އިރާގުގެ އައު ޕްރައިމް މިނިސްޓަރަކަށް އަބާދީ ހޮވައިފި

އިރާގުގެ އައު ޕްރައިމް މިނިސްޓަރަކަށް ހައިދަރު އަލް އަބާދީ ހޮވައިފިއެވެ.

މިއަދު އެގައުމުގެ ގާނޫނު ހަދާ މަޖިލީހުން ވަނީ އައު ޕްރައިމް މިނިސްޓަރާއެކު ކެބިނެޓުގެ މިނިސްޓަރުންވެސް ހޮވައިފައެވެ.

ޕްރައިމް މިނިސްޓަރ އަބާދީ މަޖިލީހުގައި ވާހަކަ ދައްކަވަމުން ވިދާޅުވެފައި ވަނީ އިރާގުގައި ހަނގުރާމަކުރާ ޖަމާއަތްތަކަށް ދެމުން އަންނަ ހަމަލާތައް ވަރުގަދަ ކުރައްވާނެކަމަށެވެ. އަދި އިރާގަށް ކާމިޔާބީ ލިބެންދެން ހަނގުރާމަ ކުރިއަށް ގެންދަވާނެކަމަށް ވަނީ ވިދާޅުވެފައެވެ.

އަބާދީ އެ މަގާމަށް އިންތިހާބު ކޮށްފައިވަނީ އެމެރިކާ އާއި ޔޫރަޕްގެ ގައުމުތަކުން، އިރާގުގެ ސަރުކާރުގައި ރައްޔިތުންގެ ހިއްސާ އިތުރުކުރުމަށް ގޮވައިލާފައިވަނިކޮށެވެ. އެއީ އެގައުމުގެ ކުރުދީ ސަރުކާރާއި ސުންނީންނާ ދެމެދު އުފެދިފައިވާ ހަމަނުޖެހުންތައް ކުޑަކުރުމަށެވެ.

އެހެން ނަމަވެސް އިރާގުގެ ކުރުދީ ސަރުކާރުގެ ހަނގުރާމަވެރިންނާ، އެމެރިކާގެ ހަނގުރާމަތީ މަތިންދާ ބޯޓުތަކުން އަންނަނީ އިރާގުގައި ހަރަކާތްތެރިވަމުން އަންނަ ސުންނީ ޖަމާއަތެއްކަމަށްވާ އިސްލާމިކް ސްޓޭޓް (އައިއެސް) ގެ ހަނގުރާމަވެރިންނަށް ހަމަލާދެމުންނެވެ. އިރާގު ސަރުކާރުން މަސައްކަތް ކުރަނީ އައިއެސް އިން ހިފާފައިވާ އިރާގުގެ އަވަށްތައް އަނބުރާ އެ ގައުމުގެ ސަރުކާރުގެ ބާރުގެ ދަށަށްގެނައުމަށެވެ.

އައު ޕްރައިމް މިނިސްޓަރ ހުވާކުރުމަށް އިރާގުގެ މަޖިލީހުގައި ބޭއްވި ހަފުލާގައި، މިދިޔަ އޮގަސްޓު މަހު އިސްތިއުފާ ދެއްވި އިރާގުގެ ކުރީގެ ޕްރައިމް މިނިސްޓަރ ނޫރީ އަލް މާލިކީ ވެސް ބައިވެރިވެ ވަޑައިގެންނެވިއެވެ.