ޤާސިމަށް ވޯޓްދިނީ ގަބޫލު ކުރެވޭ ސިފަތަކެއް ހުރުމުން- ރީކޯ މޫސަ

ނަވާރަވަނަ ރައްޔިތުންގެ މަޖިލީހުގެ ރައީސް ކަމަށް އިންތިޚާބު ކުރުމަށް، ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމަށް އެމްޑީޕީން ވޯޓް ދިނީ އެޕާޓީން ގަބޫލުކުރާ ސިފަތަކެއް ޤާސިމްގެ ކިބައިގައި ހުރުމުން ކަމަށް މަޖިލީހުގެ ނާއިބު ރައީސް ކަމަށް އިންތިޚާބުވެ ވަޑައިގެންފައިވާ ހުޅުހެންވޭރު ދާއިރާގެ މެންބަރ މޫސާ މަނިކު ވިދާޅުވެއްޖެއެވެ.

މޫސަ މިހެން ވިދާޅުވީ އެމްޑީޕީގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

މޫސަ ވިދާޅުވީ މަޖިލީހުގެ ރައީސަކަށް ޤާސިމް، އަދި ނާއިބަކަށް އޭނާ އިންތިޚާބު ކުރުމަށް އެމްޑީޕީން ނިންމިއިރު، ޤާާސިމަށް ތާއީދުކުރަން ނިންމާފައިވަނީ ޤާސިމާ މެދު ގަބޫލުކުރެވޭ ސިފަތަކެއް ހުރުމުން ކަމަށެވެ. ނަމަވެސް އެ އެއްބަސްވުމަކީ ކުރިން ހަދާފައިވާ އެއްބަސްވުމެއްގެ ދަށުން ހިނގައިދިޔަ ކަމެއް ނޫންކަމަށް މޫސަ ވިދާޅުވިއެވެ.

އަދި ޤާސިމަށް އެމްޑީޕީން ވޯޓް ދިނުމަކީ ޖޭޕީ ކޯލިޝަނުން ވަކިކުރަންޖެހޭ ސަބަބެއް ނޫންކަމަށާއި، ވޯޓްދިނުމާއި ކޯލިޝަން އެއީ އަދި ދެކަމެއް ކަމަށް ވެސް އޭނާ ވިދާޅުވިއެވެ. މޫސަ މިހެން ވިދާޅުވި ނަމަވެސް ޖޭޕީން އިއްޔެ ނެރުނު ނޫސްބަޔާނެއްގައި ބުނެފައިވަނީ މަޖިލީހުގެ ރައީސާއި ނާއިބު ރައީސް އިންތިޚާބު ކޮށްފައިވަނީ އެމްޑީޕީ އާއި ޕީޕީއެމް ގުޅިގެން ކަމަށެވެ.

މީގެއިތުރަށް މޫސަ ވިދާޅުވީ މަޖިލީހުގެ ރައީސާއި ނާއިބު ރައީސް ހޮވުމަށް މަޖިލީހުގައި ނެގުނު ސިއްރު ވޯޓުގެ ނަތީޖާ އިން، މަޖިލީހުގައި ބަޔަކު ބޭނުން ގޮތަކަށް ކަންތައްތައް ނިންމަން ސާފު އަޣްލަބިއްޔަތު ނެތްކަން ހާމަވެއްޖެ ކަމަށެވެ. އެގޮތުން ޕީޕީއެމްގެ ނާއިބު ރައީސް އަދި ފޮނަދޫ ދާއިރާގެ މެންބަރ ޢަބްދުއްރަހީމް ޢަބްދުﷲ އާއި ވާދަކުރައްވައިގެން އެމްޑީޕީއަށް ކުރި ލިބުމަކީ އެކަމުގެ ހެއްކެތް ކަމަށް މޫސަ ވިދާޅުވިއެވެ.

އޭނާ ވިދާޅުވީ މަޖިލީހުގެ ތެރޭގައި ހަމައާއި އުސޫލުން ބޭރުން ހިތުހުރި ގޮތަކަށް ކަންކަން ކުރަން އެއްވެސް ބަޔަކަށް ފުރުސަތު ނުދެއްވާނެ ކަމަށެވެ.

މޫސަ ވިދާޅުވީ މަގާމުގެ މަސްއޫލިއްޔަތު އަދާކުރުމުގައި މަސައްކަތް ކުރައްވާނީ ގާނޫނާއި ގަވާއިދާއި އެއްގޮތަށް އިޚުލާސްތެރިކަމާއެކު ކަމަށެވެ. އަދި މަސްއޫލިއްޔަތު އަދާކުރެއްވުމުގައި ވަކި ފަރާތަކަށް ބުރަ ނުވާނެ ކަމަށާއި، އެކަން މަޖިލީހުގެ ރައީސް ޢަބްދުﷲ މަސީޙަށް ވެސް ދަންނަވާފައިވާނެ ކަމަށް އޭނާ ވިދާޅުވިއެވެ.