އިޒްރޭލުން ޣައްޒާއަށް ދެމުން ގެންދިޔަ ހަމަލާތައް ހުއްޓައިލުމަށް އެއްބަސްވެއްޖެ

އިޒްރޭލާއި ހަމާސްއާއި ދެމެދު ޖުލައި އަށް ވަނަ ދުވަހުން ފެށިގެން ކުރަމުން ދިޔަ ހަނގުރާމަ ހުއްޓައިލުމަށް ދެ ފަރާތުން އެއްބަސްވެފައިވަނީ މިސްރުގައި ކުރިއަށް ގެންދިޔަ ސުލްހައިގެ މަޝްވަރާތަކުގައިއެވެ.

އެއްބަސްވުމުގައި ޣައްޒާގެ މައްޗަށް އިޒްރޭލުން އަޅައިފާ ބައެއް ދަތިކުރުމުގެ ފިޔަވަޅުތައް އުވައިލުމަށްވަނީ ނިންމައިފައެވެ. އެގޮތުން ވަޔަފާރިކުރުމުގެ މިނިވަންކަން ޣައްޒާއަށް ދިނުމަށް ވަނީ ނިންމައިފައެވެ. މިސްރާއި ޣައްޒާ ގުޅޭ ބޯޑަރު ހުޅުވައިލުމަށްވެސް ވެސް ވަނީ ނިންމައިފައެވެ. އަދި ޣައްޒާގައި އެއާޕޯޓާއި، ކަނޑުގެ ބަނދަރެއް ގާއިމް ކުރުމަށް ވެސް އެއްބަސްވުމުގެ ސަބަބުން ވަނީ މަގުފަހިވެފައެވެ. 

ފަލަސްތީނުގެ ރައީސް މަހުމޫދު އައްބާސް ވިދާޅުވެފައިވަނީ ހަނގުރާމަ ހުއްޓައިލުމަށް ދެ ފަރާތުން އެއްބަސްވެފައިވަނީ ޖީއެމްޓީ ގަޑިޑިން ފަތިހު އިއްޔެ ހަވީރު 4:00 އިން ފަށައިގެންކަމަށެވެ.   އެމަނިކުފާނުވަނީ އެ އެއްބަސްވުމުގެ ސަބަބުން "ފަލަސްތީނު ޤައުމެއްގެ ގޮތުގައި ބިނާކުރުމަށާ، އިޒްރޭލުން ހިފައިވާ ބިންތައް މިނިވަންކުރުމަށް،" ހިއްވަރެއް ލިބިގެންދާނެކަމަށް ވިދާޅުވެފައިއެވެ. 

އިޒްރޭލުގެ މީޑިއާތަކުން ވެސް ވަނީ ފަލަސްތީނުން ސުލްހައަށް އެއްބަސްވެއްޖެކަމަށް އިއުލާނުކޮށްފައިއެވެ. އިޒްރޭލުގެ ތަރުޖަމާނު މާކް ރެގޭވް "އަލް ޖަޒީރާ" އަށް ދެއްވި އިންޓަވިއުއެއްގައި ވިދާޅުވެފައިވަނީ ޖުލައި މަހުގެ 15 ވަނަ ދުވަހު ހަނގުރާމަ ހުއްޓައިލުމަށް ވެވުނު އެއްބަސްވުމާއި އެއްގޮތަށް ހަމާސް އިން އަމަލުކުރި ނަމަ ލޭއޮހުރުވުންތައް ހުއްޓުވައިލެވުނީން ކަމަށެވެ. 

ހަމާސްގެ ޑެޕިއުޓީ ލީޑަރު މޫސާ އަބުލް މަރުކޫޒް ވެސް ވަނީ ސުލްހައިގެ އެއްބަސްވުމަކީ ޣައްޒާގެ ދިފާއުގައި އެ ޖަމާއަތުން ކުރަމުން އަންނަ މަސައްކަތަށް ލިބުނު ނަސްރެއްގެ ގޮތުގައި އިއުލާނުކުރައްވައިފައެވެ. 

ހަނގުރާމަ ނިންމާލިކަން އިއުލާނު ކުރުމާއެކު ޣައްޒާގެ އެތައް ހާސް ރައްޔިތުންނެއް މަގުތަކަށް ނުކުމެ އުފާ ފާޅުކުރަމުން އަންނަކަމަށް "ޢަލް ޖަޒީރާ" އިން ބުނެއެވެ.

ހަމަާސްގެ އިސް ބޭފުޅެއްކަމަށްވާ މުހައްމަދު އަލް ހިމްދީ ވަނީ އުފާފާޅު ކުރުމުގެ ގޮތުން ޣައްޒާގެ ރައްޔިތުންނަށް ތަގުރީރެއް ދެއްވައިފައެވެ. އޭނާ ވިދާޅުވެފައިވަނީ ޣައްޒާގައި ބަނދަރާއި އެއާޕޯޓު އެޅުމުގެ މަސައްކަތް ކުރައްވާނެކަމަށެވެ. 

"އަޅުގަނޑުމެން ޣައްޒާގައި ބަނދަރާއި އެއާޕޯޓު އެޅުމުގެ މަސައްކަތް ކުރާނަން. އެމީހުން ބަނދަރަށް ހަމަލާ ދޭނަމަ ހަމަލާ ދޭންވީ. އެއާޕޯޓަށް ހަމަލާ ދީފިނަމަ އެމީހުންގެ އެއާޕޯޓަށް ވެސް ހަމަލާ ދޭނަން،" ހިމްދީ ވިދާޅުވިއެވެ. 

އިޒްރޭލާއި ހާމަސްއާއި ދެމެދު ހިނގި ހަނގުރާމައިގައި ޣައްޒާގެ 2142 މީހުން މަރުވެފައިވެއެވެ. އޭގެ ތެރޭގައި ގިނައީ އާންމު ރައްޔިތުންނެވެ. މަރުވި މީހުންގެ ތެރެއިން 490 މީހުންނަކީ ކުޑަކުދިންނެވެ. އިޒްރޭލުން މަރުވެފައިވަނީ 69 މީހުންނެވެ. އޭގެތެރޭގައި ގިނައީ ހަނގުރާމަވެރިންނެވެ.