އެމްޑީޕީގެ ކޮންގްރެސް ފަސްކޮށްފި
5 ޖޫން 2014 20:48
ރައީސް ނަޝީދު ވަނީ އެމްޑީޕީގެ ރައީސް ކަމަށް ކުރިމަތި ލައްވާނޭކަން އިޢުލާން ކުރައްވާފައި.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންރެސް ބާއްވާނެ ތަނެއް ނުލިބުމުގެ ސަބަބުން ކޮންގްރެސް ބޭއްވުން ފަސްކޮށްފިއެވެ.
ކުރިން ކޮންގްރެސް ބޭއްވުމަށް ހަމަޖެހިފައިވަނީ ހުކުރު ދުވަހުއެވެ. އަދި ކޮންގްރެސް ދެ ދުވަށް ދިގުދެމިގެން ދާނެކަމަށް އެމްޑީޕީން ބުނެފައިވެއެވެ.
"މިޖޫންމަހުގެ 6 އިން 7 އަށް ބޭއްވުމަށް ނިންމާފައިވާ މި ޕާޓީގެ ކޮންގްރެސް ބާއްވާނެ ތަނެއް ނުލިބުމުގެ ސަބަބުން ފަސްކުރެވިފައިވާ ވާހަކަ އާންމުކޮށް އަންގާ އިޢުލާނު ކުރީމެވެ. އަދި ކޮންގްރެސް ބާއްވާނެ ތާރީޚް ހަމަޖެހުމުން އާންމުކޮށް އަންގާ އިޢުލާނު ކުރެވޭނެއެވެ." މިކަމާ ގުޅިގެން އެމްޑީޕީ އޮފީހުން ނެރެފައިވާ ކުރު ބަޔާނެއްގައި ބުނެފައި ވެއެވެ.
މާލޭގައި ކޮންގްރެސް ބާއްވާނެ ތަނެއް ނުލިބި ކޮންގްރެސް ފަސްކުރަން ޖެހިފައިވާއިރު، މާލޭ ސިޓީކައުންސިލުގެ މެޖޯރިޓީ ވެސް އޮތީ އެމްޑީޕީ އަތުގައެވެ. ކޮންގްރެސް ކުރިމަތިވެފައިވާއިރު އެމްޑީޕީގެ ކުރީގެ ޗެއަރ ޕާސަން ރީކޯ މޫސާމަނިކު ވަނީ އެ ޕާޓީގެ ވަގުތީ ރައީސް އަދި ދިވެހިރާއްޖޭގެ ކުރީގެ ރައީސް މުހައްމަދު ނަޝީދަށް ފާޑު ވިދާޅުވެފައެވެ.
މޫސަ ވިދާޅުވެފައިވަނީ އެމްޑީޕީގެ އިންތިހާބުތަކުން ބަލިވުމުގެ ޒިންމާ އެނާ ނެގީ އެ ޒިންމާ ނަގާނެ އިތުރުމީހެއް ނެތިގެން ކަމަށެވެ. އެހެންނަމަވެސް ހުރިހާ އިންތިހާބެއް ވެސް ކުރިއަށް ދިޔައީ ރައީސް ނަޝީދުގެ ސީދާ ބެލުމުގެ ދަށުން ކަމަށް މޫސަ ވިދާޅުވެފައި ވެއެވެ.
ކިޔުންތެރިންގެ ހިޔާލު