ސިޔާސީ ހަޔާތުގެ ބައިވެރިޔާއާ ވަކިވާންޖެހޭ ހާލަތެއް ނާދޭ- މޫސަ

ސިޔާސީ ހަޔާތުގެ ބައިވެރިޔާ (އެމްޑީޕީ) އާ، ވަކިވާންޖެހޭ ހާލަތަށް އަދި ނުދާކަމަށް އެމްޑީޕީގެ ކުރީގެ ޗެއާޕާސަން، އަދި ރައްޔިތުންގެ މަޖިލީހުގެ ނާއިބު ރައީސް މޫސާ މަނިކު ވިދާޅުވެއްޖެއެވެ.

މޫސަ މިހެން ވިދާޅުވީ އޭނާ އެމްޑީޕީ ދޫކުރައްވައި އެހެން ޕާޓީއަކާ ގުޅިވަޑައިގަތުމަށް މަސައްކަތް ކުރައްވާ ކަމަށް ބައެއް ފަރާތްތަކުން ދައްކަމުންދާ ވާހަކަތަކާ ގުޅިގެން "ދުވަސް ނިއުސް" އަށް ދެއްވި އިންޓަވިއުއެއްގައެވެ.

މޫސަ ވިދާޅުވީ އޭނާގެ ސިޔާސީ ހަޔާތް ފެއްޓެވީ އެމްޑީޕީން ކަމަށެވެ. އެހެންކަމުން ސިޔާސީ ހަޔާތުގެ ބައިވެރިޔާއާއި ވަކިވާންޖެހޭ ހާލަތެއް އަދި ސަބަބެއް ވެސް ނެތް ކަމަށެވެ.

މޫސަ ވިދާޅުވީ އެމްޑީޕީ އުފެއްދި ބޭފުޅުންގެ ތެރޭގައި ވެސް އޭނާ ހިމެނޭއިރު، ޕާޓީ ދޫކޮށްދާންޖެހޭ ސަބަބެއް ނެތް ކަމަށެވެ. އަދި ޕާޓީ ބަދަލުކުރުމާ ބެހޭ ގޮތުން އެއްވެސް ފަރާތަކަށް އޭނާއާއި ސުވާލު ކުރިމަތި ކުރުވަންޖެހޭ ސަބަބެއް ނެތް ކަމަށް ވެސް މޫސަ ވިދާޅުވިއެވެ. އަދި އޭނާއަކީ އެހާ ފަސޭހައިން ޕާޓީ ބަދަލުކުރާނެ މީހެއް ނޫންކަމަށާއި، ޕާޓީ ބަދަލުކުރަންޖެހޭ ހާލަތަށް ކަންކަން ނުދާކަމަށް ވެސް ވިދާޅުވިއެވެ.

އަދި މިވަގުތު އެމްޑީޕީއަށް ލިބިފައިވާ ސިޔާސީ އެންމެ ބޮޑު މަގާމު އަދާކުރައްވަމުން ގެންދަވަނީ ވެސް އޭނާ ކަމަށާއި، އެގޮތުން މިހާރު އެމްޑީޕީއަށް ލިބިފައިވާ ރައްޔިތުންގެ މަޖިލީހުގެ ނާއިބު ރައީސް ކަމުގެ މަގާމަކީ ސިޔާސީ ގޮތުން އެމްޑީޕީ ފުރަމުންދާ އެންމެ ބޮޑު މަގާމުކަމަށް ވެސް މޫސަ ވިދާޅުވިއެވެ.

'' ސިޔާސީ ގޮތުން މިހާރު އެމްޑީޕީއަށް ލިބިފައި އޮތް އެންމެބޮޑު މަގާމު އަދާކުރަމުން މިދަނީ، އެއީ މަޖިލީހުގެ ނާއިބު ރައީސްކަން. އެއަށްވުރެ ވަކިން ބޮޑު އެއްވެސް މަގާމެއް އެމްޑީޕީއަކަށް ނެތް. އަދި ޕާޓީ ބަދަލުކުރާކަށް ނޫޅެން. ސިޔާސީ ހަޔާތުގެ ބައިވެރިޔާއާ ވަކިވާންޖެހޭ ހާލަތަކަށް އަދި ނުދޭ. އެމްޑީޕީއަކީ ވަކި މީހަކަށް ނުވަތަ ވަކި ލީޑާޝިޕަކަށް އޮތް އެއްޗެއް ނޫން. އެންމެ ބޮޑު އެއްޗަކީ ޕާޓީގެ އާންމު މެންބަރުން.'' މޫސަ ވިދާޅުވިއެވެ.