ޕީޖީ މުއިއްޒު އިސްތިއުފާ ދެއްވައިފި
25 ނޮވެމްބަރ 2013 19:28
ޕްރޮސެކިއުޓަރ ޖެނެރަލް (ޕީޖީ) އަލްއުސްތާޒު އަޙްމަދު މުޢިއްޒު، އެ މަޤާމުން މިއަދު އިސްތިއުފާ ދެއްވައިފިއެވެ.
އެމަނިކުފާނު މިއަދު އިސްތިއުފާ ދެއްވީ އެމަނިކުފާނުގެ މައްޗަށް ރައްޔިތުންގެ މަޖިލީހުގައި އިތުބާރުނެތް ކަމުގެ ވޯޓެއް ނަގަން ބަހުސްވެސް ކުރަމުން ދަނިކޮށްނެވެ. އެމްޑީޕީގެ މެންބަރުން ވިދާޅުވެފައިވަނީ އެމްޑީޕީގެ މެންބަރުންގެ ޖިނާއީ މައްސަލަ ޕީޖީ މާއަވަސް އަރުވާލައިގެން ޝަރިއަތަށް ފޮނުވަމުން ގެންދަވާ ކަމަށެވެ.
އެމަނިކުފާނުގެ މައްޗަށް އިތުބާރުނެތް ކަމުގެ މައްސަލަ އެމްޑީޕީން މަޖިލީހަށް ހުށަހެޅުމާއެކު މުޢިއްޒު މީޑިއާގައި ވިދާޅުވެފައިވަނީ އެމަނިކުފާނުގެ މައްޗަށް އިތުބާރުނެތް ކަމުގެ ވޯޓެއް ނެގުމުގެ ފުރުސަތު ނުދެއްވާނެ ކަމަށެވެ.
އެމަނިކުފާނުގެ އިސްތިޢުފާގެ ސިޓީ ރައީސުލްޖުމްހޫރިއްޔާއަށް މިއަދު ލިބިވަޑައިގެންފައިވާ ކަމަށް ރައީސް އޮފީހުންވަނީ ޔަގީން ކޮށްދެއްވާފައެވެ.
ޤާނޫނުއަސާސީގެ 226 ވަނަ މާއްދާގައި ވަނީ ޕްރޮސކިއުޓަރ ޖެނެރަލް އިސްތިޢުފާ ދޭން ބޭނުންވެއްޖެނަމަ، ސިޓީއަކުން އެކަން ބަޔާންކޮށް، ރައީސުލްޖުމްހޫރިއްޔާއަށް ހުށަހަޅައި، އެ ސިޓީ ރައީސުލްޖުމްހޫރިއްޔާއަށް ލިބުމުން، ޕްރޮސެކިއުޓަރ ޖެނެރަލް މަޤާމުން ވަކިވީ ކަމަށެވެ.
ކިޔުންތެރިންގެ ހިޔާލު