ޖީއެމްއާރު ފޮނުވާލުމުގައި ބައިވެރިވާ މީހުންނާ ދެކޮޅަށް އެމްޑީޕީން ދަޢުވާކުރަނީ

ރާއްޖޭގެ އިބްރާހީމް ނާސިރު އިންޓަރނޭޝަނަލް އެއާޕޯޓް ތަރައްގީކޮށް ހިންގުމަށް ހަވާލުކޮށްފައިވާ ޖީއެމްއާރު ކުންފުންޏާއެކު ވެފައިވާ އެއްބަސްވުން އުވާލައި އެކުންފުނި ފޮނުވާލުމުގައި ޒިންމާވާ އެންމެންނާ ދެކޮޅަށް ރާއްޖެއާއި ރާއްޖެއިން ބޭރުގެ ކޯޓުތަކުގައި ދައުވާ ކުރަން ތައްޔާރުވަމުން އަންނަ ކަމަށް ދިވެހިރައްޔިތުންގެ ޑިމޮކްރެޓިކް ޕާރޓީ (އެމް.ޑީ.ޕީ) ބުނެފިއެވެ.

އެމްޑީޕީން ނެރެފައިވާ ބަޔާނެއްގައި ބުނެފައިވަނީ މިއީ ރާއްޖެއަށާއި އެމްޑީޕީއަށްވެސް ލިބުނު އެންމެ ބޮޑު ގެއްލުން ކަމަށެވެ. އެހެން ކަމުން އޭރިގެ ރައީސް "ޑޮކްޓަރ މުޙައްމަދު ވަޙީދު ޙަސަން މަނިކާއި އަދި އެކަމުގައި ޒިންމާވާ ފަރާތްތަކާމެދު ރާއްޖޭގެ ކޯޓުތަކުގައާއި އެހެން ޤައުމުތަކުގެ ކޯޓުތަކުގައި ދަޢުވާ އުފުލުމުގެ މަސައްކަތް މިޕާރޓީން ފަށައިފީމެވެ،" އެބަޔާނުގައި ބުނެފައިވެއެވެ.

އެމްޑީޕީން މިހާރު ގެންދަނީ ރާއްޖޭގެ ކޯޓުތަކަށާއި އެހެން ޤައުމުތަކުގެ ކޯޓުތަކަށް ދުސްތޫރީ، ޖިނާޢީ، މަދަނީ، ގެއްލުމުގެ ބަދަލް ހޯދުމަށް ހުށަހެޅޭނެ ގޮތްތަކަކީ ކޮބައިތޯ ބަލަމުން ކަމަށްވެސް އެޕާޓީން ބުނެފައިވެއެވެ. އެމްޑީޕީން ބުނެފައިވަނީ ރާއްޖެއިން ޖީއެމްއާރު ފޮނުވާލުމުން ލިބުނު ގެއްލުމަކީ މިހާތަނަށް ދައުލަތަށް ކުރިމަތިވި އެންމެ ބޮޑު ގެއްލުން ކަމަށެވެ. އަދި އެޕާޓީއަށްވެސް ދިމާވި އެންމެ ބޮޑު ގެއްލުން ކަމަށެވެ.

ޖީއެމްއާރު އެއްބަސްވުމާ ގުޅުވައިގެން ޑޮކްޓަރ މުޙައްމަދު ވަޙީދު ޙަސަން މަނިކާއި ޖީއެމްއާރު ބޭރުކުރުމުގައި އުޅުނު މީހުންވަނީ އެމްޑީޕީއާމެދު ރައްޔިތުންގެ ހިތުގައި "ރުޅިވެރިކަމާއި ދެކޮޅުވެރިކަން އުފައްދައި އަދި މި ޕާރޓީގެ އަބުރު ގެއްލުވާލުމުގެ މަސައްކަތްކޮށްފައެވެ. އަދި މިރާއްޖެ ބޮޑު ފިތުނަވެރިކަމަކަށް ވައްޓާލައިފައި ކަމަށެވެ.

މިކަމާ ގުޅިގެން އުފެދުނު ފިތުނައިގެ ސަބަބުން "ރާއްޖޭގެ ފުރަތަމަ ޑިމޮކްރެޓިކް ވެރިކަން" ވަނީ ވައްޓާލައިފައި ކަމަށްވެސް ބުނެފައިވެއެވެ. އެ އެއްބަސްވުން އުވާލުމުން މާލީގޮތުން ނުއުފުލެވޭވަރުގެ ބޮޑު ބުރައެއް ރާއްޖެއަށް އުފުލަން ޖެހިފައިވާ ކަމަށްވެސް ބުނެފައިވެއެވެ. އަދި އެކަމުގެ ސަބަބުން އިންވެސްޓަރުންގެ އިތުބާރުވެސް ގެއްލިފައިވާ ކަމަށް އެބަޔާނުގައިވެއެވެ.

އެމް.ޑީ.ޕީގެ ސަރުކާރުން ޖީއެމްއާރާ އެކު ވެފައިވާ އެއްބަސްވުމަކީ ޤާނޫނާ ޚިލާފަށް ވެފައިވާ އެއްބަސް ވުމެއް ނޫންކަމަށް އާބިޓްރޭޝަނުން ވަނީ ނިންމާފައެވެ. "ދިވެހިސަރުކާރުންނާއި އެމް.އޭ.ސީ.އެލްއިން ކޮންސެޝަން އެގްރީމެންޓް ބާޠިލުކުރީ 29 ނޮވެމްބަރ 2012 ގައި ޖީ.އެމް.އައި.އޭ.އެލް އަށް ފޮނުވި އެންގުމަކުން" ނެވެ.