ޖަލުގައިހުރި ފިރިމީހާއަށް މަސްތުވާތަކެތި ފޯރުކޮށްދޭން އުޅުނު އަނބިމީހާ ހައްޔަރު ކޮށްފި
9 ޖޫން 2014 15:55
"މާފުށީ ޖަލަށް ކުށްވެރިން އުފުލާ "ޖަލުދޯނި
މަސްތުވާތަކެތީގެ މައްސަލައެއްގައި 25 އަހަރުގެ ޖަލު ހުކުމެއް ތަންފީޒު ކުރަމުންދާ ފިރިހެނަކަށް އޭނާގެ އަނބި މީހާ މަސްތުވާތަކެތި ފޯރުކޮށްދޭން އުޅެނިކޮށް ފުލުހުންގެ ބެލުމުގެ ދަށަށް ގެނެސްފިއެވެ.
މާފުށީ ޖަލުގައިހުރި ފިރިމީހާއަށް މަސްތުވާތަކެތި ފޯރުކޮށްދޭން އުޅުނު 26 އަހަރުގެ އަނބި މީހާ ފުލުހުންގެ ބެލުމުގެ ދަށަށް ގެނެސްފައިވަނީ ފިރިމީހާއާ ބައްދަލު ކުރުމަށް ޖަލަށް ގޮސްހުއްޓަ އެވެ.
ފުލުހުންނަށް ލިބުނު މައުލޫމާތަކާ ގުޅިގެން އޭނާ ހައްޔަރުކޮށް ބެލިއިރު މަސްތުވާތަކެތި އަޅާފައިހުރި ބްލެޓްސައިޒުގެ 3 ރަބަރު ޕެކެޓް އޭނާގެ އަތުން ފެނުނު ކަމަށް ފުލުހުންވަނީ ބުނެފައެވެ. މިތަކެތި ފެނިފައިވަނީ އޭނާގެ ފުރަގަސް ފަރާތުންނެވެ. އޭނާ ހައްޔަރު ކޮށްފައިވަނީ އާދިއްތަ ދުވަހު ހެނދުނު ކަމަށްވެސް ފުލުހުންވަނި ބުނެފައެވެ.
މިއަންހެންމީހާއާ މެދު ގޮތެއް ނިންމުމަށް ކްރިމިނަލް ކޯޓަށް ގެންދިޔުމުންވަނީ ހޯމް މިނިސްޓްރީއަށް ފެންނަ ތަނެއްގައި ބަންދުގައި ބަހައްޓައިގެން ތަޙުޤީޤު ކުރިއަށް ގެންދިއުމަށް 10 ދުވަހުގެ ބަންދުގެ މުއްދަތެއް ދީފައެވެ. މިއަންހެން މީހާ ޖަލަށް މަސްތުވާތަކެތި ވައްދަން އުޅުނު މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.
މާފުށީ ޖަލަށް މަސްތުވާތަކެތި އެތެރެކުރަން އުޅުނި އެ ޖަލުގެ އޮފިސަރެއް 2012 ވަނަ އަހަރު އަތުލައިގަނެފައިވެ އެވެ. އަދި މިއަހަރު ކުރީކޮޅު އެ ޖަލުގެ އޮފިސަރެއްގެ އެންކަލް ބޫޓެއްގެ ތެރެއިން މަސްތުވާތަކެތި ފެނިފައިވެ އެވެ. އެހެން ނަމަވެސް އެ މައްސަލައިގައި މީހަކު ހައްޔަރުކޮށްފައެއް ނުވެ އެވެ.
ކިޔުންތެރިންގެ ހިޔާލު