ޖޭއެސްސީއަށް ވަކީލުން ހޮވާ އިންތިޚާބުގައި ވޯޓުދެވޭ މީހުންގެ ލިސްޓް އާންމުކޮށްފި

ޖުޑީޝަލް ސާވިސް ކޮމިޝަން (ޖޭއެސްސީ) އަށް ވަކީލަކު އިންތިޚާބު ބާއްވާ އިންތިޚާބުގައި ވޯޓު ދިނުމުގެ ޙައްގު ލިބިފައިވާ މީހުންގެ ލިސްޓް މިއަދު އާންމުކޮށްފިއެވެ.

ދައުލަތުގެ ބަންޑާރަ ނާއިބުގެ އޮފީހުން ހާމަކުރައްވާފައިވާ އެލިސްޓު މިހާރު އޮތްގޮތުން އެ އިންތިޚާބުގައި ވޯޓުލުމުގެ ޙައްގު ލިބިފައިވަނީ 642 މީހުންނަށެވެ.

ބަންޑާރަ ނާއިބުގެ އޮފީހުން މިއަދު ހާމަކުރައްވާފައިވާ ގޮތުގައި މިއިންތިޚާބު ބޭއްވުމަށް ހަމަޖެހިފައިވަނީ ޖުލައި 13 ވަނަ ދުވަހުއެވެ. އެ އޮފީހުން ބުނެފައިވަނީ މިއިންތިޚާބުގައި ވޯޓުލުމުގެ ޙައްގު ލިބިފައިވާ މީހުންގެ ރަޖިސްޓްރީ އެ އޮފީހުގެ ވެބްސައިޓްގައި ޝާއިއުކޮށްފައި ހުންނާނެ ކަމަށެވެ.

އެލިސްޓް އާންމު ކުރުމަށްފަހު ބަންޑާރަ ނާއިބު އޮފީހުންވަނީ އެލިސްޓަށް ޝަކުވާ ހުށަހެޅުމުގެ ފުރުސަތުވެސް ހުޅުވައިލައިފައެވެ. ލިސްޓަށް ޝަކުވާ ހުށަހެޅުމަށް ފުރުސަތު ހުޅުވާފައިވަނީ މިހިނގާ ޖޫންމަހުގެ 22 އިން 26 ވަނަ ދުވަހަށެވެ.

އެ އިންތިޚާބުގައި މާލެ ނޫން އެހެން ރަށެއްގައި ހުރެގެން ވޯޓުލާން ބޭނުންވާ މީހުންވެސް މިމަހުގެ 22 އިން ފެށިގެން 26 އާ ދެމެދު އެކަމަށް އެދި ހުށަހެޅުމުގެ ފުރުސަތު ހުޅުވިފައިވާ ކަމަށް ބަންޑާރަނާއިބު އޮފީހުން ވަނީ ހާމަކޮށްފައެވެ.

އެ އޮފީހުން ކުރައްވާފައިވާ އިޢުލާނެއްގައި ބުނެފައިވަނީ އެއިންތިޚާބުގައި ވާދަކުރާ ކެންޑިޑޭޓުންނަށް ވޯޓު ލުމުގެ ހައްގު ލިބިފައިވާ މީހުންގެ ރަޖިސްޓްރީގެ ކޮޕީއެއް އެއޮފީހުން ލިބޭނެ ކަމަށެވެ.

ވަކީލުންގެ ތެރެއިން ޖޭއެސްސީގައި މިހާރު ހުންނެވި އަޙުމަދު ރަޝީދުގެ ދައުރު ހަމަވާނީ އޯގަސްޓް މަހުއެވެ. މިއަދުވެސް އަލަށް 28 ވަކީލަކުވަނީ ވަކީލު ކަމުގެ ހުވައި ކުރައްވާފައެވެ.