ސިއްހީ ފަރުވާގެ ބިލު ފޮނުވާނެ ކޮމިޓީއެއް ނެތިގެން އަނބުރައި ގެންދަވައިފި

ބިލް ފޮނުވާނެ ކޮމިޓީއެއް ރައްޔިތުންގެ މަޖިލީހުގައި ނެތް ކަމަށް ވިދާޅުވެ "ސިއްހީ ފަރުވާ ދިނުމުގައި އިހުމާލު ވުމުގެބިލް" މަޖިލީހުގެ މިއަދުގެ ޖަލްސާގައި އަނބުރާ ގެންދަވައި ފިއެވެ.

ބިލުގެ ފުރަތަމަ ކިއުންއިއްވި ނަމަވެސް މަޖިލީހުގެ މިއަދުގެ ޖަލްސާގައި، އެބިލް ހުށަހެޅުއްވި، އައްޑޫމީދޫ ދާއިރާގެ މެންބަރު ރޮޒައިނާ އާދަމް ބިލް އަނބުރާ ގެންދެވީ ބިލަށް ބަހުސް ކުރުމުގެ މަރުހަލާ ފެށުމުގެ ކުރިންނެވެ.

މިއަދުގެ ޖަލްސާގައި ބިލު ގެންދެވިކަމަށް އިޢުލާން ކުރައްވަމުން ރޮޒެއިނާ ވިދާޅުވީ، އެ ބިލު މަޖިލީހަށް ހުށަހެޅުއްވި ނަމަވެސް މިވަގުތު ބިލު ފޮނުވާނެ ކޮމެޓީއެއް މަޖިލީހުގައިނެތް ކަމަށެވެ. ބިލު މިވަގުތު މަޖިލީހުގައި ބޭއްވުމަކީ ބިލުގެ މަސައްކަތް ހުއްޓުމަކަށް އަންނާނެ ކަމަކަށްވާތީ މެޑިކަލް އެސޯސިއޭޝަންގެ ލަފާގެ މަތިން ބިލަށް ގެންނަން ޖެހޭބަދަލުތައް އަވަހަށް ގެނެސް ފުރިހަމަ ކުރުމަށްޓަކައި ބޭނުން ވަނީ އެމްޑީޕީގެ ޕާލަމެންޓްރީ ގްރޫޕުން ބިލު އަލުން ދިރާސާކޮށް، ބޭނުންވާ ބަދަލުތައް ގެންނަންކަމަށް ވެސް ރޮޒެއިނާ ވިދާޅުވިއެވެ.

"ސިއްހީފަރުވާ ދިނުމުގައި އިހުމާލުވުމުގެ ބިލް" އަކީ އެ ފަރުވާ ދިނުމުގައި އިހުމާލުވާ ފަރާތްތަކުން ބަދަލު ހޯދޭނެ އުސޫލުތަކެއް ބަޔާންކޮށްފައިވާ ބިލެކެވެ.