އެމްޑީޕީގެ ރައީސް ކަމަށް ނަޝީދު ކުރިމަތިލައްވަން ނިންމަވައިފި
4 ޖޫން 2014 15:21
ރައީސް ނަޝީދު
މިއަހަރު އޯގަސްޓްމަހު 29 ވަނަ ދުވަހު ބާއްވާ އެމްޑީޕީގެ ރައީސާއި، ޗެއާޕާސަން ހޮވުމުގެ އިންތިޚާބުގައި ވާދަ ކުރައްވާނެ ކަމަށް އެޕާޓީގެ ވަގުތީ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިމަގާމަށް ކުރިމަތި ލައްވާނެކަން ހާމަކުރައްވާފައިވަނީ މިއަދު ކުރައްވާފައިވާ ޓްވީޓެއްގައެވެ. "އަޅުގަނޑު އެމްޑީޕީގެ ރައީސް ކަމަށް ކުރިމަތިލުމަށް ނިންމައިފިން. ވީމާ މެމްބަރުން އަޅުގަނޑަށް ތާއީދު ކޮށްދެއްވުން ވަރަށް އެދެން؛" ޓްވީޓުގައި ވިދާޅުވެއްފައިވެއެވެ.
އޯގަސްޓް މަހު 29 ވަނަ ދުވަހު ބާއްވާ އިންތިޚާބުގައި އެޕާޓީގެ ރައީސް ކަމަށާއި، ނާއިބް ރައީސް ކަމަށާއި، ޗެއާޕާސަން ނާއިބު (މާލީ) ކަމަށް ކުރިމަތި ލުމުގެ ފުރުސަތު މި މަހު 15 އިންފެށިގެން ހުޅުވައިލާނެ ކަމަށް އެމްޑީޕީ އިން ވަނީ ހާމަ ކުރައްވާފައެވެ.
އެޕާޓީގެ ޗެއާޕާސަނަކަށް އެންމެފަހުން ހުންނެވި މޫސާ މަނިކު އެމަގާމުން އިސްތިއުފާ ދެއްވީ އެންމެފަހުން ރާއްޖޭގައި ބޭއްވި އިންތިޚާބުތަކުން ނާކާމިޔާބު ވުމުން އެކަމުގެ ޒިންމާ އުފުއްލެވުމުގެ ގޮތުންނެވެ.
ކިޔުންތެރިންގެ ހިޔާލު