ފަލަސްތީނުގެ 400 ހެކްޓަރު ބިން އިޒްރޭލުން އަތުލައިފި
1 ސެޕްޓެމްބަރ 2014 10:54
އިޒްރޭލުން ފުލުހުން ފަލަސްތީނު ރައްޔިތުންގެ ގަޔަށް ކަރުނަގޭސް ޖަހަނީ
ފަލަސްތީނުގެ ހުޅަނގު އައްސޭރީގެ 400 ހެކްޓަރު ބިމަކީ އިޒްރޭލުގެ ބިން ކަމަށް އެގައުމުން ކަނޑައަޅައިފިއެވެ.
މިއީފާއިތުވީ 30 އަހަރު ދުވަހުގެ ތެރޭގައި އިޒްރޭލުން ހުޅަނގު އައްސޭރީގެ އެންމެބޮޑުބައެއް އަތުލައިގަތް ފަހަރެވެ.
އިޒްރޭލުންމިގޮތަށް ނިންމާފައިވަނީ އިޒްރޭލުން ޣައްޒާއަށް ދެމުންގެންދިޔަ ހަމަލާތައް ހުއްޓައިލިތާ މާގިނަ ދުވަހެއް ނުވަނީހެވެ. އެހަމަލާތަކުގައި ފަލަސްތީނުގެ 2000 މީހުން މަރުވެފައިވާއިރު، 10000 އަށްވުރެ ގިނަ މީހުންވަނީ ޒަހަމްވެފައެވެ.
ފަލަސްތީނުގެ އިސްބޭފުޅަކު "އަލްޖަޒީރާ" ނޫހަށް މައުލޫމާތު ދެއްވަމުން ވިދާޅު ވެފައިވަނީ އިޒްރޭލުގެ އަމަލުތައް ހުރި ގޮތުގެ ސަބަބުން އިޒްރޭލާ ފަލަސްތީނާ ދެމެދު އުފެދިފައިވާ ނުތަނަވަސްކަން އިތުރަށް ހޫނުވެގެންދާނެކަމަށެވެ.
ފަލަސްތީނުގެރައީސް މަހުމޫދު އައްބާސް ވެސް ވަނީ ބިން ބޮޑުކުރުމަށް އިޒްރޭލުން ހިނގަމުންގެންދާ އޮޕަރޭޝަން ހުއްޓައިލުމަށް އިލްތިމާސް ކުރައްވައިފައެވެ.
"އިޒްރޭލުގެ އޮޕަރޭޝަނުގެ ސަބަބުން ހަމަނުޖެހުންތައް އިތުރުވާނެ. ޣައްޒާ ހަނގުރާމައަށްފަހު މިއަމަލުތަކުގެ ސަބަބުން މަޝްރަހުގެ ހޫނުކަން އިތުރުވާނެ،" އައްބާސް ނެރުއްވިބަޔާނެއްގައި ވިދާޅު ވެފައިވެއެވެ.
އެމެރިކާއިންވެސް ވަނީ ފަލަސްތީނުގެ ބިންތައް ހިފުން ހުއްޓައިލުމަށް އިޒްރޭލު ސަރުކާރުގައި އެދިފައިއެވެ.
ކިޔުންތެރިންގެ ހިޔާލު