ސީރިއާއިން އިޒްރޭލަށް ރޮކެޓު ހަމަލާތަކެއް ދީފި
24 އޯގަސްޓް 2014 10:02
ސީރިއާގެ ބޯޑަރުގެ ތެރެއިން އިޒްރޭލަށް ރޭގެ ވަގުތެއްގައި ރޮކެޓު ހަމަލާތަކެއް ދީފައިވާކަމަށް އިޒްރޭލުގެ އަސްކަރިއްޔާއިން ހާމަކޮށްފިއެވެ.
ސީރިއާގެ ބޯޑަރުގެ ތެރެއިން އިޒްރޭލަށް ފަސް ރޮކެޓު ހަމަލާ ދީފައިވީނަމަވެސް އިޒްރޭލުގެ އެއްވެސް މީހަކު މަރުވެފައި ނުވާކަމަށް އެ ގައުމުގެ އަސްކަރިއްޔާ އާއި ހަވާލާދީ "އަލް އަރަބިއްޔާ" ނޫހުން ބުނެފައިވެއެވެ.
ރޮކެޓު ހަމަލާތައް ވަނީ އިޒްރޭލުގެ އަވަށެއްކަމަށް ގޮލާން ހައިޓްސްގެ އެކި ސަރަހައްދުތަކަށް އަމާޒުވެފައިކަމަށް އިޒްރޭލުން ބުނެއެވެ. ނަމަވެސް ރައްދުގައި އިޒްރޭލުން ހަމަލާދީފައެއް ނުވެއެވެ.
މިފަދަ މައްސަލައެއްގައި ޖޫން މަހުގެ ތެރޭގައި އިޒްރޭލުން ސީރިއާގެ ބައެއް ހެޑުކުއާޓަރުތަކަށް ބޮން އަޅާފައިވެއެވެ. އެއީ ސީރިއާއިން ދިން ހަމަލާއެއްގައި އިޒްރޭލުގެ ކުޑަ ފިރިހެއްކުއްޖަކު މަރުވުމުންނެވެ. އެފަހަރު އިޒްރޭލުން ބުނެފައިވަނީ އިޒްރޭލަށް ހަމަލާ ދިނީ ސީރިއާގެ ރައީސް ބައްޝާރުލް އަސަދަށް ވަފާތެރި ފައުޖުތަކުންކަމަށެވެ.
ނަމަވެސް ސީރިއާއިން ވަނީ އިޒްރޭލުގެ ތުހުމަތުތައް ދޮގުކޮށްފައެވެ. އެ ގައުމުގެ އަސްކަރިއްޔާއިން "އަލް އަރަބިއްޔާ" ނޫހަށް މައުލޫމާތު ދިން މީހަކަު ބުނެފައިވަނީ އިޒްރޭލަށް ހަމަލާދީފައިވަނީ އިޒްރޭލުގެ ބޯޑަރުގެ ތެރެއިން ކަމަށެވެ.
އިޒްރޭލާއި ފަލަސްތީނުގެ ހަމާސް ޖަމާއަތާއި ދެމެދު ޣައްޒާގައި ކުރަމުން އަންނަ ހަނގުރާމައަށް މިއަދަށް މިވަނީ 48 ދުވަސް ހިނގައިފައެވެ. އެ ހަނގުރާމައިގައި ފަލަސްތީނުގެ 2،000 އަށްވުރެ ގިނަ މީހުން ވަނީ މަރުވެފައެވެ.
ކިޔުންތެރިންގެ ހިޔާލު