އިންތިޚާބު އޮބްޒާވް ކުރުމުގެ ފުރުސަތު އިތުރުކޮށްފި

އަންނަމަހު ބާއްވާ ރައްޔިތުންގެ މަޖިލީހުގެ އިންތިޚާބުގެ ވޯޓްލުމާއި، ގުނުމުގެ ކަންތައްތައް ކުރިއަށްދާ ގޮތް އޮބްޒާވް ކުރުމަށް އެދުމުގެ ފުރުސަތު އިލެކްޝަންސް ކޮމިޝަނުން އިތުރުކޮށްފިއެވެ.

އިލެކްޝަންސް ކޮމިޝަނުން ހާމަކުރައްވާފައިވާ ގޮތުގައި މިމުއްދަތު އިތުރުކޮށްފައިވަނީ ހޯމަދުވަހާ ހަމައަށެވެ. އިލެކްޝަންސް ކޮމިޝަނުން ހާމަކުރައްވާފައިވާ ގޮތުގައި މޮނިޓަރކުރުމުގެ ފުރުސަތު ދެއްވާނީ ރަޖިސްޓްރީކޮށްގެން ހިންގާ ނޫސް މަޖައްލާތަކާއި ޚަބަރުފަތުރާ އިދާރާތަކުގެ އިތުރަށް ބައިނަލްއަގްވާމީ މީޑިއާގައި މަސައްކަތްކުރާ މީހެއްކަން ކަށަވަރުވާ މީހުންނަށް ކަމަށެވެ.

އޮބްޒަރވްކުރުމަށް ފުރުސަތު ދެއްވާނީ ސިޔާސީ ޕާޓީތައް ފިޔަވައި މަދަނީ ޖަމާޢަތްތަކުން ނުވަތަ އަމިއްލަ ގޮތުން ހުށަހަޅާ މީހެއް ކަމަށްވާނަމަ އެއްވެސް ސިޔާސީ ސިޔާސީ ޕާޓީއެއްގެ ރަޖިސްޓްރީވެފައި ނުވާ މީހުންނަށް ކަމަށްވެސް އިލެކްޝަނުން ހާމަކުރެއްވިއެވެ. އިންތިޚާބުގައި ވޯޓްލުމާއި ވޯޓްގުނުމުގެ ކަންތައް މޮނިޓަރކުރުމާއި، އޮބްޒަރވް ކުރުމަށް އެދި ހުށަހަޅާ ފަރާތްތަކަށް ފާސްދޫކުރައްވާނީ ވޯޓްފޮށީގެ އަދަދަށްވުރެ 10 އިންސައްތަ އިތުރުނުވާ އަދަދަށް ކަމަށްވެސް އިލެކްޝަނުން ހާމަކުރައްވާފައިވެއެވެ.

ކެންޑިޑޭޓުންގެ މަންދޫބުންގެ ގޮތުގައި ކުރިމަތިލާން ބޭނުންވާ ފަރާތްތަކަށް އަންނަ ހުކުރު ދުވަހުން ފެށިގެން މިމަހުގެ 27 ވަނަ ދުވަހާ ހަމައަށް ހުޅުވާލައްވާނެ ކަމަށްވެސް އިލެކްޝަންސް ކޮމިޝަނުން ހާމަކުރައްވާފައިވެއެވެ. އަންނަ މާރޗްމަހުގެ 22 ވަނަ ދުވަހު ބޭއްވުމަށް ހަމަޖައްސަވާފައިވާ ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް 316 ކެންޑިޑޭޓުންވަނީ އިލެކްޝަންސް ކޮމިޝަނަށް ފޯމު ހުށަހަޅާފައެވެ.

މިފަހަރު އިންތިޚާބުގެ ވޯޓާސް ލިސްޓުގައި ވޯޓުދޭ މީހާގެ ފޮޓޯނުޖަހާ ގޮތަށް އެކޮމިޝަނުން ވަނީ ނިންމަވާފައެވެ.