މާބަނޑު އަންހެނަކު ވިއްސަން ޑޮކްޓަރުން ކަފާލިތަން ފަހަން މާލެ ގެނެސްފި

ކުޅުދުއްފުށީ ރީޖަނަލް ހޮސްޕިޓަލަށް ވިހަން ދިޔަ މާބަނޑު އަންހެނަކު ވިއްސަން ޑޮކްޓަރުން ކަފާލިތަން ފަހަން ނުކެރޭނެ ކަމަށް ބުނެ ރޭ މާލެ ގެނެސްފިއެވެ.

ވިހަން ދިޔަ އަންހެނަކީ ހދ. ނެއިކުރެންދޫ މީހެކެވެ. އޭނާގެ ޢުމުރަކީ 28 އަހަރެވެ. ނެއިކުރެންދޫ ކައުންސިލްގެ ރައީސް މުޙައްމަދު ޝިޒާން ވިދާޅުވީ އެއަންހެން މީހާ ވިހަން ކުޅުދުއްފުށި ހޮސްޕިޓަލަށް ގެންދިއުމުން އެއްވެސް ނުރައްކަލެއް ނެތް ކަމަށް ޑޮކްޓަރުން ބުނެފައިވާ ކަމަށެވެ.

ނަމަވެސް ފަހުން ބަނޑުގައި އޮތް ދަރިފުޅު ބޮޑުކަމަށް ބުނީ ވިއްސާ ކޮޓަރިއަށް ވެއްދުމަށްފަހު ކަމަށާއި، އަދި އެވަގުތު އޮޕަރޭޝަނަށް ދާންޖެހޭނަމަ، އެކަން ކުރުމަށް އާއިލާއިން ޑޮކްޓަރު ގާތު ބުނި ކަމަށް ޝިޒާން ވިދާޅުވިއެވެ. އެހެން ނަމަވެސް ހުރިހާ ކަމެއްވެސް ރަނގަޅު ކަމަށާއި، ކަންބޮޑު ނުވުމަށް ޑޮކްޓަރުން ބުނި ކަމަށް އޭނާ ވިދާޅުވިއެވެ.

ޝިޒާން ވިދާޅުވީ ދަރިފުޅު ބޮޑުކަމުން ވިހަން ދަތިވެގެން ކަފާލަންޖެހޭ ވަރަށް ވުރެ ބޮޑުކޮށް ޑޮކްޓަރުންނަށް ކަފާލެވިގެން ފަހަން ނުކެރިގެން 26 ގަޑި އިރުފަހުން ރޭ އޭނާ މާލެ ގެނެސްފައިވަނީ ހޮސްޕިޓަލުގެ ނަރުހަކާއެކު ހަނިމާދޫ މަގުން ކަމަށް އޭނާ ވިދާޅުވިއެވެ. އިއްޔެ 6:15 ގައި ވިހޭ އިރު، މާލެ ދާންޖެހޭނެ ކަމަށް ޑޮކްޓަރުން ބުނީ އޭގެ ކުރީރޭ 1:30 ގައި ކަމަށާއި، އޭރުވެސް މައިމީހާ އޮތީ އައިސީޔޫގައި ކަމަށް އޭނާ ވިދާޅުވިއެވެ.

ޝިޒާން ވިދާޅުވީ ފަހަން ކަމަށް ބުނެ އޮޕަރޭޝަން ތިއޭޓަރަށް ވެއްދުމަށްފަހު، މައިމީހާގެ ސިއްހީ ހާލަތު ދަށް ކަމަށާއި، އެގޮތުން ހިތުގެ މައްސަލަ ހުރުމާއި، އަދި އެހޮސްޕިޓަލުގައި އެތެރެހަށީގެ ޑޮކްޓަރަކު ނެތުމުން ހޭނައްތަން ނުކުރޭނެ ކަމަށް ޑޮކްޓަރުން ބުނި ކަމަށެވެ. ވިހޭ ދަރިފުޅުގެ ބަރުދަނުގައި 3 ކިލޯ 900 ގްރާމް ހުރި ކަމަށާއި ކުއްޖާގެ ޙާލު ރަނގަޅުކަމަށް ޝިޒާން ވިދާޅުވިއެވެ.