ރައީސް ޔާމީން ޓްރާންސްޕޯޓް މިނިސްޓްރީ އުވާލައްވައިފި
19 ޖޫން 2014 20:43
ރައީސުލްޖުމްހޫރިއްޔާ އަބްދުﷲ ޔާމިން އަބްދުލް ގައްޔޫމް
ރައީސުލްޖުމްހޫރިއްޔާ އަބްދުﷲ ޔާމިން އަބްދުލް ގައްޔޫމް، ޓްރާންޕޯޓު މިނިސްޓްރީ މިއަދު އުވާލައްވައިފިއެވެ.
އެ މިނިސްޓްރީ އުވާލާފައިވަނީ ޤާނޫނު އަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުންކަމަށް ރައީސް އޮފީހުގެ ވެބްސައިޓުގައި ބުނެފައިވެއެވެ.
ޓްރާންސްޕޯޓު މިނިސްޓްރީ އުވާލެއްވުމަށްފަހު އެ މިނިސްޓްރީގެ ދަށުން ކުރަމުންދިޔަ މަސައްކަތްތަކާއި އިދާރާތައްވަނީ ސަރުކާރުގެ އެހެން މުއައްސަސާތަކަށް ބަދަލުކޮށްފައެވެ.
ރައީސް އޮފީހުން ނުބުނެބުނެ މިނިސްޓްރީގެދަށުން ހިންގަމުންދިޔަ ރީޖަނަލް އެއަރޕޯޓްސް ބަދަލުކުރެއްވީ، މިނިސްޓްރީއޮފް ޓޫރިޒަމްގެ ދަށަށެވެ. ޓްރާންސްޕޯޓް އޮތޯރިޓީ ބަދަލުކުރެއްވީ، މިނިސްޓްރީއޮފް އިކޮނޮމިކް ޑިވެލޮޕްމަންޓްގެ ދަށަށެވެ. ކޮމިއުނިކޭޝަން އޮތޯރިޓީއޮފް މޯލްޑިވްސް ބަދަލުކުރެއްވީ، މިނިސްޓްރީއޮފް ހޯމް އެފެއާޒްގެ ދަށަށެވެ.
މީގެއިތުރުން އެ މިނިސްޓްރީގެ ބައެއް މަސައްކަތްތައްވަނީ މިނިސްޓްރީއޮފް އިކޮނޮމިކް ޑިވެލޮޕްމަންޓަށާއި، މިނިސްޓްރީއޮފް ހޯމްއެފެއާޒަށާއި، މިނިސްޓްރީއޮފް އެންވަޔަރަންމަންޓް އެންޑް އެނަރޖީ އަށާއި، މިނިސްޓްރީއޮފް ފިނޭންސް އެންޑް ޓްރެޒަރީއަށް ބަދަލު ކުރައްވާފައިއެވެ. އެ މަސައްކަތްތަކުގެ ތަފްސީލެއް ވެބްސައިޓުގައި ހިމާނާފައެއް ނުވެއެވެ.
ޓްރާންސްޕޯޓު މިނިސްޓްރީ އުވާލެއްވި ސަބަބެއް ރައީސް އޮފީހުން ބުނެފައެއްނުވެ. އަދި ރައީސް ޔާމީނުގެ ތަރުޖަމާނު އިބްރާހިމް މުއާޒު އަލީ ފޯނު ނުނަންގަވާތީ މިކަމާއި ކުޅިގެން އޭނާގެ ބަހެއްވަނީ ލިބޭގޮތްނުވެފައެވެ.
ކިޔުންތެރިންގެ ހިޔާލު