ޓްރާންސްޕޯޓް މިނިސްޓަރ މަޤާމުން ވަކިކުރައްވައިފި
29 މޭ 2014 2:15
އަމީން އިބްރާހީމް
މިނިސްޓަރ އޮފް ޓްރާންސްޕޯޓް އެންޑް ކޮމިއުނިކޭޝަން ކަމުގެ މަޤާމުން އަމީން އިބްރާހީމް މިއަދު ވަކިކުރައްވައިފި ކަމަށް ރައީސް އޮފީހުން ހާމަކުރައްވައިފިއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް، މިނިސްޓަރު ކަމުން އަމީން އިބްރާހީމް، ވަކިކުރެއްވި ސަބަބެއް ހާމަ ކުރައްވާފައެއް ނުވެއެވެ. ނަމަވެސް ޖުމްހޫރީޕާޓީގެ ކެންޑިޑޭޓަކު ރައްޔިތުންގެ މަޖިލީހުގެ ރައީސް ކަމަށް ވާދަކުރައްވައިފިނަމަ ކޯލިޝަން ރޫޅާލައި ޖުމްހޫރީޕާޓީގެ ސްލޮޓްތަކުގައި ތިބި ވަޒީރުން މަޤާމްތަކުން ވަކިކުރަން ރައީސް ޔާމީނަށް ދަންނަވަން ކޯލިޝަންގެ މައިޕާޓީ ޕީޕީއެމްއިންވަނީ ކުރިން ފާސްކޮށް އެކަން އަންގާފައެވެ.
އަމީން އިބްރާހީމް ހުންނެވީ ޖުމްހޫރީ ޕާޓީގެ ސްލޮޓެއްގައެވެ. އިއްޔެއިން ފެށިގެން އަމީނާއި، އެމިނިސްޓްރީގެ ސްޓޭޓު މިނިސްޓަރ ޒުބައިރާއި، ޑެޕިޔުޓީ މިނިސްޓަރ އިކްރާމް ގޭގައި މަޑުކުރުމަށް ރައީސް ޔާމީން ވަނީ އަންގަވައިފައެވެ. ނަމަވެސް އަމީން ވަކި ކުރެއްވިކަން އެންގެވީ މިއަދުއެވެ.
އަމީން އިބްރާހީމް މިނިސްޓަރު ކަމުން ވަކިކުރައްވައި، ރައީސުލްޖުމްހޫރިއްޔާ ފޮނުއްވި ސިޓީފުޅުގައި، އެ މަޤާމުގައި ހުންނަވައިގެން ކޮށްދެއްވާފައިވާ ޚިދްމަތްތަކަށް، ވަރަށް އިޚްލާޞްތެރި ކަމާއެކު ޝުކުރު އަދާކުރައްވާ ކަމަށް ވިދާޅުވެފައިވެއެވެ. ރައީސް ޔާމީންގެ ސަރުކާރުގައި ރައްޔިތުންނަށް ޚިދުމަތް ކޮށްދެއްވުމުގެ ފުރުސަތު ދެއްވީތީ އަމީންވަނީ ރައީސް ޔާމީނަށް ޝުކުރު ދަންނަވައިފައެވެ.
ރައިސް އޮފީހުގެ ތަރުޖަމާނު އިބްރާހީމް މުޢާޒު ވިދާޅުވީ މިއީ ކޯލީޝަން ރޫޅުމަށްފަހު ޕީޕީއެމުން ރައީސަށް ފޮނުވާފައިވާ ބަޔާނަކާ ގުޅިގެން ނިންމަވަމުން ގެންދަވާ ނިންމެވުންތަކެއް ކަމަށެވެ. ނަަމަވެސް އިތުރު ވަޒީރަކު މަގާމުން ވަކިކުރައްވާނެތޯ ނޫންތޯ އެނގިވަޑައި ނުގަންނަވާ ކަމަށް އޭނާ ވިދާޅުވިއެވެ. "އެފަދަ ކަމެއް ހިނގައިފިއްޔާ މީޑިއާއަށް އަންގާނަން" މުޢާޒު ވިދާޅުވިއެވެ.
މަޢުލޫމާތު ލިބިފައިވާ ގޮތުގައި ޖޭޕީއަށްދީފައިވާ 33 ސްލޮޓުގެ ތެރެއިން މިރޭގެ ލިޔަލަށް 9 މީހުންވަނި މަޤާމުން ވަކިކޮށްފައެވެ.
ކިޔުންތެރިންގެ ހިޔާލު