ދޯންޏެއްގައި ހުރި ރާފުޅިތަކެއް މަގަތުފާލަން ކައިރިއަށް އަޑިއަށް ހިނގައްޖެ

ހުޅުލޭގައި ހުންނަ ބޮންޑެޑް ވެއަރހައުސްއަށް ގެންދަން ދޯންޏަކަށް ރާ ބަރުކުރަމުން ދަނިކޮށް 153 ކޭސް ރާ (918 ފުޅި) މިއަދު ކަނޑަށް ވެއްޓި އަޑިއަށް ހިނގައްޖެއެވެ.

މޯލްޑިވްސް ކަސްޓަމްސް ސާވިސަސްއިން ހާމަކުރައްވާފައިވާ ގޮތުގައި ކަނޑަށް އެޅުނު ރާފުޅިތައް ނެގުމުގެ މަސައްކަތް އޭގެ ވެރިފަރާތާއި، ފުލުހުންނާއި، ކަސްޓަމްސް ގުޅިގެން ގެންދަނީ ކުރަމުންނެވެ. މިތަކެތި އަޑިއަށް ގޮސްފައިވާ މަގަތު ފާލަން ސަރަހައްދުގެ ފުންމިނަކީ 36 ފޫޓެވެ.

މާލޭ މަގަތު ފާލަން ކައިރިގައި އޮތް ދޯންޏަކަށް ރާބަރުކުރަމުންދަނިކޮށް ކަނޑަށް އެޅިފައިވަނީ އެވަގުތު ދޯންޏަށް ބަރުކޮށްފައިހުރި 3 ޕެލެޓް ރާގެ ތެރެއިން 2 ޕެލެޓް ރާ ކަމަށް ކަސްޓަމްސްސާރވިސްއިން ހާމަކުރައްވާފައި ވެއެވެ.

މިޝިޕްމަންޓުގައި ޖުމްލަ 408 ކޭސް ރާ ހުރި ކަމަށް ކަސްޓަމްސްއިން ހާމަކުރެއްވިއެވެ. މި ހާދިސާ ހިނގާފައިވަނީ ދޯންޏަށް މިތަކެތި ބަރުކުރަމުން ދަނިކޮށް ކައިރިންދިޔަ ޓަކެއްގެ ރާޅުގަނޑު އައިސް ރާބަރު ކުރަމުންދިޔަ ދޯނީގައި ޖެހިގެން ދޯންޏަށް އެރި ލޮޅުމަކުންނެވެ.

މިތަކެތި ލޮނުގަނޑުން މައްޗަށް އެރުން ނުވަތަ ލެއްގުމަކީ އެކަށީގެންވާ ކަމެއް ކަމަށްވެސް ކަސްޓަމްސްއިން ވަނީ ހާމަކުރައްވާފައެވެ. އެހެންކަމުން މާލޭ ކޮމާޝަލް ހާބަރު ހިމެނޭ ސަރަހައްދުން ރާފުޅިއެއް ނުވަތަ އެފަދަ އެއްޗެއް ފެނިއްޖެނަމަ އެކަން ލަސްނުކޮށް ކަސްޓަމްސްއަށް ނުވަތަ ފުލުހުންނަށް އެންގެވުމަށް ކަސްޓަމްސް ސާރވިސްއިން ވަނީ އިލްތިމާސް ކުރައްވާފައެވެ.

މިތަކެތި ގެނެސްފައިވަނީ ކޮންފަރާތަކުން ކަމެއް ކަސްޓަމްސްއިން ހާމައެއް ނުކުރައްވައެވެ.