މަރުހަބާ ދިވެހި ގައުމީ ޓީމް

އަވަށްޓެރި ސްރީލަންކާއާ ދެކޮޅަށް ދިވެހިރާއްޖޭގެ ގައުމީ ފުޓުބޯޅަ ޓީމް މިރޭ ކުޅުނުމެޗު ބޮޑު ތަފާތަކުން ކާމިޔާބު ކުރުމަކީ އާދައިގެ ކަމެއް ނޫނެވެ. އެމެޗުގައި ރާއްޖޭގެ ކެޕްޓަން އަލީ އަޝްފާގު ޖެހި 6 ލަނޑަކީ ރަނަށްވުރެ ދިވެހިންނަށް އަގުބޮޑު ލަނޑުތަކެކެވެ.

މިލަނޑުތައް އަގުބޮޑުވާ ސަބަބަކީ އެލަނޑުތަކުން ދަގަނޑޭ ރެކޯޑު ހެދީމައެވެ. ރާއްޖޭގެ ޓީމް ރެކޯޑު ހެދީމައެވެ. މިރޭގެ މެޗުން ދިވެހިން މޮޅުވުމަކީ އެދުރުބެއަށްވުރެ ދަރިވަރު މޮޅުވުން ކަހަލަ ކަމެކެވެ.

މިލަނޑުތަކުން ސާފް ޗެމްޕިއަންޝިޕުގެ ތާރިހުގައި އެންމެ ގިނަ ލަނޑު ޖެހުމުގެ ރެކޯޑް އަލީ އަޝްފާގް (ދަގަނޑޭ) އެވަނީ މުގުރާލާފައެވެ. ކުރިން މިރެކޯޑު އޮންނަނީ އިންޑީއާގެ ކުރީގެ މަޝްހޫރޫ ކުޅުންތެރިޔާ ބައިޗުން ބުޓިޔާ އަތުގައެވެ. އޭނާގެ ރެކޯޑަކީ 12 ލަނޑެވެ. މިރޭ ދަގަނޑޭ ޖެހި 6 ލަނޑާއެކު ބުޓިޔާގެ ރެކޯޑު މުގުރާލައިފައިވަނީ 14 ލަނޑާ އެކުގައެވެ. މިމުބާރާތް އަދިއޮތީ ކުރިއަށެވެ. އެހެން ކަމުން ލަނޑުގެ އަދަދު އިތުރު ކުރުމުގެ ފުރުސަތު ދަގަނޑޭއަށް އެބައޮތެވެ. އެހެން ކަމުން ކުރިއަށްހުރި މެޗުތަކުގައި އިތުރު ލަނޑު ޖެހުމަށް އޭނާއަށް ހިތްވަރު ދެމެވެ. ދަނގަޑޭއަށް މަރުހަބާ ހުއްޓެވެ.

މިރޭގެ މެޗުގައި ދަގަނޑޭގެ އިތުރަށް ލަންކާ ކޮޅަށް ލަނޑުޖެހި އަސަދުﷲ އަބްދުﷲ އާއި، އަލީ އުމަރާއި، އަލީ ފާސިރު (ސެންޓޭ) އާއި، ހަސަން އަދުހަމް (ސަޑޭ) އަށް މަރުހަބާ ހުއްޓެވެ. ކުރިއަށްހުރި މެޗުތަކުގައި ރާއްޖެއަށް އިތުރު ކާމިޔާބީ ހޯދައިދިނުމަށް މުޅިގައުމު އޮތީ އެދިއެދިއެވެ.

މިރޭގެ މެޗަށް ރާއްޖެ ނިކުތްއިރުވެސް ސާފް ޗެމްޕިއަންޝިޕުގައި އެންމެ ތަފާތު ބޮޑުކޮށް މޮޅުވުމުގެ ރެކޯޑް އޮތީ ރާއްޖެ އަތުގައެވެ. އެއީ 2005 ވަނަ އަހަރުގެ ސާފް ޗެމްޕިއަންޝިޕުގައި އަފްޣާނިސްތާން އަތުން 9-1 އިން މޮޅުވެގެން ގާއިމް ކޮށްފައިވާ ރެކޯޑެކެވެ.

