ދިވެހިސަރުކާރުގެ އެއްބާރުލުން އިންޑިއާއަށް ދެއްވާނެ ކަމުގެ ޔަޤީންކަަން ރައީސް ދެއްވައިފި
27 މޭ 2014 14:00
ބޮޑުވަޒީރު ނަރެންދުރަ މޯދީއާއި ރައީސް ޔާމީން: ފޮޓޯ ރައީސް އޮފީސް
ދިވެހިސަރުކާރުން ދެވެންހުރި ހުރިހައި އެއްބާރުލެއްވުމެއް، ދިވެހި ސަރުކާރުން އިންޑިއާއަށް ދެއްވާނެ ކަމުގެ ޔަޤީންކަން، އެގައުމުގެ ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު ދެއްވައިފިއެވެ.
ރައީސް ޔާމީން މިޔަގީންކަން ދެއްވީ ބޮޑުވަޒީރުގެ ރަސްމީ ގެކޮޅު، ހައިދަރުއާބާދު ހައުސްގައި މިއަދު ހެނދުނު ބޭއްވި ބައްދަލުވުމުގައެވެ.
މިބައްދަލުވުުމުގައި ރައީސް ޔާމީން ވިދާޅުވީ ބޮޑުވަޒީރު މޯދީގެ ޒަޢާމަތުގައި، ދެޤައުމުގެ މެދުގައިއޮތް ޒަމާންވީ ގުޅުން ވަރުގަދަވެ ދަމަހައްޓަވާނެ ކަމަށް ޔަޤީން ކުރައްވާ ކަމަށެވެ. އަދި ބައިނަލްއަޤްވާމީ މައިދާނުގައި، އިންޑިއާއިން އަދާކުރާ ލީޑަރޝިޕް، ރާއްޖެއިން ބަލައިގަންނަ ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، އަންނަ އަހަރަކީ ރާއްޖޭގެ މިނިވަންކަމަށް 50 އަހަރު ފުރޭ އަހަރުކަން ފާހަގަކުރައްވަމުން، އިންޑިއާއަކީ އެންމެ ފުރަތަމަވެސް ރާއްޖެއާ ޚާރިޖީ ގުޅުން ބަދަހިކުރި ޤައުމު ކަމުގައި ވިދާޅުވިއެވެ. އަދި އިންޑިއާ ސަރުކާރުގެ ފަރާތުން މިއަދާ ހަމައަށްވެސް ރާއްޖެއަށް ދެއްވަމުން ގެންދަވާފައިވާ އެއްބާރުލެއްވުން، ރައީސުލްޖުމްހޫރިއްޔާ ފާހަގަކުރައްވައި، އިންޑިއާ ސަރުކާރަށް ޝުކުރު އަދާކުރެއްވިއެވެ. ބޮޑުވަޒީރު މޯދީގެ ވާހަކަފުޅުގައި، އިންޑިއާއާއި ރާއްޖެއާ ދެޤައުމުގެ ދެމެދުގައި، މިވޭތުވެދިޔަ އަހަރުތަކުގެ ތެރޭގައި، ޚާއްޞަކޮށް، ރައީސް މައުމޫންގެ ޒަޢާމަތުގައި އުފެދިފައިވާ ގާތް ގުޅުން ފާހަގަކުރެއްވިއެވެ. އަދި މިގުޅުން، ކުރިއަށް އޮތް ތާނގައި އިޢާދަކުރެވިގެންދާނެ ކަމަށް ދެކެވަޑައިގަންނަވާ ކަމުގައިވެސް ވިދާޅުވިއެވެ.
މިބައްދަލުކުރެއްވުމުގައި، ސާކްގެ މުހިންމުކަމުގެ މައްޗަށްވެސް ދެބޭފުޅުން ވާހަކަފުޅު ދެއްކެވިއެވެ. މިރޮނގުން ރައީސުލްޖުމްހޫރިއްޔާ ވާހަކަފުޅު ދައްކަވަމުން، ބޮޑުވަޒީރު މޯދީ ހުވާކުރެއްވުމުގެ ރަސްމިއްޔާތަށް، ސާކްގެ ހުރިހާ ޤައުމުތަކުގެ އިސްވެރިންނަށް ދަޢުވަތު ދެއްވިކަން އެއީ، ބޮޑުވަޒީރު މޯދީ، ސާކްގެ ކަންތައްތަކަށް ދެއްވާ އަހަންމިއްޔަތު ވަރަށް ބޮޑަށް ފާހަގަވެގެންދާ ކަމެއް ކަމަށް ދެކެވަޑައިގަންނަވާ ކަމުގައި ވިދާޅުވިއެވެ.
ސާކްގެ ކުރިމަގާ ބެހޭގޮތުން ބޮޑުވަޒީރު މޯދީ ވާހަކަފުޅު ދައްކަވަމުން، ދޭދޭ ޤައުމުތަކުގެ މެދުގައި ހުރި މައްސަލަތަކަށްވުރެ، މިވަގުތު އިސްކަންދޭންޖެހެނީ، މި ސަރަޙައްދުގައި ބާރުހުރި ޖަމާޢަތަކަށް ސާކް ހެދުމުގެ މުހިންމުކަމުގެ މައްޗަށް ކަމުގައި ވިދާޅުވިއެވެ. ހަމައެހެންމެ، ޞިނާޢީ ދާއިރާތަކުގެ މަސައްކަތްތައް އިތުރަށް ފުޅާކޮށް، ޚާއްޞަ ގޮތެއްގައި، ދެމެހެއްޓެނިވި ހަކަތައިގެ ދާއިރާއާއި، ޖައްވު ހޫނުވުމާ ގުޅިގެން، ތިމާވެށްޓަށް ކުރާ ނޭދެވޭ އަސަރުތައްފަދަ މައްސަލަތަކުގައި، ސާކުން އިސްނަގައިގެން، އެކަންކަން ބައިނަލްއަޤްވާމީ މައިދާނުގެ ސަމާލުކަމަށް ގެނެސް، ބައިނަލްއަޤްވާމީ މުޖްތަމަޢުގައި ނަން ހިނގާ ޖަމާޢަތަކަށް ސާކް ހެދުމުގެ މުހިންމުކަމުގެ މައްޗަށްވެސް ރައީސުލްޖުމްހޫރިއްޔާއާއި ބޮޑުވަޒީރު މޯދީ ވާހަކަފުޅު ދެއްކެވިއެވެ.
ކިޔުންތެރިންގެ ހިޔާލު