ޑރ.އަފްރާސީމް އަވަހާރަކޮށްލި މައްސަލާގައި 4 މީހެއްގެ މައްޗަށް ދަޢުވާކުރުމަށް ފޮނުވައިފި

ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ. އަފްރާސީ ޢަލީ އަވަހާރަކޮށްލި މައްސަލާގައި އިތުރު 4 މީހެއްގެ މައްޗަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފި ކަމަށް ފުލުހުން ހާމަކުރައްވައިފިއެވެ.

މިހަތަރު މީހުންނަކީ ކ.މާލެ، ހ.ހިލްޓަން، އަޒުލީފް ރައޫފް (28އ) އާއި ކ.މާލެ، މ.ޖަރީމާގެ ޢަބްދުﷲ ޖާވިދު (36އ) އާއި ކ.މާލެ، މ.ޖަރީމާގެ، ޝާހިން މުޙައްމަދު (38އ) އަދި ލ.ގަން.ތުނޑި، ނޫއަލި، އާދަމް ޞަލާޙް (33އ) ކަމަށް ފުލުހުން ވަނީ ހާމަ ކުރައްވާފައެވެ.

މި މީހުންގެ މައްޗަށް ދަޢުވާކުރުމަށް ފޮނުވާފައިވަނީ މިދިޔަ ސެޕްޓެމްބަރު މަހުގެ 23 ވަނަ ދުވަހުއެވެ.

މި މައްސަލައާއި ގުޅިގެން ފުލުހުން މިހާތަނަށްވަނީ ހެއްކާއި ގަރީނާއާއެކު ޖުމްލަ ހަތް މީހެއްގެ މައްޗަށް ދަޢުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައެވެ.

މީގެތެރެއިން 3 މީހެއްގެ މައްޗަށް ޕީ.ޖީ އިން ދަޢުވާ އުފުލައި މައްސަލައިގެ ޝަރީއަތްތައް ވެސް ވަނީ ފަށައިފައެވެ.