މަރުގެ ހުކުމް ތަންފީޒު ކުރުމަށް ވާންޖެހޭ ތައްޔާރީތައް ވުމުގެ އަމުރު ހޯމްމިނިސްޓަރ ނެރެފި

ރާއްޖޭގައި މަރުގެ ހުކުމް ތަންފީޒު ކުރުމަށް ވާންޖެހޭ ތައްޔާރީތައް ވުމުގެ އަމުރު މޯލްޑިވްސް ކަރެކްޝަނަލް ސާވިސްގެ މައްޗަށް ހޯމްމިނިސްޓަރ އުމަރު ނަސީރު މިއަދު އަމުރު ކުރައްވައިފިއެވެ.

މިނިސްޓަރ އުމަރު ނަސީރު މޯލްޑިވްސް ކަރެކްޝަނަލް ސާވިސްގެ މައްޗަށް ކުރައްވައިފައިވާ އަމުރުގައި ވަނީ ދެތިންކަމެއް ފާހަގަ ކުރައްވާފައެވެ. އެއްކަމަކީ ރާއްޖޭގައި މަރުގެ ހުކުމް ތަންފީޒު ކުރާނީ ލީތަލް އިންޖެކްޝަން ބޭނުން ކޮށްގެންކަން އެނގުމެވެ. ދެވަނަ ކަމަކީ އެކަމަށް ބޭނުންވާ ސާމާނު ހޯދައި އެތަކެތި ރަނގަޅަށް ބެލެހެއްޓުމެވެ. ތިންވަނަ ކަމަކީ އެކަމަށް މީހުން ތަމްރީން ކުރުމެވެ.

ހޯމްމިނިސްޓަރ ނެރުއްވާފައިވާ އަމުރުގައި ވިދާޅުވެފައިވަނީ "ދިވެހިރާއްޖޭގެ ސްޕްރީމްކޯޓުން މީހަކު މެރުމަށް ނިޔާކަނޑައަޅައި ހުކުމްކޮށްފިނަމަ، އެހުކުމް ތަންފީޒު ކުރުމުގެ އެންމެހާ އިންތިޒާމްތައް ހަމަޖެއްސެވުމަށާއި، އަދި އެކަމަށް ބޭނުންވާނެ އެންމެހާ ވަސީލަތްތައް ހޯދައި އެވަސީލަތްތައް މާފުށީޖަލުގައި ގާއިމްކުރުމަށް މޯލްޑިވްސް ކަރެކްޝަނަލް ސާވިސްއަށް" އަމުރު ކުރައްވާ ކަމަށެވެ.

އުމަރު ވިދާޅުވީ މަރުގެ އަދަބު ތަންފީޒުކުރުމާ ބެހޭ ގާނޫނެއްގެ ދެލިކޮޕީއެއް ސަރުކާރުން ކުރިން ތައްޔާރުކޮށްފައިވާ ކަމަށެވެ. އެއާއެއްގޮތްވާ ގޮތުގެ މަތިން މިހާރު ގަވާއިދެއް އެކުލަވާލައްވާފައިވާ ކަމަށްވެސް ވިދާޅުވިއެވެ.

"އެހެންވީމާ އަޅުގަނޑުމެން މިގާއިމްކުރާ ޕްރޮސީޖާޔާ އަޅުގަނޑުމެންގެ ގަވައިދުތައް އޮންނާނީ ޑްރާފްޓް ކުރެވިފައި އޮތް ގާނޫނާ އެއްގޮތަށް،" އުމަރު ވިދާޅުވި އެވެ. މިގަވައިދު އެކުލަވާލުމުގެ މަސައްކަތަކީ މީގެ ކުރިންވެސް ކުރައްވާފައިވާ ކަމެކެވެ. އެޓާނީ ޖެނެރަލްގެ ފަރާތުން އެއަށް ކޮމެންޓްވެސްވަނީ ލިބިފައި ކަމަށް މިނިސްޓަރ ވިދާޅުވިއެވެ.

