ކޯލިޝަންގެ މައްސަލައިގައި މަޝްވަރާއަށްދާން ތައްޔާރު- ޖޭޕީ
17 ޖޫން 2014 20:50
މިއަދުގެ ޕްރެސް ކޮންފަރެންސްގައި ގާސިމް (ކ) ވާހަކަދައްކަވަނީ: ފޮޓޯ މިއަދުނޫސް
ސަރުކާރު ހިންގާ ކޯލިޝަންގެ މައްސަލައިގައި ޕީޕީއެމުން ބުނާކޮންމެ ތަނަކަށް ގޮސް މަޝްވަރާކުރަން ތައްޔާރަށް ތިބި ކަމަށް ޖުމްހޫރީ ޕާޓީން ބުނެފިއެވެ.
ޖުމްހޫރީ ޕާޓީން މިހެން ބުނެފައިވަނީ ސަރުކާރު ކޯލިޝަނުން އެޕާޓީ ވަކިވެއްޖެ ކަމަށް ކޯލިޝަންގެ މައިޕާޓީކަމަށްވާ ޕީޕީއެމުން އިއުލާންކޮށްފައިވަނިކޮށް، ސަރުކާރާއި ގުޅިގެން ކުރިއަށް ދިއުމުގެ ފުރުސަތު އެބައޮތްކަމަށް ރައީސް އަބްދުﷲ ޔާމީން ވިދާޅުވުމާއި ގުޅިގެންނެވެ.
ކުނޫޒުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޖުމްހޫރީ ޕާޓީގެ ލީޑަރު ގާސިމް އިބްރާހީމު ވިދާޅުވީ، ކޯލިޝަން އެއްބަސްވުން އުވިފައިވާ ކަމަށް އަދި ވެސް ގަބޫލު ނުކުރައްވާ ކަމަށެވެ.
އަދި ޖޭޕީން އެދެމުންދަނީ އެއްބަސްވުމުގައިވާ މިންވަރު އެޕާޓީއަށް ދިނުމަށް ކަމަަށާއި، އެއްބަސްވުމުގައިވާ ގޮތުގެ މަތިން މިހާރު މައްސަލަތަކެއް ދިމާވެފައިވާ ކަމަށް ގަބޫލު ކުރައްވާ ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވީ ކޯލިޝަންގައި ޖެހިފައިވާ މައްސަލަތައް ހައްލުކުރުމަށް ޕީޕީއެމުން އެދުނު ކޮންމެ ތަނަކަށްވެސް ދާން ތައްޔާރަށް ހުންނެވި ކަމަށެވެ. އަދި ޖޭޕީން ކުރިއަށްދާން ބޭނުންވަނީ ކުރީގަައިއޮތް އެއްބަސްވުމާއި އެއްގޮތަށް ކަމަށާއި، އަދި ޖޭޕީއަށް ދިނުމަށް އެއްބަސްވެފައިވާ 35 ޕަސެންޓް ދިނުމަށް ކަމަށް ގާސިމް ވިދާޅުވިއެވެ.
ގާސިމު ވިދާޅުވީ ޖޭޕީން ހުށަހަޅާފައިވަނީ ފެންވަރު ނެތް ފަރާތްތަކެއް ކަމަށް ސަރުކާރުން ބުނެފައިވާ ބުނުމަކީ ހަގީގަތެއް ނޫން ކަމަށެވެ. މީގެއިތުރަށް އެއްބަސްވުން އުވާލީ ޕީޕީއެމުން ކަމަށް ބުނެފައިވާ އިރު، މިނިވަން މުއައްސަސާތަކަށް ބޭފުޅުން އައްޔަން ކުރުމާއި ދައުލަތުގެ ބަޖެޓު ހެދުމުގައި ވެސް ޖޭޕީއާއި މަޝްވަރާ ކުރަން ޖެހޭ ކަމަށް އެއްބަސްވުމުގައި ބުނެފައިވާ ކަމަށެވެ. ނަމަވެސް އެމްއެމްއޭއަށް ގަވަރުނަރު އައްޔަން ކުރުމާއި ޕީޖީގެ މަގާމަށް ނަންތައް ފޮނުވުމާއި، އަދި ބަޖެޓު ފޮނުވުމުގައި ވެސް ޖޭޕީއާއި މަޝްވަރާކޮށްފައި ނުވާ ކަމަށް ގާސިމު ވިދާޅުވިއެވެ.
ގާސިމް ވިދާޅުވީ އެމަނިކުފާނަކީ ރައީސް އަބްދުﷲ ޔާމީންގެ އެކުވެރި ބޭފުޅެއްގެ ގޮތުގައި ރައީސް ސިފަ ކުރައްވާފައިވާތީ އުފާ ކުރައްވާ ކަމަށެވެ. ރައްޔިތުންގެ މަޖިލީހުގެ ދެމެންބަރުންނާއި އިކޮނޮމިކް މިނިސްޓަރު މުހައްމަދު ސައީދު ޕީޕީއެމްއަށް ސޮއިކުރެއްވުމަށް ރޭ މުލިއާގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޔާމީން ވަނީ ޖޭޕީންވެސް ސަރުކާރައި ގުޅިގެން ކުރިއަށްދާން ތިބިނަމަ، ސަރުކާރު ވެސް އޮތީ ގުޅިގެން ކުރިއަށްދާން ތައްޔާރަށް ކަމަށް ވިދާޅުވެ ވާހަކަފުޅު ދައްކަވާފައެވެ.އެބައްދަލުވުމުގައި ރައީސް ޔާމީން ވަނީ އެގްރިމެންޓާއި މެދު މަޝްވަރާ ކުރުމަށް ޖޭޕީއަށް ދައުވަތު ދެއްވާފައެވެ.
''ސަރުކާރުގެ އިންޓެންޝަން އަކީ ގުޅިގެން މަސައްކަތް ކުރުން. މިފުރުސަތު ޖޭޕީ އަށް އަދިވެސް އެބައޮތް. ޖޭޕީ އިން ވެސް އަޅުގަނޑުމެންނާއި އެކު ކުރިއަށް ވަޑައިގަންނަވަން ތިއްބެވިއްޔާ އަޅުގަނޑުމެން ވެސް މިތިބީ ކުރިއަށް ދާން ތައްޔާރަށް. ގާސިމް އަކީ ވަރަށް ކުރިއްސުރެ އަޅުގަނޑުގެ ރައްޓެއްސެއް. ކޯލިޝަން އެގްރީމެންޓާއި މެދު ޕާޓީން ވަނީ ގޮތެއް ނިންމާފަ. އެގްރީމެންޓްގެ ޓާމްސް ތަކާއި މެދު ވާހަކަ ދައްކަން ޖޭޕީ އަށް ދައުވަތު ދެން.'' ރައީސް ޔާމީން ވިދާޅުވެފައި ވެއެވެ.
ކިޔުންތެރިންގެ ހިޔާލު