ދިވެހިން ހައްދު ފަހަނާޅާފައިވާ ޢަމަލުތައް ހިންގަނީ ސިޔާސީ ވެރިންގެ ބައިވެރިވުން އޮވެގެން: އެމްޑީޕީ

ހައްދު ފަހަނާޅާފައިވާ ޢަމަލުތައް ހިންގާ ދިވެހިން އެކަންކުރަނީ ސިޔާސީ ވެރިންގެ ބައިވެރިވުން އޮވެގެން ކަމަށް އެމްޑީޕީން ތުހުމަތު ކޮށްފިއެވެ.

އެޕާޓީން މިތުހުމަތު ކޮށްފައިވަނީ ސީރިޔާގައި ހަނގުރާމަ ކުރަމުންދާ ދިވެހިން ކަމަށްބުނާ ބަޔަކު ދިވެހި ފުލުހުންނަށް އިންޒާރު ދީފައިވާތީ އެކަމާ ކަންބޮޑުވުން ފާޅުކޮށް ނެރެފައިވާ ބަޔާނެއްގައެވެ.

އެޕާޓީން ބުނެފައިވަނީ ބޭރުގައި ހިންގާ ޓެރަރިޒަމަށް ފައިސާ ޖަމާކުރާތަނެއްގެ ގޮތުގައި ރާއްޖެ ވަމުންދާކަން އެޕާޓީން އެކިފަހަރުމަތިން ސަރުކާރުގެ ސަމާލުކަމަށް ގެނެސްފައިވާނެ ކަމަށެވެ.

ދިވެހިންގެ ތެރެއިން އެފަދަ އަމަލު ހިންގާ މީހުން އެކަންކުރަނީ އެފަދަ އަމަލުތަކަށް އެހީތެރިވެދޭ ބޭރުގެ ފަރާތްތަކެކޭ އެއްފަދައިން ދިވެހިން ވެސް ޝާމިލުވެގެން ކަމަށް އެޕާޓީން ދެކޭ ކަމަށް ބުނެފައިވެއެވެ. "އެފަރާތްތަކުން އެފަދަ ޢަމަލުތައް ހިންގަނީ އެކަމަށް ބޭނުންވާ ފައިސާއާއި ތަމްރީނުލިބި، ރޭވިގެންވާ އިންތިޒާމެއްގެ ދަށުންކަން ވެސް ޤަބޫލުކުރެވެއެވެ." މިއަދު ނެރަފައިވާ ބަޔާނުގައިވެއެވެ.

"ހަނގުރާމަވެރި އަދި ހައްދުފަހަނާޅާފައިވާ ޢަމަލުތައް ހިންގާ ދިވެހިން އެފަދަ ޢަމަލުތައް ހިންގުމުގައި އިންތިޒާމުވެގެން ޙަރަކާތްތެރިވުމަށް ހިތްވަރަކަށް ވެފައިވަނީ ސިޔާސީ ބޭނުމަކަށްޓަކައި އެކަމުގައި ބައެއް ސިޔާސީ ވެރިންގެ ބައިވެރިވުމުންނާއި، 23 ޢިއްތިޙާދުގެ ނަމުގައި ޙަރަކާތެރިވި ފަރާތްތަކުންނާއި، މިހާރުގެ ސަރުކާރުގެ ނައިބު ރައީސް ޑޮކްޓަރ މުޙައްމަދު ޖަމީލު އަޙުމަދު، ދީނުގެ ނަމުގައި ފިތުނަ އުފެއްދުމަށް ބެއްސެވި ލުއި ފޮތް ފަދަ ތަކެތިންނާއި އަމަލުތަކުންނެވެ." އެމްޑީޕީގެ ބަޔާނުގައި ބުނެފައިވެއެވެ.

މީގެ އިތުރަށް ސިފައިންނާއި ފުލުހުންގެ އިސްވެރިން ހައްދުފަހަނަ އަޅާފައިވާ އަމަލުތައް ކުރިއެރުވުމަށް ބައިވެރިވެފައިވާ ކަމަށްވެސް އެބަޔަނުގައިވަނީ ތުހުމަތު ކޮށްފައެވެ. "ސިފައިންނާއި ފުލުހުންގެ ތަމްރީނުތަކުގައި ރޭވިގެން އިންތިޒާމެއްގެ ދަށުން އެފަރާތްތައް ބައިވެރިކޮށް ހަނގުރާމައަށް ތަމްރީނުކުރުވާ ކުރުމުންނާއި، ދީނާއި ޤައުމުގެ ނަމުގައި ކުރި ޙަރާމް ބަޣާވާތުގެ ސަބަބުން ވެސް އެފަރާތްތަކަށް ހިތްވަރަކަށް ވެފައިވާކަން ފާހަގަކުރަމެވެ." އެބަޔާނުގައިވެއެވެ.

އެބަޔާނުގައި ބުނެފައިވަނީ ބޭރުގެ ހަނގުރާމަ ތަކުގައި ދިވެހިން، ހަނގުރާމަވެރި ޖަމާޢަތްތަކާއެކު ހަނގުރާމައިގައި ބައިވެރިވެ ޙަރަކާތްތެރި ވަމުންދާކަމާއި، ހައްދުފަހަނާޅާފައިވާ ކަންކަން ހިންގަމުންދާކަމާއި، އަދި ބޭރުގައި ހިންގާ ޓެރަރިޒަމަށް ފައިސާ ޖަމާކުރާތަނެއްގެ ގޮތުގައި ރާއްޖެ ވަމުންދާކަމުގެ މަޢުލޫމާތު ސަލާމަތީ ޚިދުމަތްތަކަށް ލިބިފައި ނުވާކަމަށް ބުނެ އެކަމުގައި ސަރުކާރުން އެކަށީގެންވާ ފިޔަވަޅެއް އަޅާފައި ނުވާ ކަމަށެވެ.

ބޭރުގެ ގައުމުތަކުގައި ހިނގާ ހަނގުރާމަތަކުގައި ދިވެހިން ބައިވެރިވަމުންދާ މައްސަލާގައި ރައީސް ޢަބްދުﷲ ޔާމީން ޢަބްދުލް ޤައްޔޫމް ދައްކަވާފައިވާ ވާހަކަފުޅަށްވެސް އެމްޑީޕީން ވަނީ ފާޑުކިޔައިފައެވެ. އެމަނިކުފާނު ވިދާޅުވެފައިވަނީ ބޭރުގެ ހަނގުރާމާތަކުގައި ބައިވެރިވުމަށް ސަރުކާރުން ދިވެހިން ނުފޮނުއްވާ ކަމަށެވެ. އެހެން ކަމުން އެކަމަށް ސަރުކާރުން ކުރާނެކަމެއް ނެތްކަމަށެވެ. އެފަދަ ޢަމަލު ހުއްޓޭނީ އެކަންކުރާ މީހުން އަމިއްލައަށް އެކަން ހުއްޓުމުން ކަމަށްވެސް ވިދާޅުވެފައިވެއެވެ. ރައީސް އެގޮތަށް ވިދާޅުވުމަކީވެސް އެމްޑީޕީން ކަންބޮޑުވާ ކަމެއް ކަމަށް ބަޔާނުގައި ބުނެފައިވެއެވެ.