އަންބަރާގައި ފުލުހުން ޢަމަލުކުރިގޮތް ތަހުގީގު ކުރުމަށް ގޮވައިލައިފި

އަންބަރާގައި "ޕާޓީ ކުރި" މީހުންނަށް ފުލުހުންގެ ފަރާތުން ފެނުނު އަނިޔާވެރިކަން ތަހުގީގުކުރުމަށް އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާއެއް ކަމަށްވާ އެމްނެސްޓީ އިންޓަރނޭޝަނަލުން ދިވެހި ސަރުކާރަށް ގޮވާލައިފި އެވެ.

އެމްނެސްޓީ އިންޓަނޭޝަނަލުން ނެރުނު ބަޔާނުގައި ބުނެފައިވަނީ، އަންބަރާގައި ބޭއްވި މިއުޒިކް ފެސްޓިވަލުގެ ތެރެއަށް ފުލުހުން ވަދެފައިވަނީ އެތަނުގައި މަސްތުވާ ތަކެތި ބޭނުންކުރާ ކަމުގެ ތުހުމަތު ކުރެވިގެން ކަމުގައިވިއަސް، ފުލުހުން މަސައްކަތް ކޮށްފައިވަނީ މަސުތުވާތަކެތި ހޯދުމުގެ ބަދަލުގައި އެހެން މަސައްކަތްތައް ކުރުމުގައި ކަމަށެވެ.

އެގޮތުން އެތަނުގައި ތިބި އަންހެންކުދިން ފުލުހުން ބޭނުންވާގޮތަށް ހެދުން ލެއްވުމަށް މަސައްކަތްކުރި ކަމަށް އެ ޖަމިއްޔާއިން ބުނެފައިވެއެވެ. އޭޕްރީލް މަހުގެ 29 ވަނަ ދުވަހު އަންބަރާގައި ޕާޓީކޮށް މަސްތުވާތަކެތި ބޭނުންކޮށް އޭގެ ވިޔަފާރި ކުރިކަމުގެ ތުހުމަތުގައި ފުލުހުން 79 މީހަކު ހައްޔަރުކުރިއެވެ.

އެޖަމިއްޔާއިން ބުނެފައިވަނީ މަސްތުވާތަކެތި ބޭނުންކޮށް އަތުގައި އެ ބެހެއްޓިކަމުގެ ތުހުމަތުގައި އެމީހުން ބަންދުކުރިނަމަވެސް އެކަމަށް އެކަށީގެންވާ ހެކި ފުލުހުންނަށް ދެއްކިފައި ނުވާކަމަށެވެ. އޭގެ އިތުރަށް އެމީހުން ބަންދުކޮށްގެން ގެންދިޔައިރު އެމީހުންގެ މައްޗަށް ކުރެވޭ ތުހުމަތަކީ ކޮބައިކަން ކިޔައިދީފައި ނުވާކަމަށް ވެސް އެމްނެސްޓީން ބުނެއެވެ. ހައްޔަރުކުރި މީހުން ފުލުހުންގެ ބަންދުގައި ތިބިއިރު އެމީހުންނާމެދު ފުލުހުން އަމަލު ކޮށްފައިވަނީ އެންމެ އެކަށީގެންވާ ގޮތަށް ނޫންކަމަށް ބަޔާނުގައި ބުނެފައިވެއެވެ. ބަޔާނުގައި ބުނެފައިވަނީ އެ މައްސަލައިގައި ހައްޔަރުކުރި މީހުނަށް އަނގަބަހުން "ގޯނާ" ކުރުމުގެ އިތުރަށް، ޖިންސީ ގޯނާ ވެސް ކޮށްފައިވާކަށެވެ. ބިންމައްޗަށް ވައްޓާލުމާއި، ބިޑިއަޅުވާފައި ބަންޑުން ބޭއްވުންފަދަ އަނިޔާ ކޮށްފައިވާކަމަށް ވެސް އެ ރިޕޯޓުގައި ބުނެފައިވެއެވެ.

ޕާޓީކުރި މީހުންގެ ބައެއް ތަކެތި ފުލުހުން އަތުލުމަށްފަހު އަލުން ހަވާލު ނުކުރާ ކަމަށްވެސް އެމްނެސްޓީގެ ބަޔާނުގައި ބުނެފައިވެއެވެ. ފުލުހުން ވަނީ އެމީހުންގެ އެއްވެ އުޅުމުގެ މިނިވަންކަމާއި، ހިޔާލު ފާޅުކުރުމުގެ މިންވަންކަމަށް ހުރަސްއަޅާފައިކަމަށް ވެސް އެ ޖަމިއްޔާއިން ތުހުމަތުކޮށްފައިވެއެވެ.

މި ބަޔާނާ ގުޅިގެން ފުލުހުން ބުނެފައިވަނީ އަންބަރާގެ އޮޕަރޭޝަނާ ގުޅިގެން މިހާތަނަށް އެއްވެސް ފަރާތަކުން އެއްވެސް ކަހަލަ ޝަކުވާއެއް އައިސްފައި ނުވާކަމަށެވެ. "ޕޮލިސް އިންޓަރގްރިޓީ ކޮމިޝަނުންވެސް އަދި ރާއްޖޭގެ ހިޔުމަން ރައިޓުސް ކޮމިޝަނުންވެސް އެއްވެސް ޝަކުވާއެއް އައިސްފައެއްނެތް. ދެން ހެކިހުރި ވާހަކައާއި ނެތް ވާހަކަ ދައްކާނީ ޝަރިޢަތުގެ މަޖިލީހުގައި" ފުލުހުންގެ އިސްބޭފުޅަކު ވިދާޅުވިއެވެ.

ފުލުހުން ކުރިންވެސް ބުނެފައިވަނީ މިއޮޕަރޭޝަނުގައި ފުލުހުން ޢަމަލު ކޮށްފައިވަނީ ޤާނޫނާއި ޤަވާޢިދާ އެއްގޮތަށް ކަމަށެވެ.

އަންބަރާގައި "ޕާޓީކުރަނިކޮށް" ހައްޔަރުކުރި 79 މީހުންގެތެރެއިން 19 މީހުންނަކީ އަންހެނުންނެވެ. އޭގެތެރޭގައި 17 އަހަރުގެ ކުޑަ އަންހެންކުއްޖަކު ވެސް ހިމެނެއެވެ. މި މައްސަލައިގައި ހޯމް މިނިސްޓަރ އުމަރު ނަސީރު ވިދާޅުވެފައިވަނީ ޕާޓީކުރިއަސް މަސްތުވާތަކެތި ބޭނުން ކުރުމަށް ހުއްދަނުދޭނެ ކަމަށެވެ.