އެކައުންޓުތަކަށް ފައިސާފޮނުވާއިރު ނަގަމުންއައި ފީ ނުނަގާގޮތަށް ނިންމައިފި
28 މޭ 2014 16:53
ބީއެމްއެލްގެ އޭޓީއެމް މެޝިނަކުން ކަސްޓަމަރަކު ފައިސާ ނަގަނީ
ބޭންކްއޮފް މޯލްޑިވްސް (ބީއެމްއެލް) ގެ އެއްބުރާންޗުގެ އެކައުންޓުން އަނެއް ބުރާންޗުގެ އެކައުންޓަށް ފައިސާ ފޮނުވުމުގެ ޚިދުމަތް ދެމުންދާއިރު ކުރިން ނަގަމުންދިޔަ ފީ ނުނަގާ ގޮތަށް އެބޭންކުން މިއަދު ނިންމަފައިފިއެވެ.
ބީއެމްއެލްއިން މިއަދު ނެރެފައިވާ ބަޔާނެއްގައި އެބޭންކުގެ ސީއީއޯ އެންޑްރޫ ހީލީ ވިދާޅުވެފައިވަނީ މިކަން މިގޮތަށް ކުރެއްވީ ކަސްޓަމަރުންގެ ހިތްހަމަ ނުޖެހުން ތަކެއްވެސް ހުރުމުންނެވެ.
ރަށުގައިތިބި އާއިލާގެ މީހުންނަށްވެސް އެއްވެސް އަގަކާ ނުލައި ފައިސާ ފޮނުވޭނެގޮތް ކުރިއަށްއޮތްތަނުގައި ހަމަޖައްސަވާނެ ކަމަށްވެސް އޭނާ ވިދާޅުވެފައިވެއެވެ. އެޚިދުމަތް ތަޢާރަފް ކުރުމުން ވިޔަފާރީގެ ޚަރަދުވެސް ކުޑަވާނެ ކަމަށް އޭނާ ވިދާޅުވެފައިވެއެވެ.
މިޚިދުމަތް ދިނުމަށް ކުރިން ނަގަމުންއައި ފީއަކީ ފޮނުވާ ފައިސާގެ މިންވަރަށް ބަލައި 25 ރުފިޔާއިން ފެށިގެން 3000 ރުފިޔާއާ ދެެމެދުގެ އަގެއްކަމަށްވެސް އެބަޔާނުގައި ވެއެވެ.
މިޚިދުމަތް ތަޢާރަފް ކޮށްފައިވަނީ ބީއެމްއެލްއިން ރާއްޖޭގައި ހިންގާ ބްރާންޗު ތަކުގައި އެކަންޏެވެ.
ބޭންކުން ވަނީ އޭޓީއެމް މެދުވެރިކޮށް ފައިސާ ނަގާ ކަސްޓަމަރުންށް އިއްޔެއިން ފެށިގެން އެ ޚިދުމަތް ހިލޭ ދޭން ފަށައިފައެވެ.
ކިޔުންތެރިންގެ ހިޔާލު