ރާއްޖެއިން އިސްލާމްދީން ފޮހެވިދާނެ ކަމުގެ ނުރައްކާ އެބައޮތް- ޝައިޚު ޝަމީމް

ސިޔާސީ ބައިބައިވުމާއި ސިޔާސީ ވާދަވެރިކަން ބޮޑުވުމުގެ ސަބަބުން ސްޕޭން (އަންދަލުސް) އިން އިސްލާމްދީން ފޮހެވިގެން ދިޔަ ފަދައިން ރާއްޖެއިންވެސް އިސްލާމް ދީން ފޮހެވިދާނެ ކަމުގެ ނުރައްކާ އެބައޮތް ކަމަށް އައްޝައިޚު އާދަމް ޝަމީމް ވިދާޅުވެއްޖެއެވެ.

ސަލަފު ޖަމިއްޔާއިން އިންތިޒާމް ކޮށްގެން ދަރުބާރުގޭގައި ރޭ ބޭއްވި ދަރުސެއްގައި ވާހަކަ ދައްކަވަމުން އޭނާ ވިދާޅުވީ ސްޕޭނަކީ 800 އަހަރު ވަންދެން އިސްލާމީ ގައުމެއްގެ ގޮތުގައި އޮތް ގަމެއް ކަމަށެވެ. ނަމަވެސް ސިޔާސީ ވާދަވެރިކަމާއި، ބައިބައިވުމުގެ ސަބަބުން ނަސާރާއިން މެދުވެރި އެގައުމުން އިސްލާމް ދީން އެއްކޮށް ފޮހެލާފައިވާ ކަމަށް ވިދާޅުވިއެވެ.

އޭނާ ވިދާޅުވީ ސްޕޭނުން އިސްލާމްދީން ނެތިގެން ދިޔައީ ސިޔާސީ ހަލަބޮލިކަމުގެ ތެރެއަށް ގައުމު ގެނބި އެއްބަޔަކު އަނެއްބަޔަކާއި ޒާތީ ގޮތުން ހަސަދަވެރި ވުމުގެ ސަބަބުން ކަމަށެވެ. އޭނާ ވިދާޅުވީ ރާއްޖޭގެ ސިޔާސީ ކަންކަމަށް ބަލާއިރު ރާއްޖޭގެ ހާލަތުވެސް މިހާރު ދަތުރު ކުރަމުންދަނީ ސްޕޭންވެސް ދަތުރު ކުރި މަގުން ކަމަށެވެ. ރާއްޖޭގެ ހާލަތު ވެސް މިހާރު ބަދަލުވަމުން ދަނީ ސްޕެއިންފަދަ ސިޔާސީ ވާދަވެރިކަން އޮތް އެއްބައެއްގެ ސިޔާސީ ނުފޫޒު އަނެއް ބައެއްގެ މައްޗަށް ފޯރަމުންދާ ގައުމެއްގެ ގޮތުގައި ކަމަށް އޭނާ ވިދާޅުވިއެވެ.

"ރާއްޖޭގެ ސިޔާސީ މަސްރަހު މިހާރު އޮތީ ސްޕެއިންގެ ސިޔާސީ މަސްރަހާ ދާދި އެއް ފައްތަރެއްގައި. އެ ގައުމަކީ ކުރިން ސައްތައިންސައްތަ މުސްލިމު ގައުމެއް ނަމަވެސް ސިޔާސީ އެކިއެކި ނުފޫޒް ތަކާއި، ނަސޯރާއިންގެ ނުބައި ރޭވުމުގެ ދަށުން މުޅި ގައުމު މިހާރު އެވަނީ ބައިބައިވެ އިސްލާމްދީން ފުހެވިފައި." އޭނާ ވިދާޅުވިއެވެ. ޝަމީމް ވިދާޅުވީ މިފަދަ ހާލަތަކަށް ރާއްޖޭގެ ސިޔާސީ މަސްރަހު މިހާރު ދަތުރުކުރަމުންދާ ދިޔުމަކީ ވަރަށް ބޮޑަށް ފިކުރު ކުރަން ޖެހިފައިވާ ކަމެއް ކަމަށެވެ.

