މަނާ ގަޑީގައި ދުއްވައިގެން އަށާވީސް މީހުންގެ ލައިސަންސް ހިފަހައްޓައިފި

ޢީދު ދުވަހު ދުއްވުން މަނާގަޑީގައި ދުއްވައިގެން 28 މީހުންގެ ލައިސަންސް ހިފަހައްޓައިފައިވާ ކަމަށް ފުލުހުން ހާމަކޮށްފިއެވެ.

އަދި އެއްގޮތަކަށްވެސް ލައިސަންސް ނެތި ދުއްވި އަށް މީހުން ފުލުހުން ވަނީ ހިފަހައްޓައިފައެވެ. މީގެ އިތުރަށް ލައިސަންސް ހިފަހައްޓާފައި ވަނިކޮށް ވެހިކަލް ދުއްވި ތިން މީހަކާއި، އަތުގައި ލައިސަންސް ނެތި ދުއްވި ދެ މީހަކާ މެދުވެސް ފިޔަވަޅު އަޅާފައި ވާކަމަށް ފުލުހުން ވަނީ ހާމަކޮށްފައެވެ.

މަނާ ގަޑީގައި ދުއްވުމުގެ ސަބަބުން އިއްޔެ ވަނީ ޖުމްލަ 41 މީހުންނާ މެދު ފިޔަވަޅު އަޅާފައި ކަމަށް ފުލުހުންވަނީ ހާމަކޮށްފައެވެ. މި މީހުންނާމެދު ފިޔަވަޅު އަޅާފައިވަނީ ފިތުރު އީދު ދުވަހަކީ ފައި މަގުގައި އުޅޭ ދުވަހެއްގެ ގޮތުގައި މާލޭ ސިޓީ ކައުންސިލުން ހަމަޖައްސައި އެކަން އަންގާފައި ވަނިކޮށް އެއާ ޚިލާފުވުމުގެ ސަބަބުންނެވެ. ސިޓީކައުންސިލުން ކުރިންވެސް ބުނެފައިވަނީ މަނާގަޑީގައި ދުއްވާ މީހުންނާމެދު ފިވަޅު އަޅާނެ ކަމަށެވެ.

ފައިމަގުގައި އުޅޭ ގޮތަށް މާލޭ ސިޓީ ކައުންސިލުން ހަމަޖައްސާފައިވަނީ އިއްޔެ ހަވީރު 4.00 އިން ރޭގަނޑު 10.00 އާ ހަމައަށެވެ. މިގޮތަށް މިކަން ހަމަޖައްސާފައިވަނީ މާލޭސިޓީ ކައުންސިލާއި، ފުލުހުންނާއި، ޓްރާންސްޕޯޓް އޮތޯރިޓީ އެކު މަޝްވަރާ ކުރުމަށްފަހުގައެވެ.

ދުއްވުން މަނާ ވަގުތުގައި ދުއްވޭނީ ހަމައެނި ހުއްދަ ދީފައިވާ ފަރާތްތަކަށެވެ. ހުއްދަދީފައިވާ ފަރާތްތައް ފިޔަވައި އެހެން އެހެން ބަޔަކު އެވަގުތު ދުއްވައިފިނަމަ އެއްގަމު ދަތުރު ފަތުރުގެ ޤާނޫނުގައި ވާ ގޮތުގެ މަތިން ފިޔަވަޅު އަޅާނެ ކަމަށް މާލޭސީޓީ ކައުންސިލުން ވަނީ ހާމަކޮށްފައެވެ. އެހެން ކަމުން މި 41 މީހުންނާ މެދު ފިޔަވަޅު އަޅައިފައިވަނީ މި ގާނޫނުގެ ދަށުން ކަމަށް ފުލުހުންވަނީ ހާމަކުރައްވާފައެވެ.

ފިތުރު ޢީދު ދުވަހު މާލޭގެ ބައެއް ސްކޫލްތައް ގުޅިގެން ވަނީ މާލޭގެ ބައެއް މަގުތަކުގައި ޕެރޭޑެއް ބާއްވާފައެވެ. މިޕެރޭޑު ބެލުމަށް ވަރަށްގިނަ މީހުން މަގުމައްޗަށް ނިކުމެފައިވެއެވެ.