ޖޭޕީގެ ލީޑަރަށް މަރުގެ އިންޒާރު ދިން މައްސަލަ ހުށަހަޅާފައިވަނީ ސީދާ ޤާސިމް
16 ޖޫން 2014 21:53
ޤާސިމް އިބްރާހީމް
ޖުމްހޫރީ ޕާޓީ (ޖޭޕީ) ގެ ލީޑަރު އަދި މާމިގިލީދާއިރާގެ ރައްޔިތުންގެ މަޖިލީހުގެ މެމްބަރު ޤާސިމް އިބްރާހީމް މަރާލަން ބަޔަކު އިންޒާރު ދީފައިވާ މައްސަލައެއް ފުލުހުންނަށް ހުށަހަޅާފައިވަނީ ސީދާ އެމަނިކުފާނު އަމިއްލަ ފުޅަށް ކަމަށް "ދުވަސް" އަށް ކަށަވަރު ވެއްޖެއެވެ.
މިމައްސަލަ ފުލުހުން ބަލަން ފަށައިފައިވަނީ މިމަހު 10 ވަނަ ދުވަހުއެވެ. ނަމަވެސް އެމައްސަލަ ފުލުހުންނަށް ހުށަހެޅި ފަރާތެއް އެދުވަހު ފުލުހުން ހާމަނުކުރިއެވެ. ފުލުހުންގެ މީޑިއާ އިސް ބޭފުޅަކު ވިދާޅުވީ އެމައްސަލަ ހުށަހެޅި ދުވަހުން ފެށިގެން ދަނީ އެކަން ތަހުގީގު ކުރަމުން ކަމަށެވެ. ނަމަވެސް ތަހުގީގަށް ލިބިފައިވާ ކުރިއެރުންތަކާ ބެހޭ ގޮތުން ފުލުހުން އެއްވެސް މައުލޫމާތެއް ނުދެއްވިއެވެ.
އެކަމާ ގުޅިގެން މީހަކަށް ތުހުމަތު ކުރެވިފައި ވޭތޯއާއި، މީހަކު ހައްޔަރު ކޮށްފައިވޭތޯ ދެންނެވުމުން އެއަށްވެސް ފުލުހުން ޖަވާބު ނުދެއްވިއެވެ. ހަމަ އެކަނި ބުނީ "މައްސަލަދަނީ ތަހުގީގު ކުރަމުން" ކަމަށެވެ.
މިމައްސަލަ ބަލަން ފެށިދުވަހު ފުލުހުންގެ އިސްބޭފުޅަކު ވިދާޅުވެފައިވަނީ "އަޅުގަނޑުމެންނަށް ތިޔަ މައްސަލަވަނީ ހުށަހަޅާފައި. އެމައްސަލަ ބަލަމުން މިދަނީ. އިތުރު އެއްވެސްމައުލޫމާތެއް މިވަގުތު ދެވެންނެތް،" ކަމަށެވެ. މީގެ އިތުރަށް މިއަދުވެސް ފުލުހުން މައުލޫމާތެއް ނުދެއްވައެވެ.
ޖޭޕީގެ ސްޕޯކްސް ޕާސަންއިމާދު ސާލިހު ވިދާޅުވެފައިވަނީ އޭނާއަށްވެސް މިކަމާ ގުޅޭ އިތުރު މައުލޫމާތެއް ލިބިފައިނުވާ ކަމަށެވެ. އެކަމުގައި އޭނާގެ ބަހަކީ ފުލުހުންގެ ބަސް ކަމަށްވަނީ ވިދާޅުވެފައެވެ.
ކިޔުންތެރިންގެ ހިޔާލު