ގަވާއިދާ ޚިލާފަށް ބްރޯޑްކާސްޓްކުރާ ފަރާތްތަކާމެދު ފިޔަވަޅު އަޅާނަން-ޕޮލިސް ކޮމިޝަނަރ
17 ޖޫން 2014 18:54
އެމްބީސީ އާއެކު ސީޕީ އިއްޔެ ބޭއްވި ބައްދަލުވުން: ފޮޓޯ ޕޮލިސް
ގަވާއިދާ ޚިލާފަށް ރާއްޖޭގައި ބްރޯޑްކާސްޓް ކުރާ ފަރާތްތަކާމެދު ފިޔަވަޅު އަޅުއްވާނެ ކަމަށް ޕޮލިސް ކޮމިޝަަނަރ ޙުސައިން ވަހީދު އިއްޔެ ވިދާޅުވެއްޖެއެވެ.
އޭނާވިދާޅުވީ ރެޖިސްޓްރީ ނުކޮށް އެއްވެސް ފަރާތަކުން ބްރޯޑްކާސްޓު ކުރުމަކީ ޤަބޫލު ކުރެވޭނެ ކަމެއް ނޫން ކަމަށެވެ. އެހެން ކަމުން ރަޖިސްޓްރީ ނުކޮށް ބްރޮޑްކާސްޓް ނުކުރުމަށް އޭނާ ނަސޭހަތްތެރިވެ ވަޑައިގެންނެވިއެވެ.
ޙުސައިން ވަހީދު މިހެން ވިދާޅުވީ މޯލްޑިވްސް ބްރޯޑްކާސްޓިން ކޮމިޝަން (އެމްބީސީ) ގެ އިސް ވެރިންނާއެކު އިއްޔެ ބޭއްވި ބައްދުލު ވުމެއްގައެވެ. މިބައްދަލު ވުމުގައި އޭނާ ވިދާޅުވީ ގަވާއިދާ ޚިލާފަށް ބްރޯޑްކާސްޓް ކުރާ ފަރާތްތަކާމެދު ފިޔަވަޅު އަޅުއްވާނީ އެމްބީސީގެ ލަފާގެ މަތިން ކަމަށެވެ.
ދިވެހިންނަކީ ޒަމާނުއްސުރެ ގާނޫނަށް ބޯލަނބާ ބައެއް ކަމަށް އޭނާ ވިދާޅުވިއެވެ. އެހެން ކަމުން ބްރޯޑްކާސްޓު ކުރުމުގައިވެސް، ޤާނޫނާއި ޤަވާއިދާ އެއްގޮތަށް އަމަލު ކުރެއްވުމަށް ގޮވައިލެއްވިއެވެ. އޭނާ ވިދާޅުވީ ރަޖިސްޓްރީ ނުކޮށް ބްރޯޑްކާސްޓް ކުރަމުންދާ ބައެއްތިބި ކަމަށްވާނަމަ ވީހާ އަވަހަށް ރަޖިސްޓްރީ ކުރުމަށް އެދިވަޑައިގަނަނަވާ ކަމަށެވެ. އަދި ނުގަވާއިދުން އެފަދަ ކަމެއް ހިނގަމުންދާ ކަމަށްވާނަމަ އެކަމެއް ގަވާއިދަށް ފެއްތުމަށްވެސް އެދިވަޑައިގެންނެވިއެވެ.
އޭނާ ވިދާޅުވީ މިފަަދަ ފިޔަވަޅު އެޅުމުގެ މަގުސަދަކީ މީހުން ގާނޫނުގެ ތެރެއަށް ގެނައުން ކަމަށްވެސް ސީޕީ ވިދާޅުވިއެވެ.
ކިޔުންތެރިންގެ ހިޔާލު