ޖީއެމްއާރު އެއްބަސްވުމަކީ ސައްޙަ އެއްބަސްވުމެއް: އާބިޓްރޭޝަން

ރައީސް މުހައްމަދު ނަޝީދުގެ ސަރުކާރުން އިންޑިއާގެ ޖީއެމްއާރު ކުންފުންޏާއެކު އިބްރާހިމް ނާސިރު އިންޓަނޭޝަނަލް އެއާޕޯޓު ތަރައްގީކުރުމަށް ވެފައިވާ އެއްބަސްވުމަކީ ސައްޙަ އެއްބަސްވުމެއް ކަމަށް ސިންގަޕޫރު އާބިޓްރޭޝަނުން ނިންމައިފިއެވެ.

އާބިޓްރޭޝަނުގައި ނިންމާފައިވަނީ އެ އެއްބަސްވުމަކީ ދިވެހި ސަރުކާރުން ބުނެފައިވާގޮތަށް "ވޮއިޑް އެބް އިނީޝިއޯ" (އުފެދުނީއްސުރެ ބާތިލު) އެއްބަސްވުމެއް ނޫންކަމަށެވެ. އެއާޕޯޓު ޑިވެލޮޕްމަންޓު ޗާޖު (އޭޑީސީ) އާއި، އިންޝިއުރަންސް ޗާޖުވެސް ޖީއެމްްއާރުން ނަގާފައިވަނީ ގާނޫނާއި އެއްގޮތަކަށްކަމަށް އާބިޓްރޭޝަނުން ވަނީ ނިންމާފައިއެވެ.

އެގްރީމަންޓު ބާތިލުުކުރަން ޖެހުމުގެ ސަބަބުން ލިބުނު ގެއްލުމުގެ ބަދަލު މޯލްޑިވިސް އެއާޕޯޓްސް ކޮމްޕެނީ (އެމްއޭސީއެލް) އާއި ދިވެހި ސަރުކާރުން ނަގަންޖެހޭނެކަމަށް ވެސްް ވަނީ ނިންމާފައިއެވެ. އެހެންނަމަވެސް، ބަދަލުގެ ގޮތުގައި ދައްކަންޖެހެނީ ކިހާ ފައިސާއެއްކަމެއް އަދި ނުނިންމައެވެ. ނަމަވެސް ޖީއެމްއާރުއަތުން އާބިޓްރޭޝަނުގައި ހިނގި ހަރަދަށްވާ ހަތަރު މިލިއަން ޑޮލަރު 42 ދުވަހުގެ ތެރޭގައި ޖީއެމްއާރަށް ދެއްކުމަށް ދިވެހި ސަރުކާރަށްވަނީ އަންގާފައެވެ.

މިކަމާއި ގުޅިގެން ބަންޑާރަނައިބު މުހައްމަދު އަނިލް މިއަދު ހެނދުނު މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ އާބިޓްރޭޝަނުން ނިންމާގޮތަކަށް ދިވެހި ސަރުކާރުން އަމަލުކުރާނެކަމަށެވެ. އަދި ޖީއެމްއާރުން އެދިފައިވާގޮތަށް 1.2 ބިލިއަން ޑޮލަރު ދޭން ނުޖެހޭނެކަން ޔަގީން ވެފައިވާކަމަށް ވެސް އޭނާ ވަނީ ވިދާޅުވެފައެވެ.

ޖީއެމްއާރާއި ދިވެހި ސަރުކާރާއި ދެމެދުވެފައިވާ އެއްބަސްވުން އުވާލީ ރައީސް ޑރ. މުހައްމަދު ވަހީދު ހަސަންމަނިކުގެ ވެރިކަމުގައެވެ.