ހައްޔަރު ކުރުމަށް އަމުރު ނެރެފައި ވަނިކޮށް އުމަރު ކޯޓަށް ހާޒިރުވެ ވަޑައިގެންފި
17 ޖޫން 2014 15:42
އުމަރު ނަސީރު
ކްރިމިނަލް ކޯޓުން ކޮށްފައިވާ އަމުރާ އެއްގޮތަށް، ބަންދުގައި ބަހައްޓައިގެން ހޯމް މިނިސްޓަރ އުމަރު ނަސީރު މިއަދު ކޯޓަށް ހާޒިރު ކުރައްވާނެ ކަމަށް ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެފައި ވަނިކޮށް އުމަރު ނަސީރު އަމިއްލަފުޅަށް ކްރިމިނަލް ކޯޓަށް މިއަދު ހާޒިރުވެ ވަޑައިގެން ފިއެވެ.
މިއަދު 11.00 ގައި އޮތް ޝަރީއަތުގެ މަޖިލީހުގައި ދައުލަތުންވަނީ އުމަރާ ދެކޮޅަށް އުފުލާފައިވާ ދައުވާގައި ހެކި ހުށަހަޅުއްވައިފިއެވެ. ދައުލަތުން ހެކީގެ ގޮތުގައި ހުށަހަޅާފައިވަނީ ވީޑިއޯ ރެކޯޑިން އެކެވެ.
ރާއްޖޭގެ އަމަނަށް ގެއްލުންވާފަދަ ވާހަކައެއް ދެއްކިކަމަށް މިއަދުގެ ޝަރީއަތުގެ މަޖިލީހުގައި، އުމަރުގެ މައްޗަށް ދައުލަތުން ކުރާ ދައުވާ އަކީ، ހިޔާލުފާޅު ކުރުމުގެ މިނިވަންކަމަށް ހުރަސްއެޅޭފަދަ ކަމަކަށްވާތީ އެ ދައުވާ ނުކުރެވޭނެކަމަށް ނިންމައި ދިނުމަށް އެދިވަޑައިގެން އުމަރުގެ ފަރާތުން ނެންގެވި އިޖްރާއީ ނުކުތާއާ ބެހޭގޮތުން ގާޒީއަބުދުﷲ ދީދީ ވިދާޅުވީ އެއީ އިޖްރާއީ ނުކުތާއެއްކަމަށް ޝަރީއަތުން ނުދެކޭ ކަމަށެވެ. އެހެންކަމުން އެ މައްސަލައިގައި ވާހަކަ ދެއްކުމަށް އުމަރުގެ ފަރާތުން ވަނީ ދެކޮޅުހައްދަވައިފައެވެ. އަދި އިޖްރާއީ ނުކުތާގައި ކޯޓުން ނިންމި ނިންމުން އިސްތިއުނާފް ކުރެއްވުމަށް ބޭނުންވާ ކަމަށާއި އެކަމަށްޓަކައި އެނިންމުމުގެ ރިޕޯޓް ދެއްވުމަށް އެދުމުންގާޒީ ތަކުރާރުކޮށް ވިދާޅުވެފައިވަނީ އެ ރިޕޯޓް ނުލިބޭނެ ކަމަށެވެ.
މިއަދުގެޝަރީއަތުގެ މަޖިލިސް ނިންމާ ލައްވަމުން ގާޒީ ވިދާޅުވީ، މައްސަލައިގައި އުމަރުގެ ފަރާތުން ވާހަކަ ދެއްކެވުމަށް ބޭނުންފުޅު ނުވާތީ ދެން އޮންނާނީ މައްސަލައާ ގުޅިގެން ދަންކަންޖެހޭ ވާހަކަ ދައްކަން ދައުލަތަށް ދޭންޖެހޭ ފަހު ފުރުސަތު ދިނުން ކަމަށާއިއެ އަޑުއެހުމަށްފަހު ދެން ބާއްވާ އަޑުއެހުމެއްގައި މައްސަލައަށް ހުކުމް ކުރައްވާނެ ކަމަށެވެ.
އުމަރުގެ މައްޗަށް ދައުލަތުން ދައުވާ ކުރަނީ ރައީސް ނަޝީދުގެ ވެރިކަމުގައި އޭރުގެ އިދިކޮޅު ފަރާތްތަކުން ބޭއްވި މުޒާހަރާ އެއްގައި ރާއްޖޭގެ އަމަނަށް ބުރާއަރާ ފަދަ ވާހަކަ ދައްކާފައިވާ ކަމުގެ ތުހުމަތުގައެވެ.
ހޯމްމިނިސްޓަރު އުމަރުނަސީރު ހައްޔަރުކޮށްގެން ކޯޓަށް ހާޒިރު ކުރުމަށް އަމުރު ނެރެފައި ވަނީ ރަސްމީ ދަތުރުފުޅެއްގައި އޭނާ ރާއްޖެއިން ބޭރަށް ފުރާވަޑައިގަންނަވަން ޖެހިވަޑައިގަތުމުން ދެފަހަރެއްގެ މަތިންޝަރީއަތުގެ އަޑުއެހުން ކެންސަލް ކުރުމަށްފަހު ތިންވަނަ އަޑުއެހުމެއް ބާއްވަން ނިންމެވުމަށް ފަހުއެވެ. ކޮމިޝަނަރއޮފް ޕޮލިސް ހުސައިން ވަހީދު އިއްޔެ ވިދާޅުވެފައިވަނީ އުމަރު ހައްޔަރު ކޮށްގެންކޯޓަށް ހާޒިރުކުރުމަށް ފުލުހުންގެ މައްޗަށް ނެރެފައިވާ އަމުރު ތަންފީޒު ކުރައްވާނެ ކަމަށެވެ.
ކިޔުންތެރިންގެ ހިޔާލު