މިއަދު ހަވީރުން ފެށިގެން ގައްދުއަށް ކަރަންޓް ދީފި
4 ސެޕްޓެމްބަރ 2013 0:04
މިއަދު ހަވީރުން ފެށިގެން ގދ. ގައްދުއަށް ކަރަންޓް ލިބިއްޖެ ކަމަށް އެރަށު ކައުންސިލުން ބުނެފިއެވެ.
ކައުންސިލްގެ ރައީސް މުހައްމަދު ރިޒާން ވިދާޅުވީ މިދިޔަ އާދީއްތަ ދުވަހު ހެނދުނު ކަރަންޓް ދިޔަގޮތަށް ކަރަންޓް ލިބުނީ މިއަދު ހަވީރު 3.30 އެހައިކަންހާއިރު ކަމަށެވެ.
"ކަރަންޓް ދިނުމުގެ ކުރިން ރަށުތެރޭގައިި ގޮވައި އަންގާފައިވާނެ މަތީ ކަރަންޓް ނަގާ އެއްޗެހި ބޭނުން ނުކުރަން. އެއީ ހަލާކުވި ދެއިންޖީނުގެ ތެރެއިން ބޮޑު އިންޖީނު އަދިވެސް ނުހެދޭތީ. އެއިންޖީނު މިރޭގެ ވަގުތެއްގައި ހެދޭނެ ކަމަށް މައުލޫމާތު ލިބިފައިވަނީ." ރިޒާން ވިދާޅުވިއެވެ.
ރިޒާން ވިދާޅުވީ ބޮޑު އިންޖީނު ހެދޭނީ މާލެއިން "ކޮންމެވެސް އެއްޗެއް ގެނެސްގެން" ކަމަށެވެ. އޭތި މިރޭ ލިބޭނެ ކަމަށް މައުލޫމާތު ލިބިފައިވާ ކަމަށް އޭނާ ވިދާޅުވިއެވެ. ރިޒާން ވިދާޅުވީ 2 އިންޖީނު ހެދުނަސް އެވަރުން ކަރަންޓްގެ މައްސަލަ ހައްލު ނުވާނެ ކަމަށެވެ. މައްސަލަ ހައްލު ކުރެވޭނީ އިތުރު އިންޖީނެއް ގެނެސްގެން ކަމަށް އޭނާ ވިދާޅުވިއެވެ.
އިތުރު އިންޖީނެއް ލިބޭތޯ ކައުންސިލުން ކުރަންޖެހޭ މަސައްކަތްތައް ކުރަމުންދާ ކަމަށް އޭނާ ވިދާޅުވިއެވެ. އެރަށުގައި މިހާރު ބޭނުން ކުރަނީ 250 ކޭވީ ގެ އިންޖީނަކާއި، 300 ކޭވީ ގެ އިންޖީނެކެވެ. އެރަށަށް ކަރަންޓްގެ މައްސަލަ ދިމާވާން ފެށީ މި ދެއިންޖީން ހަލާކުވެގެންނެވެ.
ކިޔުންތެރިންގެ ހިޔާލު