އޮއިވާލި ކަނދުފަތި އޮންނަ ސަރަހައްދު ބަދަލު ކުރުމުގެ އުސޫލު ބަދަލުކޮށްފި
14 ޖޫން 2014 6:28
އެންމެ ކުރިން ފިޝަރީޒް މިނިސްޓްރީން އަޅައިފައިވާ އޮއިވާލި ކަނދުފަތި މަސްވެރިންގެ އެދުމުގެ މަތީން އެހެން ސަރަހައްދަކަށް ބަދަލު ކޮށްދިނަސް މިހާރު އެއުސޫލު ބަދަލުކޮށްފި ކަމަށް ފިޝަރީޒްމިނިސްޓަރ ޑރ. މުޙައްމަދު ޝައިނީ ވިދާޅު ވެއްޖެއެވެ.
އެމަނިކުފާނު ވިދާޅުވީ މަސްވެރިންގެ އެދުމުގެ މަތިން އޮއިވާލި ކަނދުފަތި ހުރިތަން ކުރިން ބަދަލު ކޮށްދެއްވި ކަމަށެވެ. ނަމަވެސް މިހާރު ވަނީ އެގޮތަށް ބަދަލު ނުކުރަން ނިންމާފައި ކަމަށްވެސް ވިދާޅުވިއެވެ.
"މަސްވެރިން އެދުމުން ކަނދުފަތި އެހެން ސަރަހައްދަކަށް ކުރިންވާނީ ބަދަލުކޮށްދީފައި. ނަމަވެސް އެގޮތަށް ހެދުމުން ބައެއް މަސްވެރިންގެ ޝަކުވާ އަތޮޅު ކައުންސިލަށް އަންނަ ކަމަށް ކައުންސިލް ތަކުންވަނީ ބުނެފައި. އެހެންވީމާ ދެން ކަނދުފަތި އެހެންސަރަހައްދަކަށް ބަދަލު ކުރެވޭނީ އެއަތޮޅެއްގެ އަތޮޅު ކައުންސިލުން މިނިސްޓްރީގައި ދެންނެވުމުން،" މިނިސްޓަރ ވިދާޅުވިއެވެ.
"ކަނދުފަތި ބަދަލު ކުރުމުން ކުދިދޯނިފަހަރަށް އެހާ ދުރަށްދާން ދަތިކަމަކަށް ވެފައިވަނީ. އެއީ ކުދިދޯނި ފަހަރަށް މަސްވެރިކަން ކުރުމުގެ ފުރުސަތު ނުދީ ހަމައެކަނި ބޮޑެތި ދޯނިފަހަރަށް ފުރުސަތު ދިނުމަށް ކުރިކަމެއް ކަމަށް ބުނެ ކައުންސިލްތަކަށް އެބަހުރި މައްސަލަ ހުށަހަޅާފައި،"މިނިސްޓަރ ވިދާޅުވިއެވެ.
ކަނދުފަތި އޮތް ސަރަހައްދު ނޫން އެހެންސަރަހައްދަކަށް ބަދަލުކުރާ ކަމަށްވާނަމަ އަތޮޅުކައުންސިލުން ހުރިހާ މަސްވެރިންގެބަސް ހޯދުމަށްފަހު ފިޝަރީޒް މިނިސްޓްރީއަށް އެންގުމުންނޫނީ ބަދަލު ނުކުރެވޭނެ ކަމަށްވެސް އެމަނިކުފާނު ވިދާޅުވިއެވެ.
ކިޔުންތެރިންގެ ހިޔާލު