ގައުމަށް ޣައްދާރުވި ކޮންމެ ފަރުދެއްގެ ކިބައިން މުސީބާތްތައް ވަނީ ޖެހިފައި: ހޯމް މިނިސްޓަރ
31 މޭ 2014 22:13
މިނިސްޓަރ ޢުމަރު
ޝަހީދުންގެ ދުވަހުގެ ފިލާވަޅަކީ މިޤައުމަށް (ދިވެހިރާއްޖެއަށް) ޣަދަރުވެރިވި ކޮންމެ މީހެއްގެ ފަރާތުން ވެސް މިޤައުމަށް ބޮޑެތި މުސީބާތްތައް ޖެހިފައިވާކަމުގެ ފިލާވަޅު ކަމަށް ހޯމް މިނިސްޓަރ ޢުމަރު ނަސީރު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޝަހީދުންގެ ދުވަސް ފާހަގަ ކުރުމަށް މިއަދު ހަވީރު އޮލިމްޕަހުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
"ޝަހީދުންގެ ދުވަހުގެ ފިލާވަޅަކީ މިޤައުމަށް ޣައްދާރުވެއްޖެ ކޮންމެ ފަރުދެއްގެ ކިބައިން މިޤައުމަށް ބޮޑެތި މުސީބާތްތައް ޖެހިފައިވާ ކަމުގެ ފިލާވަޅު. އެތައް އަޚުންނެއް އުޚުތުންގެ ލޭ އޮހޮރެވި އެތައް މުދަލެއް ސުންނާފަތިވެފައިވާ ކަމުގެ ޙަގީގަތް. ހަމައެހެންމެ މިޤައުމު ސަލާމަތް ކުރުމުގައި ޤައުމަށް ވަފާތެރި ދިވެހިން ކޮންމެ ޒަމާނެއްގައިވެސް އެމީހުންގެ ޖާނާއި މާލުން ޤުރުބާންވެފައިވާކަން،" މިނިސްޓަރ ޢުމަރު ވިދާޅުވިއެވެ. އަދުގެ ދަރީންވެސް އެފަދަ އިޚްލާސްތެރި ދަރިއަކަށް ވުމަށް އެމަނުކުފާނު ގޮވައިލެއްވިއެވެ.
ޝަހީދުންގެ ދުވަސް ފާހަގަކުރަމުންދާއިރު އެދުވަސް ބުނާ ވާހަކަތަކެއްވެސް އެބަހުރި ކަމަށް އެމަނކުފާނު ވިދާޅުވިއެވެ. އެދުވަސްދޭ ނަސޭޙަތްތަކެއްވެސް އެބަހުރިކަމަށް އެމަނިކުފާނު ވިދާޅުވިއެވެ. "ޝަހީދުންގެ ދުވަސް އަޅުގަނޑުމެންނަށް ހަނދާންކޮށްދޭ ހަނދާންކޮށްދިނުންތަކެއް، އަގުހުރި ފިލާވަޅުތަކެއް އެބަހުރި. ޝަހީދުންގެ ދުވަސް އަޅުގަނޑުމެނަށް ދޭ ނަސޭހަތަކީ މާތްވެގެންވާ އިސްލާމްދީން ނޫން ހިޔާވަހިކަމެއް، އިލާހީ އިމާޔަތްތެރިކަންނޫން އިމާޔަތްތެރި ކަމެއް އަޅުގަނޑުމެނަކަށް ނެތޭ،" ޢުމަރު ވިދާޅުވިއެވެ.
ޢުމަރު ވިދާޅުވީ ދުނިޔޭގެ ތާރީޚަށް ބާލާއިރު މިނިވަން ކަމާއެކު ތިބި ބައެއް ގައުމުތަކަކީ "ދުނިޔެއާއި ނުބައްދަލު އަސްކަރީ ބޮޑެތި ބާރުތައް" ކަމަށެވެ. މިނިވަންކަންމަތީ ތިބުމަށް އެފަދަ ޤައުމުތަކުން އެބާރުގެ ބޭނުން ކުރަމުންއަންނަ ކަމަށްވެސް ވިދާޅުވިއެވެ. "މިނިވަންކަން މަތީ ދެމިތިބުމަށްޓަކައި އެމީހުން ކެނޑިނޭޅި އެ ބާރުތައް ބޭނުންކުރޭ. އެމީހުނަށްވުރެ ބާރުގަދަ ބަޔަކު ގާތުގައިވެސް ދުރުގައިވެސް އުފެދުނަ ނުދިނުމަށްޓަކައި ބައެއް ފަހަރު ބައެއް ޤައުމުތައް ސުންނާފަތިވެސްކުރޭ،" އެމަނިކުފާނު ވިދާޅުވިއެވެ.
މިނިސްޓަރ ވިދާޅުވީ މިނިވަން ކަމާއެކު ރާއްޖެއަށް ދެމިއޮތުމުގެ އަސްލަކީ މާތްވެގެންވާ އިސްްލާމްދީން ކަމަށެވެ. "މިނިވަންކަމުގެ ހަޤީޤީ ސިއްރަކީވެސް އިސްލާމް ދީން" ކަމަށް އެމަނިކުފާނު ވިދާޅުވިއެވެ. މިނިވަންކަންމަތީ ރާއްޖެ އަދާހަމަށް ދެމިއޮތުމަށް އިސްލާމްދީން ނޫން އެހެން ސަބަބެއްނެތް ކަމަށްވެސް ވިދާޅުވިއެވެ.
އެމަނިކުފާނު ވިދާޅުވީ 1988 ވަނައަހަރު ނޮވެމްބަރ މަހު 3 ވަނަ ދުވަހު ރާއްޖެއަށް ދިމާވި ޢުދުވާނީ ޙަމަލާއިން ރާއްޖެ ސަލާމަތްވީވެސް ﷲގެ ރަޙުމަތެއް ކަމަށެވެ. އެހެންކަމުން އިސްލާމްދީން މަތީގައި ސާބިތުކަމާއެކު ތިބުމަށްވެސް އެމަނިކުފާނު ގޮވައިލެއްވިއެވެ.
ޢުމަރު ވިދާޅުވީ ލޮލަށް ނުފެންނަ ހަތިޔާރުގެ ބޭނުންކޮށްގެން މިހާރުވެސް ރާއްޖެއަށް ޙަމަލާ ދެމުން ގެންދާ ކަމަށެވެ. އެއީ ވިސްނުމާއި، ޤައުމާމެދު ދެކޭ ގޮތާއި، އިސްލާމީ އަޤީދާއާ ކުޅުމަށް ކުރާ ފިކުރީ ހަނގުރާމަ ކަމަށްވެސް ވިދާޅުވިއެވެ.
މިކަންކަމަކީ ހުރިހާ ރައްޔިތުންވެސް ވަރަށް ބޮޑަށް ސިކުނޑު ހުޅުވައި އެކަންކަމުން ސަލާމަތްވުމަށް މަސައްކަތްކުރަން ޖެހޭކަންކަން ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު