ފުރަތަމަ ސަތޭކަ ދުވަސްތެރޭގައި ސިއްހީ ޚިދުމަތުގެ ހުޅުކޮޅު ދިއްލައިދޭނަން: ހެލްތު މިނިސްޓަރ

މިސަރުކާރުގެ ފުރަތަމަ 100 ދުވަސްތެރޭގައި ގަސްތު ކުރައްވަނީ ސިއްހީ ޚިދުމަތާއި އިޖުތިމާއީ ރައްކާތެރި ކަމުގެ އުންމީދުގެ ހުޅުކޮޅު ރައްޔިތުންނަށް ދިއްލާލަ ދެއްވުން ކަމަށް މިނިސްޓަރއޮފް ހެލްތު އެންޑް ޖެންޑަރ ޑރ. މަރިޔަމް ޝަކީލާ ވިދާޅުވެއްޖެއެވެ.

އެކަމަނާ މިހެން ވިދާޅުވީ ސަރުކާރުގެ ފުރަތަމަ 100 ދުވަސްތެރޭގައި ހާސލް ކުރުމަށް ބޭނުންވާ ލަނޑުދަނޑިތައް އިއުލާން ކުރެއްވުމަށް ނޭޝަނަލް އާޓްގެލެރީގައި ރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ.

"މިއަދުގެ ސަރުކާރުގެ ފުރަތަމަ ސަތޭކަ ދުވަހުގެ ލަނޑުދަނޑިތަކުން އަޅުގަނޑުމެން ގަސްތު ކުރަނީ ސިއްހީ ޚިދުމަތާއި އިޖުތިމާއީ ރައްކާތެރި ކަމުގެ އުންމީދުގެ ހުޅުކޮޅު މިގައުމުގެ ރައްޔިތުންނަށް ދިއްލާލަދިނުން. ކަންކަން ރަނގަޅުވާނެ ކަމުގެ ފެހިސިގުނަލް ދިނުން. އަދި ލުއިފަސޭކަން ރައްޔިތުންނާ ހަމައަށް ފޯރުކޮށްދިނުން،" މިނިސްޓަރ ޝަކީލާ ވިދާޅުވިއެވެ.

އެކަމަނާ ވިދާޅުވީ ސިއްހީ ޚިދުމަތާއި އިޖުތިމާއީ ރައްކާތެރި ކަމަކީ ފަރުދީ ހައިސިއްޔަތުން ބެލިކަމުގައިވިޔަސް ހަމަ ކޮންމެ ފަރުދަކަށްވެސް އެންމެ ޒަރޫރީ ބޭނުންތަކުގެ ތެރޭގައި ހިމެނޭ ޚިދުމަތްތަކެއް ކަމަށެވެ. އަދި އިންސާނާ ގަރުބަގަތީސްސުރެ ކަށްވަޅަށް ދާދެން އޭނާއަށް ހޭހަން ކުރާނެ އެންމެ މުހިންމު ޚިދުމަތްތަކަކީ ސިއްހީ ޚިދުމަތް ކަމަށެވެ.

"އަދި އޭނާގެ ދިރިއުޅުމުގެ ފެންވަރު ނުވަތަ ކޮލިޓީ އެންމެ މުހިންމު އެއްނާރެހަކީ ސިއްހަތާއި އިޖުތިމާއީ ރައްކާތެރިކަން. އިންސާނާގެ ތައުލީމާއި ތަމައްދުނާއި ތަރައްގީގެ މަގުގައި ކުރިއަރާ ދިޔުމުގެ ފުރަތަމަ ބިންގަލަކީވެސް ޖިސްމާނީ ގޮތުންނާއި ނަފްސާނީ ގޮތުން ދުޅަހެޔޮ މީހަކަށް މީހާވުން،" ކަމަށްވެސް ވިދާޅުވިއެވެ.

މިއީ ހަގީގަތް ކަމަށްވިޔަސް ރާއްޖޭގެ އިޖުތިމާއީ އަދި ސިއްހީ ރައްކާތެރިކަމުގެ މިންގަނޑު ދަށަށްގޮސްފައިވާ މިންވަރަކީ ދިވެހިން އެންމެ ކަންބޮޑުވާ އެއްކަންތައް ކަމަށްވެސް މިނިސްޓަ ވިދާޅުވިއެވެ. މިކަމަކީ ދިވެހިން އެންމެ ބޮޑުވޭނަކާއި ދަތިކަމެއް ތަހައްމަލް ކުރަމުންދާ އެއްދާއިރާ ކަމަށްވެސް ވިދާޅުވިއެވެ.

ސިއްހަތާ ބެހޭ ވަޒީރު ޑރ. ޝަކީލާ ވިދާޅުވީ ރާއްޖޭގެ އާބާދީ 200 ވަރަކަށް ރަށަކަށް ބެހިފައިވުމުގެ ސަބަބުން ސިއްހީ ޚިދުމަތް ފޯރުކޮށްދޭން ބޮޑެތި ގޮންޖެހުންތަކެއް ކުރިމަތިވެފައިވާ ކަމަށެވެ. އެގޮތުން ޑޮކްޓަރުން ހޯދުމަށްވެސް ވަރަށް ބޮޑެތި ގޮންޖެހުންތަކާ ކުރިމަތިލާން ޖެހޭ ކަމަށްވެސް ވިދާޅުވިއެވެ.

