މިނިސްޓަރ އުމަރު ނަސީރު ކޯޓަށް ހާޒިރު ކޮށްދިނުމަށް ފުލުހުންނަށް އަމުރުކޮށްފި
13 ޖޫން 2014 19:12
އުމަރު ނަސީރު
ހޯމް މިނިސްޓަރު އުމަރު ނަސީރު ފުލުހުންގެބަންދުގައި ބަހައްޓައިގެން ކޯޓަށް ހާޒިރު ކޮށްދިނުމަށް ކްރިމިނަލް ކޯޓުންފުލުހުންނަށް އަމުރު ކޮށްފިއެވެ.
މިއަމުރާ ގުޅިގެން ކްރިމިނަލް ކޯޓާއި، ފުލުހުންގެފަރާތުން ބަހެއް ނުލިބުނެވެ. ނަމަވެސް މިއަމުރު ނެރެފިކަން "ދުވަހަސް" އަށްވަނީ ކަށަވަރު ވެފައެވެ. ދައުލަތުގެމިނިސްޓަރަކު ބަންދުގައި ބަހައްޓަކައިގެން މީގެ ކުރިން ކޯޓުން އަމުރެއް ކުރެއްވިކަން އެނގިފައެއް ނެތެވެ.
ބަންދުގައި ބަހައްޓައިގެން އުމަރު ކޯޓަށް ހާޒިރުކުުރުމަށް އުމަރު ނެރުނީ ދައުލަތުން އޭނާގެ މައްޗަށް ކުރައްވާ ދައުވާއެއްގެ ޝަރީއަތަށެވެ. އެއީ އެމްޑީޕީގެ ވެރިކަމުގައި ބޭއްވި މުޒާހަރާއެއްގައި ދައުލަތުގެ އަމާންކަމަށް ގެއްލުން ލިބިދާނެ ފަދަ ވާހަކަތަކެއް ދެއްކެވި ކަމުގެ ތުހުމަތުގައި ކުރައްވާ ދައުވާއެކެވެ. އެންމެފަހުން މިމައްސަލަ ތާވަލުކުރި ދެފަހަރުވެސް އުމަރު ހުންނެވީ ރާއްޖެއިން ބޭރުގައެވެ. އެހެންވެ ކޯޓަށް ވަޑައިގަނެވޭ ގޮތެއް ނުވީކަމަށް ހޯމްމިނިސްޓްރީން ވަނީ ކޯޓަށް އަންގަވާފައެވެ. އުމަރަށް ވަޑައި ނުގެންނެވުމުން އަންގާރަ ދުވަހާއި ބުރާސްފަތި ދުވަހު ބާއްވަން އުޅުނު ޝަރީއަތްވަނީ ކެންސަލް ކުރައްވާފައެވެ.
ފުލުހުންގެ ބެލުމުގެ ބަންދުގައި ބަހައްޓައިގެންއުމަރު ކޯޓަށް ހާޒިރު ކޮށްދެއްވުމުގެ އަމުރު ނެރެފައިވާއިރު އޭނާގެ ފަރާތުންވަނީ އެމައްސަލަ ފަހުންގެ ތާރީޚަކަށް ބަދަލު ކޮށްދެއްވުމަށް ކޯޓުގައި އެދިފައެވެ.
ރަސްމީދަތުރު ފުޅެއްގައި އުމަރު މިހާރުވެސް ހުންނެވީ ނެދަލޭންޑްސް ގައެވެ. އެނބުރި ވަޑައިގެންނެވުމަށް ހަމަޖެހިފައިވަނީ މިމަހުގެ 16 ވަނަ ދުވަހުއެވެ. 17 ވަނަދުވަހަށް މައްސަލަ ތާވަލް ކުރިޔަސް އުމަރު ކޯޓަށް ވަޑައިގަންނަވާނެ ކަމަށް ހޯމްމިނިސްޓްރީން ވަނީ ހާމަ ކުރައްވާފައެވެ.
ކިޔުންތެރިންގެ ހިޔާލު