ރާއްޖޭގައި ޓެރަރިޒަމްގެ ހަރުކަށި އަމަލު ހިންގާ: އެމްޑީޕީ
9 ޖޫން 2014 16:20
ސޫރިއާގައި ހިނގަމުންދާ ދާހިލީ ހަނގުރާމައިގައި ދިވެހިން ބައިވެރިވާ ކަމަށް ބުނޭ. ނަމަވެސް މިކަން ސަރުކާރުގެ ރަސްމީ ފަރާތަކުން ކަށަވަރު ކޮށްދީފައެއް ނުވޭ.
ދިވެހިރާއްޖޭގައި ހަރުކަށި ޓެރަރިޒަމްގެ އަމަލުތަކެއް ހިންގަމުން ގެންދާކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ތުހުމަތުކޮށްފިއެވެ.
އެމްޑީޕީން މިއަދު ނެރުނު ނޫސްބަޔާނެއްގައި ބުނެފައިވަނީ، މިފަހަކަށް އައިސް ހައްދުފަހަނާޅާފައިވާ ބައެއްމީހުން، އިސްލާމްދީނުގެ ނަމުގައި ދިވެހި ބައެއް ޒުވާނުން ދީނާޚިލާފު ޢަމަލުތައްހިންގާ ކަމަށްބުނެ، ޒުވާނުން ރަހީނުކޮށްފައިވާ ކަމަށެވެ.
ޒުވާނުން ކަނުބަނދެގެން ގޮތްނޭގޭ އެކަހެރި ތަންތަނަށް ގަދަކަމުން ގެންގޮސް، ތޫނުހަތިޔާރުން ބިރުދައްކައި، މަރުގެއިންޒާރުދީފައިވާ ކަމަށް ވެސް އެމްޑީޕީން ބުނެ އެވެ. ޝަރިޢަތެއްގެ ނަމުގައި އަމިއްލަ ޙުކުމްތަކެއް އިއްވައި، އެޙުކުމްތައް ތަންފީޒު ކުރަމުން ގެންދާކަމުގެ މައުލޫމާތު އެ ޕާޓީއަށް ލިބިފައިވާކަމަށް ވެސް އެމްޑީޕީން ބުނެފައިވެ އެވެ.
"މި ޕާރޓީއަށް އެނގިފައިވާގޮތުގައި، މިދެންނެވި ގޮތަށް ރާހިނުން ޢަމަލުކުރުމަށްފަހު، އެމަޢުލޫމާތު އެހެން ފަރާތަކާ ޙިއްސާ ކޮށްފިނަމަ ރަހީނުކުރެވުނު ޒުވާނުން ގަތުލުކުރާނޭ ކަމަށް ބުނެ ހަރުކަށި ބަސްތަކުން އިންޒާރު ދީފައިވެއެވެ. ދިވެހިރާއްޖޭގެ ޤާނޫނު އަސާސީއާއި، ޤާނޫނުތަކާއި އަދި އިސްލާމީޝަރީޢަތުގައި ކަންކަން ކަނޑައެޅިފައިވާ ގޮތްތަކުން ބޭރުން، އެކިއެކިފަރުދުން، ވަކި މަންފާއެއް ޙާޞިލުކުރުމަށް ހިންގާ އެފަދަ ނުރައްކާތެރި ޓެރަރިޒަމްގެ ޢަމަލުތައް މި ޕާރޓީން އެންމެ ހަރުއަޑުން ކުށްވެރިކުރަމެވެ." އެމްޑީޕީން މިއަދު ނެރުނު ބާޔާނެއްގައި ބުނެފައިވެއެވެ.
ރަހީނުކުރުމާއި މަރުގެ އިންޒާރު ދިނުމުގެ މިނުރައްކާތެރި ޓެރަރިޒަމުގެ ޢަމަލުތަކުގެ މަޢުލޫމާތު މިހާރު ދިވެހިސަރުކާރުގެ ކަމާބެހޭ ފަރާތްތަކަށް ލިބިފައިވާނޭކަމާއި، އެހެންކަމުން މިކަމުގައި ވަގުތުން ފިޔަވަޅު އެޅުމަށް އެމްޑީޕީން ވަނީ ސަރުކާރަށް ގޮވައިލާފަ އެވެ.
އެމްޑީޕީގެ މިބަޔާނުގައި ބުނެފައިވާ ކަންކަން ހިނގާކަމުގެ މައުލޫމާތު ލިބިފައި ނުވާކަމަށް ސަލާމަތީ ބާރުތަކުންވަނީ ބުނެފައެވެ. ނަމަވެސް އެބަޔާނަށްފަހު އެކަންކަން ބަލަމުންދާ ކަމަށްވެސް ވަނީ ބުނެފައެވެ.
އެމްޑީޕީން މިހެން ބުނެފައިވާއިރު، ސޫރިއާގައި ހިނގަމުންދާ ދާހިލީ ހަނގުރާމައިގައި ދެ ދިވެހިން ވަނީ މަރުވެފައި ކަމަށް ވަނީ ޚަބަރު ފެތުރިފައެވެ. އަދި ސޫރިއާގައި ހަރަކާތްތެރިވާ ދިވެހިން ކަމަށް ބުނާބަޔަކުވަނީ އިންޓަރނެޓް މެދުވެރިކޮށް ދިވެހި ފުލުހުންނަށް ހަރުކަށި އިންޒާރެއްދީ އެމީހުން އަނބުރާ ރާއްޖެއަށް ނުގެނެވޭނެ ކަމަށް ބުނެފަ އެވެ.
މި މައްސަލައިގައި ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެފައިވަނީ އެމީހުން ސޫރިއާއަށް ދިޔައީ ވެސް އަމިލައަށްކަމުން އެމީހުން އެނބުރި ދިވެހިރާއްޖެއަށް ވެސް އަންނާނީ އަމިއްލައަށް ކަމަށެވެ. އެކަމަށް ސަރުކާރުން ޓިކެޓްވެސް ދެއްވާނެ ކަމަށް ވިދާޅުވެފައިވެއެވެ.
ކިޔުންތެރިންގެ ހިޔާލު