ރައްޔިތުންގެ އައު މަޖިލީހުގެ މެންބަރުން ހުވައި ކުރައްވައިފި

ރާއްޖޭގެ 18 ވަނަ ރައްޔިތުންގެ މަޖިލީހުގެ މެންބަރު ކަމަށް އިންތިޚާބު ކޮށްފައިވާ 85 މެންބަރުން އެބޭފުޅުންގެ މެންބަރުކަމުގެ ޤާނޫނީ ހުވައި މިއަދު ކުރައްވައިފިއެވެ.

ރައްޔިތުންގެ މަޖިލީސްކުރައްވާގޭގައި މިއަދު ހެނދުނު 10.00 ގައި ބޭއްވި ރަސްމިއްޔާތުގަައި މިބޭފުޅުންނަށް މެންބަރުކަމުގެ ހުވައިލައިދެއްވީ ޤާނޫނޫ އަސާސީގެ 81 ވަނަ މާއްދާގައިވާ ގޮތުގެމަތީން ރާއްޖޭގެ އުއްތަމަ ފަނޑިޔާރު އަލްއުސްތާޒު އޮނަރަބްލް އަޙުމަދު ފާއިޒު ޙުސައިނެވެ.

އައު މަޖިލީހުގެ ފުރަތަމަ ޖަލްސާ އޮންނާނީ މިއަދު ހެނދުނު 11.00 ގައެވެ. މިޖަލްސާގައި އޮންނާނީ މަޖިލީހުގެ ރައީސާއި ނާއިބު ރައީސް ހޮވުމުމެވެ. މަޖިލީހުގެ ރައީސް ކަމަށް ވާދަކުރައްވަނީ ޕީޕީއެމްގެ ފަރާތުން ފުވައްމުލަކު ދެކުނު ދާއިރާގެ މެމްބަރު ޢަބްދުﷲ މަސީހުއެވެ. ޖުމްހޫރީޕާޓީ (ޖޭޕީ) އިން ވާދަކުރައްވަނީ އެ ޕާޓީގެ ލީޑަރ، މާމިގިލި ދާއިރާގެ މެމްބަރު ޤާސިމް އިބްރާހީމެވެ.ނާއިބު ރައީސް ކަމުގެ މަޤާމަށް ޕީޕީއެމްގެ ފަރާތުން ވާދަކުރައްވަނީ ފޮނަދޫ ދާއިރާގެ މެމްބަރު ޢަބްދުއްރަހީމް އަބްދުﷲ އެވެ. އެމްޑީއޭގެ ފަރާތުން އަޙުމަދު ޢާމިރު ވާދަ ކުރައްވައެވެ. އަދި އެމްޑީޕީގެ ފަރާތުން އެ ޕާޓީގެ ކުރީގެ ޗެއާޕާސަން، ހުޅުހެންވޭރު ދާއިރާގެ މެމްބަރު މޫސާ މަނިކު ވަނީ މަޖިލީހުގެ ނާއިބު ރައީސް ކަމުގެ މަޤާމަށް ވާދަކުރެއްވުމަށް ނިންމަވާފައެވެ.

މަޖިލީހުގެ ރައީސާއި ނައިބު ރައީސް އިންތިޚާބުކުރުމަށް ބާއްވާ ޖަލްސާގެ ރިޔާސަތު ބަލަހައްޓަވާނީ، އެންމެ ދުވަސްވީ މެމްބަރުގެ ހައިސިއްޔަތުން ކަނޑިތީމު ދާއިރާގެ މެމްބަރު މުޙައްމަދު ޙުސައިނެވެ. މަޖިލީހުގެ ރައީސަކު ހޮވުމަށް ފަހު ނާއިބު ރައީސަކު އިންތިޚާބު ކުރުމުގެ ކަންތައް ކުރިއަށް ގެންދާނީ އައު ރައީސްގެ ރިޔާސަތުގެ ދަށުންނެވެ.