔެ ނެރުނު ބަޔާނެއްގައި ބުނެފައިވަނީ ކުޅުދުއްފުށީ ހޮސްޕިޓަލުގައި ފެންވަރު ރަނަގޅު ޑޮކްޓަރުންނެތް ކަމަށެވެ. ބައްޔާއި ނުގުޅޭ ބޭސް ދިނުމުގެ މައްސަލަތަކެއް ވެސް ދިމާވެފައިވާކަމަށް އެ ކައުންސިލުންބުނެއެވެ. އެ ހޮސްޕިޓަލުގެ އެކްސުރޭ މެޝިނު ހަލާކުވެފައިހުންނަތާ ތިން އަހަރު ދުވަސް ވެއްޖެއެވެ. އަދި ލެބޯޓަރީގައި ސާމާނު ނެތުމުން ބައެއް ތަޙުލީލުތައް ހެދުމަށް ހުރަސްއެޅިފައި ވާކަމަށް ވެސް އެ ކައުންސިލުން ބުނެއެވެ. އެ މައްސަލަތައް ހައްލުކުރުމަށް އެއް މަސްދުވަހުގެ މުހުލަތެއް ކައުންސިލުންވަނީ ސަރުކާރަށް ދީފައިއެވެ. އެ ހޮސްޕިޓަލަށް ދިމާވެފައިވާ މައްސަލަތަކަށް ހައްލެއް ނުލިބިއްޖެ ނަމަ އިހްތިޖާޖުކުރާނެކަމަށް ވެސް އެ ކައުންސިލުން ބުނެފައިވެއެވެ. ކުޅުދުއްފުށީ ހޮސްޕިޓަލުގެ މައްސަލައިގައި ހެލްތުމިނިސްޓަރު ޑރ. މަރިޔަމް ޝަކީލާއި ބައްދަލުކުރައްވައިގެން ވެސް ހޮސްޕިޓަލަށް ދިމާވެފައިވާ މައްސަލަތަކަށް ހައްލެއް ނުލިބުނުކަމަށް އިއްޔެ ނެރުނު ބަޔާނުގައި ބުނެފައިވެއެވެ.
"އަތޮޅު ކައުންސިލުގެ ބަޔާނަށް އަޅުގަނޑުމެން ތާއީދުކުރަން. އެހެންނަމަވެސް ތިރީސް ދުވަސް ވަންދެން އަޅުގަނޑުމެންނަށް މިކަން އޮއްވާ މިހެން ބޭއްވޭކަށްނެތް. އަޅުގަނޑުމެން ބޭނުންވަނީ މި މައްސަލަތައް ދިމާމިވަނީ ސަރުކާރުގެ އިހުމާލުންތޯ ނުވަތަ ހޮސްޕިޓަލު މެނޭޖުމަންޓުގެ އިހުމާލުންތޯ އެނގެން،" "ދުވަހަށް" މައުލޫމާތު ދިން އިހްތިޖާޖުގެ ބައިވެރިޔާ ބުންޏެވެ.
މުޒާހަރާގެ ބައިވެރިންގެ 10 މީހަކާއި ހޮސްޕިޓަލުގެ މެނޭޖުމަންޓުން ވަނީ ބައްދަލުކޮށްފައިއެވެ. ނަމަވެސް ހޮސްޕިޓަލުގެ މެނޭޖުމަންޓުގެ ބަހެއް އަދި ނުލިބެ އެވެ. އަދި މުޒާހަރާ ކުރަމުން އަންނަ ސަރަހައްދުގައި ފުލުހުން ވެސް އަންނަނީ ހަރަކާތްތެރިވަމުންނެވެ.
ކިޔުންތެރިންގެ ހިޔާލު