ފުވައްމުލަކުގައި ފެންބޮޑުވުމުގެ މައްސަލަ ޙައްލުކުރަން ކުންފުންޏަކާ ޙަވާލުކޮށްފި
26 މޭ 2014 21:33
އެއްބަސްވުމުގައި ސޮއިކުރުމަށްފަހު މިނިސްޓަރ ޠާރިގު ވާހަކަފުޅު ދައްކަވަނީ: ފޮޓޯ މިނިސްޓްރީ
ފުވައްމުލަކު ކިޅިއާއި، ޗަސްބިން ސަރަޙައްދުގެ ފެންހިންދާ ނިޒާމު އިތުރަށްހަރުދަނާކުރުމުގެ އެއްބަސްވުމެއްގައި މިއަދު ސޮއިކޮށްފިއެވެ.
މިނިސްޓްރީ އޮފް އެންވަޔަރަންމަންޓް އެންޑް އެނަރޖީއިން މިއެއްބަސްވުން ވެފައިވަނީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނާއެކުގައެވެ.
މިއެއްބަސްވުމުގައި މިނިސްޓްރީގެ ފަރާތުން މިއަދުސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމެވެ. މޯލްޑިވްސް ރޯޑް ޑިވެލޮޕްމަންޓްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އިބްރާހީމް ނަޒީމެވެ. އެކުންފުންޏާ މިމައްސައްކަތް ޙަވާލު ކުރެއްވީ މިއަހަރުގެ ސެޕްޓެމްބަރ މަހު މަސައްކަތް ނިންމާ ގޮތަށެވެ. މިއީ 4.4 މިލިއަން ރުފިޔާގެ މަޝްރޫޢެކެވެ.
މިނިސްޓަރ ޠާރިޤު ވިދާޅުވީ މިއީ ޔޫރަޕިއަން ޔޫނިއަންގެ ހިލޭއެހީގައި އުފައްދާފައިވާ، ކްލައިމެޓްޗޭންޖް ޓްރަސްޓްފަންޑުން އެކުލަވާލެވިފައިވާ ވެޓްލޭންޑްކޮންޒަރވޭޝަންޕްރޮޖެކްޓުގެ ދަށުން ހިންގާ މަޝްރޫޢެއް ކަމަށެވެ. މި އެއްބަސްވުމުގެ ދަށުން ފުވައްމުލަކުގައި ފެންހިންދުމަށް ބޭނުންކުރާ ހަތަރުކާނުގެ ފެންވަރު ރަނގަޅުކޮށް ރިހެބިލިޓޭޓްކުރުމާ، ބަންޑާރަ ކިޅި އަދި ދަނޑިމަގި ކިޅީގެ "ހައިޑްރޯލިކް ކަނެކްޓިވިޓީ" އިތުރުކުރުމުގެ ގޮތުން ހަތަރު "ކަލްވަރޓް ސިސްޓަމް" ޤާއިމުކޮށް ކުރެވޭނެއެވެ. އަދި މިހާރު ފެންހިންދުމަށް ބޭނުންކުރާ 3 ކާނެއްގައި ފައިބަރގްލާސް ލޮކް ހަރުކުރުމުގެ މަސައްކަތް ކުރެވޭނެ ކަމަށްވެސް މިނިސްޓަރ ވިދާޅުވިއެވެ.
މޫސުމީ ގޮތުން ފުވައްމުލަކަށް ކުރިމަތިވަމުންދާ ފެންބޮޑުވުމުގެ މައްސަލައަށް ރަނގަޅުޙައްލެއް މިމަޝްރޫޢުގެ ސަބަބުން ލިބިގެންދާނެ ކަމަށްވެސް މިނިސްޓަރ ވިދާޅުވިއެވެ.
ކިޔުންތެރިންގެ ހިޔާލު