ސްޕޭން ސަރުކާރާއި ނަސާރާ އަމިއްލް ޖަމާއަތްތަކާ އެއްބަސްވުން ތައްހެދިކަން ތާރީޚުން އެނގޭ ކަމަށެވެ. އެންމެފަހުން މިއެއްބަސްވުންތައް ނަސާރާއިން އުވާލީ ކަމަށްވެސް ވިދާޅުވިއެވެ. މިއެއްބަސްވުން އުވާލުމަށް ފަހު ނަސާރާއިން ސްޕެއިންގެ މައްޗަށް ގަދަވެގަތީ ކަމަށްވެސް އޭނާ ވިދާޅުވިއެވެ. ނަސާރާއިންނަށް އެފުރުސަތު ލިބުނީ ސްޕޭނުގައި އޭރުއޮތް ސިޔާސީ ވާދަވެރިކަމާއި، ޒާތީ ހަސަދަވެރި ކަމުގެ ސަބަބުން ކަމަށްވެސް އޭނާ ވިދާޅުވިއެވެ. ނަސާރާއިން މިކަން ކޮށްފައިވަނީ އެކިއެކި ސިޔާސީ ނުފޫޒުތަކުގައި ޖެހި ރައްޔިތުންގެ ބައިބައި ވެގެން ދިއުމުގެ ސަބަބުންނެވެ. ނަތީޖާއަކަށްވީ އެތަނުގެ މުސްލިމުން ނަސާރާ ދީނަށް ވެއްދުން ކަމަށްވެސް ވިދާޅުވިއެވެ.

ޝެއިހް ވާހަކަފުޅުގައި ރާއްޖޭގެ ސިޔާސީ މަސްރަހު މިހާރު ހިގަމުންދާގޮތަށް އަލިއަޅުވާލައްވައި ވާހަކަފުޅު ދައްކަވަމުން ވިދާޅުވީ ރާއްޖޭގައި ހަމަނުޖެހުން އުފެދި ބައިބައިވުން އިންތިއަށް އުފެދިފައިވާ ކަމަށާއި މިކަމަކީ އިސްލާމްދީން ހިމާޔަތް ކުރުމަށް ކުރަމުންދާ މަސައްކަތައް ހުރި ހުރަހެއް ކަމަށެވެ.

"ރާޢްޖޭގައި މިހާރު އޮތީ ހަމައެކަނި ސިޔާސީ ވާދަވެރިކަން އިތުރު އެއްވެސް ކަމެއް ނެތް. މި ވާދަވެރިކަން މި ގޮތަށް ކުރިއަށްދާނަމަ ރައްޔިތުންގެ މެދުގައި ބައިބައިވުން އުފެދި އެކަކު އަނެކެއްގެ ބަސް ގަބޫލެއް ނުކުރާނެ. މީ ދީން [އިސްލާމް ދީން] ރައްކާތެރިކުރުމަށް ކުރަމުންދާ މަސައްކަތައް ހުރި އެންމެ ބޮޑު ހުރަހަކީ ވެސް އެއީ،" ޒުވާން ޝައިހު ވިދާޅުވި އެވެ.

ޝަހީމް ވިދާޅުވީ ﷲ ހެއްދެވި ހުރިހާ މަޚުލޫގުން ވެސް އެކަލާނގެ އަށް ބިރުވެތިވާން ޖެހޭ ކަމަށެވެ. ކޮންމެ ކަމެއް ކުރަންވާނީ އިސްލާމީ ތަރަހައިގެ ތެރެއިން ކަމަށްވެސް އޭނާ ވިދާޅުވިއެވެ. ސިޔާސީ ގޮތުންވެސް އަދި އެހެން ގޮތަކުންވެސް ﷲ އަށް އުރެދޭ ފަދަ އެއްވެސް ވާހަކައެއް އެއްވެސް ބޭނުމެއްގައި އެއްވެސް މީހަކު ދައްކައިގެން ނުވާނެ ކަމަށްވެސް ޝައިޚު ވިދާޅުވިއެވެ.