އައިއެސް އިން ގަތުލުކުރި ނޫސްވެރިއާގެ ފިދިޔަ ދެއްކުމަށް އެމެރިކާ ސަރުކާރުން ހުރަސްއެޅި: އާއިލާ

އިސްލާމިކް އިސްޓޭޓު (އައިއެސް)އިން ގަތުލުކުރި އެމެރިކާގެ ނޫސްވެރިއާ ޖޭމްސް ޕްލޯއީގެ ފިދިޔަ ދެއްކުމަށް އޭނާގެ އާއިލާއިން މަސައްކަތް ކުރުމުން އެމެރިކާ ސަރުކާރުން އެެކަމާ ދެކޮޅު ހަދައިފައިވަކަމަށް އެނާގެ އާއިލާއިން ހާމަކޮށްފިއެވެ.

ފްލޯއީގެ މަންމަ ޑަޔާނަ "އޭބީސީ ނިއުސް" އަށް ދިން އިންޓަވިއުއެއްގައި ބުނެފައިވަނީ އެ އާއިލާއިން އޭނާގެ ދަރިފުޅު ސަލާމަތް ކުރުމަށް އެތައް ފަހަރެއްގެ މަތިން ފިދިޔަ ދެއްކުމަށް މަސައްކަތްކުރިކަމަށެވެ. އެހެން ނަމަވެސް އެމެރިކާގެ ރައީސް ބަރަކް އޮބާމާގެ ސެކިއުރިޓީ ކައުންސިލުން އެކަން ހުއްޓުވައިފައިވާކަމަށެވެ. އެމީހުން ފިދިޔަ ދީފިނަމަ ޓެރަރިސްޓުންނަށް އެހީވުމުގެ ކުށުގައި އެމީހުން ހައްޔަރު ކުރާނެކަމަށް އެމެރިކާ ސަރުކާރުން ބުނެފައިވާކަަމަށް ޑަޔާނާ ބުނެފައިވެއެެވެ.

"އެތައް ފަހަރެއްގެ މަތިން އަޅުގަނޑުމެންނަށް ގުޅައި ފިދިޔަ ދީފިނަމަ ކުށްވެރިވާނެކަމަށް ބުނި. އެއީ އެމެރިކާ ސަރުކާރުން އަޅުގަނޑުމެންގެ އާއިލާއަށް ދިން އިންޒާރެއްކަމަށް އަޅުގަނޑުމެން ދެކެނީ،" ޑަޔާނާ ބުންޏެވެ. 

އެމެރިކާ ރައީސްގެ ތަރުޖަމާނު ޖޯން އާނެސްޓް ވަނީ އެމައްސަލައިގައި "އަލް ޖަޒީރާ" އިން ކުރި ސުވާލަށް ޖަވާބު ދެއްވުމަށް ދެކޮޅުހައްދަވައިފައެވެ. އެހެން ނަމަވެސް ފިދިޔަ ދިނުމަކީ އެމެރިކާ ސަރުކާރުން ގަބޫލު ކުރާ ސިޔާސަތެއް ނޫންކަމަށް އެނާ ވަނީ ވިދާޅުވެފައެވެ. 

"ފިދިޔަ ދީފިނަމަ އެއީ މީހުން ރަހީނުކުރުމަށް ދެވޭ އިތުރު ހިތްވަރެއްކަމަށް އެމެރިކާސަރުކާރުން ދެކެނީ،" އާނެސްޓް ވިދާޅުވިއެވެ. 

އެމެރިކާގެ ސެކިއުރިޓީ ކައުންސިލުން ބުނެފައިވަނީ، ޓެރަރިސްޓުންނަށް ފައިސާ ހަރަދު ކުރުމަކީ ކުށެއްކަމަށް އެ އާއިލާއަށް ބުނެދީފައިވާނެކަމަށެވެ. އެހެން ނަމަވެސް ފިދިޔަ ދީފިނަމަ ހައްޔަރުކުރާނެކަމަށް ބުނެ ބިރުދައްކާފައި ވާކަމަށް ބުނާ ވާހަކައަށް އެ ކައުންސިލުން ދެކޮޅު ހަދައެވެ. 

މިދިޔަ މަހުގެ ތެރޭގައި އައިއެސް އިން އާންމުކޮށްފައިވާ ވީޑިއޯއެއްގައި ފްލޯއީ ގަތުލުކުރާ މަންޒަރު ފެނެއެވެ. އަދި އޭގެ ފަހުން އައި އެސްއިން ވަނީ އެމެރިކާގެ ނޫސްވެރިއެއްކަމަށްވާ ސްޓީވެެން ސޮޓްލޮފް ގަތުލުކުރާ މަންޒަރު ދައްކުވައިދޭ ވީޑިއޯއެއްވެސް އާންމުކޮށްފައިއެވެ. 

އައިއެސްއިން ހައްޔަރު ކޮށްފައިވާ އެމެރިކާ ރައްޔިތުން ސަލާމަތްކުރުމަށް އެމެރިކާ ސަރުކާރުން މިއަހަރު ކުރީކޮޅު ސީރިއާގައި އޮޕަރޭޝަނެއް ހިންގިއެވެ. އެހެން ނަމަވެސް އެއޮޕަރޭޝަން ވަނީ ނާކާމިޔާބުވެފައެވެ.