އުމަރު ވިދާޅުވީ މިހާރު އަމަލުކުރައްވާނީ މިހާރުއޮތް ގާނޫނަށް ކަމަށެވެ. އާގާނޫނެއް އައުމުން އެއަށް އަމަލުކުރައްވާނެ ކަމަށެވެ. "ގާނޫނެއް ފާސްވެގެން މަރުގެ އަދަބު ތަންފީޒު ކުރެވެން އަންނަންދެން އަޅުގަނޑުމެން މަޑެއް ނުކުރާނަން. ހޯމް މިނިސްޓަރަށް ލިބިގެންވާ އިހުތިޔާރެއް ހުކުމްތައް ތަންފީޒުކުރުމަކީ،" އުމަރު ވިދާޅުވިއެވެ.

އުމަރު ވިދާޅުވީ މަރުގެ ހުކުމް ތަންފީޒު ކުރާނީ ޝަރުއީ ހުރިހާ މަރުހަލާއެއް ނިންމުމަށްފަހުގައި ކަމަށެވެ. އެމަރުހަލާ ނިންމެވުމަށް ސަރުކާރުންވެސް މަސައްކަތް ކުރައްވާނެ ކަމަށް އެމަނިކުފާނު ވިދާޅުވިއެވެ.

ހޯމްމިނިސްޓަރު ކުރެއްވި މިއަމުރާ ބެހޭގޮތުން މޯލްޑިވްސް ކަރެކްޝަނަލް ސާވިސްގެ ކޮމިޝަނަރ އަޙުމަދު ޝިހާން ވިދާޅުވީ ހޯމްމިސްޓަރު ނެރުއްވި އަމުރަކީ މަރުގެ ހުކުމް ތަންފީޒު ކުރުމުގެ އަމުރެއް ނޫންކަމަށެވެ. އެއީ އެފަދަ ހުކުމެއް ތަންފީޒު ކުރުމަށް ވާންޖެހޭ ތައްޔާރީތައް ވުމަށް ކުރެއްވި އަމުރެއް ކަމަށެވެ. އެއަމުރު ތަންފީޒު ކުރުމަށްޓަކައި މާފުށީޖަލު އެފަދަ ކަމަކަށް އެކަށީގެންވާ ތަނަކަށް ބަދަލު ކުރަންޖެހޭ ކަމަށް އޭނާ ވިދާޅުވިއެވެ. އަދި އެކަމަށް ބޭނުންވާ ސާމާނުތައް ހޯދަންވެސް ޖެހޭކަމަށް ވިދާޅުވިއެވެ. އޭގެ އިތުރަށް އެތަކެތި ބެލެހެއްޓުމާއި، އެކަމަށް ބޭނުންވާ މީހުން ތަމްރީން ކުރުމަކީވެސް އެއަމުރުގެ ދަށުން ކުރަންޖެހޭ ކަމެއް ކަމަށް ޝިހާން ވިދާޅުވިއެވެ.

ހޯމްމިނިސްޓަރު ދެން ނެރުއްވާނެ އަމުރަކީ، މީހަކު މެރުމަށް ސްޕްރީމްކޯޓުން ހުކުމެއް ކުރައްވައިފިނަމަ ސީދާ އެމީހަކު މެރުމަށް މޯލްޑިވްސް ކަރެކްޝަނަލް ސާވިސްގެ މައްޗަށް ނެރޭއަމުރު ކަމަށްވެސް ވިދާޅުވިއެވެ. ޝިހާން ވިދާޅުވީ މަރުގެ ހުކުމް ތަންފީޒު ކުރާނެ ގޮތެއް ރާއްޖޭގައި ކަނޑައެޅިފައިނެތް ކަމަށެވެ. ނަމަވެސް ހޯމްމިނިސްޓަރުގެ އަމުރުގެ ތެރޭގައި އެކަން ކުރާނީ ލީތަލް އިންޖެކްޝަން ޖަހައިގެން ކަމަށް އެނގެން އެބައޮތް ކަމަށެވެ. އަދި އެކަންކުރާނީ މާފުށީޖަލުގައި ކަމަށްވެސް އެނގޭ ކަމަށެވެ.

މައުލޫމާތު ލިބިފައިވާ ގޮތުގައި މަރަން ހުކުމް ކޮށްފައިވާ އަށެއްކަ މީހުން ކަރެޝަނުގެ ބެލުމުގެ ދަށުގައި މިހާރުވެސް އެބަތިއްބެވެ.