"އަޅުގަނޑުމެގެ އަވަށްޓެރި ގައުމުތަކުގައި ޑޮކްޓަރުންގެ މުސާރަތައް އިންތިހާއަށް ބޮޑުވެގެންދިޔައިރު ރާއްޖެއިން އެބަދަލު އެގޮތަށް އައިސްފައިނުވުމުގެ ސަބަބުން ރަނގަޅު ފެންވަރުގެ ޑޮކްޓަރުން ނުލިބުމުގެ މައްސަލަދަނީ ދުވަހެއް ދުވަހަކަށް ބޮޑުވަމުން. ހަމަ މިއާއެކު މިޚިދުމަތް ލިބެންހުންނަ ސަރަހައްދުތަކަށް ދަތުރުކުރުމަށް ހުންނަދަތިތަކާ ކުއްލިއަކަށްދިމާ ސިއްހީ ނުރައްކާތަކަށް ސިއްހީ ފަރުވާދޭ ތަންތަން ތައްޔާރުވެފައި ނުހުރުމާއި، އާންމުކޮށް ބޭނުންވާ މުހިންމު ބޭހާއި އެކަށީގެންވާ އާލާތާއި ވަސީލަތްތައް ރާއްޖެއިން ލިބެން ނުހުރުމަކީވެސް (ޑޮކްޓަރުން އަދި ލިބުނަސް) ޑޮކްޓަރުންގެ މަންފާ ރައްޔިތުންނަށް ލިބުމުގައި ވަރަށްބޮޑު ހުރަހެއް،" ކަމަށްވެސް އެކަމަނާ ވިދާޅުވިއެވެ.

ރާއްޖޭގައި ކެންސަރު ބައްޔާއި ކިޑްނީ ބަލިތައް ފަދަ ބަލިތައް ފަހަކަށް އައިސް އާންމު ވަމުންދާ ދިޔުމަކީވެސް ދިމާވެފައިވާ ވަރަށް ބޮޑު ގޮންޖެހުންތަކެއް ކަމަށްވެސް ޝަކީލާ ވިދާޅުވިއެވެ. މިފަދަ އެތައް ގޮންޖެހުންތަކެއް ސިއްހީ ޚިދުމަތް ދިނުމުގެ ދާއިރާއަށް ކުރިމަތިވެފައިވާ ކަމަށްވެސް ވިދާޅުވިއެވެ.

އެކަމަކު "މިސަރުކާރުގެ ފުރަތަމަ ސަތޭކަދުވަހު ރައްޔިތުންނަށް ސީދާ ގޮތެއްގައި ލުއިފަސޭކަމެއް ނުވަތަ ހަމަޖެހުމެއް އިހުސާސް ކުރެވޭނެ ފަދަ ކަންތައްތަކެއް ކުރެއްވުމަށް ކަނޑައަޅާފައިވޭ. މިގޮތުން ފާހަގަ ކޮށްލެވޭ އެއްކަމަކީ ކޮންމެ ރައްޔިތަކާއި އާއިލާއަކަށް ޒިންމާވާނެ ޑޮކްޓަރެއް ކަނޑައަޅާ ޕްރޮގްރާމް އިރާދަފުޅު ކުރެއްވިއްޔާ ކުރިއަށްއޮތް ސަތޭކަ ދުވަހުގެތެރޭގައި ފެށިގެންދާނެ،" ކަމަށްވެސް ހެލްތު މިނިސްޓަރ ވިދާޅުވިއެވެ.

މިކަންކަމުގެ އިތުރަށް ބަލިތަކުގެ ޚާއްސަ ޑޮކްޓަރުންގެ ޚިދުމަތް ހޯދުމުގެ މަގުވެސް އެމުއްދަތުގައި ފަހިކޮށްދެއްވާނެ ކަމަށް މިނިސްޓަރ ވިދާޅުވިއެވެ. "މީގެ އިތުރަށް ކިޑްނީ ބައްޔާއި، ކެންސަރު ބައްޔަށް ޚާއްސަކޮށްގެން ރަށްރަށުގައި ތިބެގެން ފަރުވާ ކުރެވޭނެ ގޮތުގެ މަތިން ބޭހާއި ސިއްހީ ލަފައާއި ޓެސްޓްތައް ހެދޭނެ މަގުވެސް ތަނަވަސްވެގެންދާނެ،" ސިއްހަތާ ބެހޭ ވަޒީރާ ވިދާޅުވިއެވެ.

އެކަމަނާ ވިދާޅުވީ އިންދިރާގާނދީ މެމޯރިއަލް ހޮސްޕިޓަލަށް މިހާރު ތޮއްޖެހުމުގެ މައްސަލަ ވަރަށް ބޮޑަށް ދިމާވެފައިވާ ކަމަށެވެ. އެހެން ކަމުން ޚިދުމަތް ލަސްވުމުގެ މައްސަލަވެސް ކުރިމަތިވެފައިވާ ކަމަށެވެ. އެކަންކަމަށް "ދާއިމީ ހައްލު ގެނައުމަށްޓަކައި އިންދިރާގާނދީ މެމޯރިއަލް ހޮސްޕިޓަލް ފިޔަވައި، ރަނގަޅު ފެންވަރުގެ ހޮސްޕިޓަލްތައް އުފެދެން އެބަޖެހޭ. މިގޮތުން ވިލިމާލޭ ސިއްހީމަރުކަޒު ހޮސްޕިޓަލެއްގެ ފެންވަރަށް ތަރައްގީ ކުރުމާއި، އަތޮޅުތެރޭގައިވާ ރީޖަނަލް ހޮސްޕިޓަލްތަކުގެ ޚިދުމަތް ފުޅާކުރުން މުހިންމު ލަނޑުދަނޑިތަކުގެ ތެރޭގައިވެސް ހިމެނޭ،" ކަމަށްވެސް ވިދާޅުވިއެވެ.