ޕީޕީއެމުން ތާއީދުކުރާނެކަން އެނގޭނަމަ ނާއިބު ކަމަށް ކުރިމަތިލައްވާނީ އިބޫ- ނިހާނު

ޕީޕީއެމްގެ ތާއީދު އެމްޑީޕީއަށް އޮތްކަން ކުރިން އެނގުނުނަމަ، މަޖިލީހުގެ ނާއިބު ރައީސް ކަމުގެ މަގާމަށް ހުޅުހެންވޭރު ދާއިރާގެ މެންބަރ މުސާ މަނިކުގެ ބަދަލުގައި ކުރިމަތި ލައްވާނީ އެމްޑީޕީގެ ޕީޖީ ގްރޫޕްގެ ލީޑަރ އަދި ހިންނަވަރު ދާއިރާގެ މެންބަރ އިބްރާހީމް މުޙައްމަދު ޞާލިޙު (އިބޫ) ކަމަށް މަޖިލީހުގެ މެޖޯރިޓީ ލީޑަރު އަދި ޕީޕިއެމްގެ ޕީޖީ ލީޑާރު އަޙުމަދު ނިހާން ހުސައިން މަނިކު ވިދާޅުވެއްޖެއެވެ.

"ދުވަސް ނިއުސް" އަށް ދެއްވި އިންޓަވިއު އެއްގައި ނިހާން ވިދާޅުވީ މަޖިލީހުގެ ނާއިބު ރައީސް ކަމަށް ރީކޯ މޫސާ މަނިކުގެ ނަން ފާސްވެގެން ދިޔައީ ޕީޕީއެމްގެ ތާއީދު އޮވެގެން ކަމަށް އެމްޑީޕީގެ ވަގުތީ ރައީސް މުޙައްމަދު ނަޝީދާއި، މޫސާ މަނިކު ވިދާޅުވި ނަމަވެސް އެއީ ހަގީގަތެއް ނޫންކަމަށެވެ.

ނިހާން ވިދާޅުވީ ޕީޕީއެމްގެ ތާއީދު ލިބިގެން މޫސާ މަނިކުގެ ނަމެއް މަޖިލީހުގެ ނާއިބު ރައީސް ކަމަށް ފާސްވެގެން ނުދާނެ ކަމަށެވެ. ނަމަވެސް ޕީޕީއެމްގެ ތާއީދު އޮތްކަން އެބޭފުޅުންނަށް އެނގިވަޑައިގެންފައި ވާނަމަ، ނުވަތަ އެފަދަ އިޝާރާތެއް ލިބިފައި އޮތްނަމަ ނާއިބު ކަމަށް އިބޫގެ ނަން ހުށަހެޅީސް ކަމަށް ނިހާން ވިދާޅުވިއެވެ.

''އެމްޑީޕީގެ ބޭފުޅަކު ނާއިބު ރައީސް ކަމަށް އިންތިޚާބުވެ ވަޑައިގަތީ ޕީޕީއެމްގެ ތާއީދު އޮވެގެން ކަމަށް ބުނަނީ އޮޅުވާލަން. ޕީޕީއެމްގެ ތާއީދު އޮތްކަން އެނގޭނަމަ މޫސަގެ ނަމެއް ނުވެސް އަންނާނެ، އަންނާނީ އިބޫގެ ނަން. މޫސައަކީ އެކަމަށް އެކަށީގެންވާ ބޭފުޅެއް ކަމަށް ގަބޫލެއް ނުކުރާނެ ޕީޕީއެމަކުން. ނަމަވެސް އިބޫއަކީ މަޖިލީހުގައި އެތައް ދުވަހަކު މަސައްކަތް ކުރައްވާފައިވާ ގާބިލު ބޭފުޅެއް.'' ނިހާން ވިދާޅުވިއެވެ.

މޫސައަށް ނާއިބު ރައީސްކަން ލިބިވަޑައިގަތީ ބަޔަކު އުކާލި "އެއްޗިހިތަކަކުން" ލިބިވަޑައިގެން ޗާންސެއް ކަމަށް ވެސް ނިހާން ވިދާޅުވިއެވެ.

ނިހާން ވިދާޅުވާ ގޮތުގައި މޫސަ މަޖިލީހުގެ ނާއިބު ކަމަށް އިންތިޚާބުވެ ވަޑައިގަތުމުން މަޖިލީހުގެ ތަޅުމުގައި މިދައުރު މަސައްކަތް ކުރަން ފަސޭހަ ވެގެންދާނެއެވެ. އެގޮތުން މޫސަ މީގެކުރިން މަޖިލީހުގެ ތެރެއިން ފެނިގެންދިޔައީ އެމްޑީޕީން މަޖިލީހުގައި ގެންގުޅުނު ''ތާޅަފިއްޔެއް'' ގެ ގޮތުގައި ކަމަށް އޭނާ ވިދާޅުވިއެވެ.

ނިހާން ވިދާޅުވީ މަގާމުގެ ޝަރަފާއި އަބުރު ރައްކާތެރި ކުރަން ބޭއަދަބީ ކަންތަކުން ދުރުވެ އިންނެވުމަށް މިހާރު މޫސައަށް މަޖުބޫރުވާނެ ކަމަށެވެ. އޭނާ ވިދާޅުވީ މަޖިލީހުގެ ނާއިބު ކަމަށް މޫސާ މަނިކު އިންތިޚާބު ކުރެއްވުމަށް ޕީޕީއެމުގެ ބޭފުޅުން ވޯޓްދެއްވާފައި ނުވާކަމަށެވެ. އަދި މޫސައަށް ވޯޓްދެއްވީ ޖޭޕީއާއި، އެމްޑީޕީގެ މެންބަރުން ކަމަށް ނިހާން ވަނީ ތުހުމަތު ކުރައްވާފައެވެ.

ޖޭޕީން ބުނެފައިވަނީ މުސާ މަނިކު މަޖިލީހުގެ ނާއިބު ރައީސް ކަމަށް އިންތިޚާބު ކުރީ އެމްޑީޕީއާއި ޕީޕީއެމުން ވޯޓް ދީގެން ކަމަށެވެ.