މިރޭގެ މެޗް ކުޅުނު ސްޓޭޑިއަމްއަކީ 1997 ގެ ސާފް ޗެމްޕިއަންޝިޕުގެ ސެމީފައިނަލުގައި ލަންކާ އަތުން 2-1 އިން މޮޅުވެ ފުރަތަމަ ފަހަރަށް ސާފް ޗެމްޕިއަންޝިޕުގެ ފައިނަލުން ރާއްޖެ ޖާގަ ހޯދި ސްޓޭޑިއަމެވެ. އެދުވަހުގެ މެޗުން ރާއްޖެ މޮޅުވުމުން ލަންކާ ކުޅުންތެރިންނާއި އޮފިޝަލުން ދިވެހި ކުޅުންތެރިންނަށް ހަމަލާދިނެވެ. ލޭއޮހޮރުވާލިއެވެ. ނަމަވެސް މިރެއަކީ މާޒީއެއް ނޫނެވެ. މިރޭފެނިގެން ދިޔައީ ލަންކާއިން ރާއްޖެއަށް އިހުތިރާމްކުރި މަންޒަރެވެ.

ލަންކާއަކީ ކުޑަކުޑަ ދިވެހިރާއްޖެއަށް ފުޓުބޯޅަ ދަސްކޮށްދިން އެދުރުން ތިބި ގައުމެވެ. ތާއަބަދު ލަންކާއަށް ރާއްޖެއިން އިހުތިރާމް ކުރަންޖެހޭނެއެވެ. ފުޓުބޯޅައިގާ ލަންކާއަށްވުރެ ބޮޑަށް ރާއްޖެ މިހާރު ކުރިއަރާފައިވަނީ ލަންކާގެ ކޯޗުންނާއި ކުޅުންތެރިންގެ އެހީގައި ދިވެހިންގެ ހިތްވަރުންނެވެ.

ކުރިއަށް އޮތްތާގައިވެސް ވާދަވެރި ލަންކާ އަތުން ދިވެހިން ބަލިވާން ބޭނުމެއް ނޫނެވެ. އެއްވެސް ގައުމެއްގެ އަތުން ބަލިވާން ބޭނުމެއްނޫނެވެ. ނަމަވެސް ފުޓުބޯޅައަކީ ބަލިވުމާއި ދެރަވުން އޮތް ކުޅިވަރެކެވެ. ކޮންމެ ހާލަތެއްގައި އިދިކޮޅަށް ކުޅޭ ޓީމަށް އިހުތިރާމް ކުރަން ޖެހޭނެއެވެ.

މިރޭގެ މެޗަކީ ގައުމީޓީމުން ރާއްޖެއަށްކުރި ހަދިޔާއެކެވެ. މިމެޗުގެ ސަބަބުން ދިވެހިޓީމުގެ ކުޅުންތެރިންތިބޭނީ އިތުބާރު ބޮޑުވެފައެވެ. ނަމަވެސް މުބާރާތުގެ ތަށި އަތަށް އަރަންދެން "ހަމަބިމުގައި" ތިބުމަށް ނަސޭހަތްތެރިވަމެވެ. ދިވެހި ގައުމީފުޓުބޯޅަ ޓީމުން މިރޭ ހޯދި ތާރީހީ ކާމިޔާބަށްޓަކައި މުޅިޓީމަށް މަރުހަބާ ކިޔަމެވެ. ހިތްވަރާއެކު ކުރިއަށްދާށެވެ. "ބާރަވަނަ ކުޅުންތެރިޔާ" ގައުމީޓީމުގެ ފަހަތުގައި އެބަހުއްޓެވެ.