ފަންސާސްފަސް މަސްދޯންޏެއްގައި ވީއެލްޑީ ހަރުކުރަން ފަށައިފި: މިނިސްޓަރ

މަސްދޯނި އޮންނަ ސަރަހައްދު ދެނެގަތުމަށް ހަރުކުރަން ޖެހޭ ވެސަލް ލޮކޭޓިން ޑިވައިސް (ވީއެލްޑީ) 55 މަސްދޯންޏެއްގައި ހަރުކުރުމުގެ މަސައްކަތް ކުރަމުންދާ ކަމަށް ފިޝަރީޒްމިނިސްޓަރ ޑރ. މުޙައްމަދު ޝައިނީ ވިދާޅުވެއްޖެއެވެ.

"މިޑިވައިސް ހަރުކުރުމަށް 55 މަސްދޯންޏަކުންވަނީ ފޯމުނަގައިފައި. އަދި މިހާރުދަނީ ޑިވައިސްތައް ހަރުކުރުމުގެ މަސައްކަތް ކުރަމުން،" މިނިސްޓަރ ވިދާޅުވިއެވެ. މިޑިވައިސްގެނެސް ހަރުކުރުމުގެ މަސައްކަތް ފިޝަރީޒު މިނިސްޓްރީން ހަވާލުކޮށްފައި ވަނީދިރާގާއެވެ. އެހެން ކަމުން މާލެއާއި އަތޮޅުތަކުގެ ތެރެއިން ދިރާގުގެ މަކަޒު ހުންނަކޮންމެ ރަށަކުންވެސް މިޑިވައިސް ހަރުކުރެވޭނެ ކަމަށް މިނިސްޓަރ ޝައިނީވިދާޅުވިއެވެ.

މިނިސްޓަރވިދާޅުވީ އެ މިނިސްޓްރީން ފޯމު ނެގުމަށްފަހު އެޑިވައިސް އަށް އެދުމާއި ހަރުކުރުމާދެމެދު މަހެއްހާ ދުވަސް ހޭދަވެދާނެ ކަމަށެވެ. މީގެ ޑިވައިސްގެ އަގަކީ އަށާރަހާސްރުފިޔާއެވެ.

މިހިނގާޖޫން މަހަށްފަހު މިފަދަ ޑިވައިސް ހަރުކޮށްފައިނުވާ މަސްދޯނިފަހަރުން ބާނާ މަސް ފިޔަވައި އެހެންދޯނި ފަހަރުން ބާނާ މަސް ނުގަންނާނެ ކަމަށްވެސް ފިޝަރީޒް މިނިސްޓްރީންވަނީ ހާމަކުރައްވާފައެވެ.

ޝައިނީވިދާޅުވީ އެގޮތަށް އަމަލުކުރަން ޖެހުނީ ރާއްޖެއިން ބޭރުކުރާ މަހާއި މަހުގެ ބާވަތްތަކަށްލިބޭ "މެރިން ސްޓްވާރޑް ސެޓްފިކެޓް" ދެމެހެއްޓުން ކަމަށެވެ. އަދި މަސްވެރިންގެ ސަލާމަތީ ކަންކަން ވަރުގަދަ ކުރުން ކަމަށެވެ. މިޑިވައިސް ނެތްދޯނިފަހަރުން ބާނާމަސް ޔޫރަޕުން ނުގަންނާނެ ކަމަށް ބުނާނަމަ ޑިވައިސްހަރު ކުރަންމަޖުބޫރު ކަމަށްވެސް މިނިސްޓަރ ވިދާޅުވިއެވެ.  

މިނިސްޓަރވިދާޅުވީ ވެސަލް މޮނީޓަރިން ޑިވައިސް ދޯނި ފަހަރުގައި ހަރުކުރުމުން އެދޯނި އުޅޭ ސަރަހައްދު ކޮންމެ 15 މިނިޓަކުން މިނިސްޓްރީއަށް ބަލާލެވޭނެ ކަމަށެވެ. އަދިއޮޑިވެރިޔާއަށާއި، ކޯސްޓްގާޑަށް އެދޯނި ފެންނާނެ ކަމަށެވެ. "މިހާރު ވަރަށްގިނައިން ދޯނިފަހަރު ގެއްލިގެން ހޯދަން އެބަޖެހޭ. މިސިސްޓަމް ހަރުކުރުމުން އެކަމަށްވެސް ހައްލެއް ލިބިގެންދާނެ،" މިނިސްޓަރ ވިދާޅުވިއެވެ.

ޑިވައިސް މެދުވެރިކޮށް ދުނިޔޭގެ ކޮންމެ ތަނެއްގައި ދޯނި އޮތަސް ފެންނާނެއެވެ. މި ޑިވައިސްގެ ސަބަބުން ރާއްޖޭގެ ކަނޑުގެ ސަރަހައްދަށް ވަންނަބޭރުގެ މަސްބޯޓު ފަހަރު ހޯދުމަށްވެސް ފަސޭހަވާނެ ކަމަށް މިނިސްޓަރ ވިދާޅުވިއެވެ.