އިޒްރޭލަށް ޖާސޫސް ކޮށްދިން ކަމުގެ ތުހުމަތުގައި ފަލަސްތީނުގެ 17 މީހުން މަރައިލައިފި
22 އޯގަސްޓް 2014 17:46
ޖާސޫސު ކުރިކަމުގެ ތުހުމަތުގައި މަރައިލި މީހަކު ޣައްޒާ މަގުމަތީގައި ދަމާފައިގެންދަނީ
އިޒްރޭލަށް ޖާސޫސު ކޮށްދިން ކަމުގެ ތުހުމަތުގައި ފަލަސްތީނުގެ 17 މީހުން ހަމާސް އިން މަރައިލައިފިއެވެ.
ހަމާސްއިން އެމީހުން މަރައިލާފައިވަނީ އިޒްރޭލުން ދިން ހަމަލާއެއްގައި އެ ޖަމާއަތުގެ އިސް ތިން ކޮމާންޑަރަކު ޝަހީދު ކޮށްލައިފައި ވަނިކޮށެވެ.
ޣައްޒާގެ ސެކިއުރިޓީ އޮފިޝަލެއް "އަލްޖަޒީރާއަށް" މައުލޫމާތު ދެއްވަމުން ވިދާޅުވެފައިވަނީ ފުރަތަމަ 11 މީހުން މަރާލައިފައިވަނީ ޣައްޒާ ސިޓީ ޕޮލިހުގެ ހެޑުކުއާޓަރ ތެރޭގައި ކަމަށެވެ. އެމީހުން މަރާލައިފައިވަނީ ޣައްޒާ ކޯޓަކުން އެމީހުން މަރަން ހުކުމް ކުރުމާ ގުޅިގެންނެވެ.
އަނެއް ހަ މީހުން މަރާލައިފައިވަނީ މިއަދު މެންދުރު ޣައްޒާގެ ސްކުއެރ ގައިއެވެ. ހަ މީހުން މަރާލައިފައިވަނީ ހުކުރު ނަމާދަށްފަހުއެވެ. މަރައިލި މީހުންގެ ތިބީ ކަނުބަނދެފައިއެވެ. އަދި އެމީހުންގެ ބޮލަށް ބަޑި ޖެހި މީހުންވެސް ތިބީ ކަޅުހެދުން އަޅައި މޫނު ނިވައިކޮށްފައި ކަމަށް "އަލް ޖަޒީރާ" އިން ބުނެއެވެ.
ފާއިތުވީ ދެ ދުވަހެއްގެ ތެރޭގައި އިޒްރޭލުން ހަމާސްއަށް ދީފައިވާ ހަމަލާތަކުގައި އަމާޒު ކޮށްފައިވަނީ އެޖަމާއަތުގެ ލީޑަރުން ދިރިއުޅުއްވާ ސަރަހައްދުތަކަށެވެ. މިހަމަލާތައް ދީފައިވަނީ އިޒްރޭލުގެ ޖާސޫސީ އިދާރަތުން ދީފައިވާ މައުލޫމާތަކަކަށް ބިނާކޮށްގެން ކަމަށް "އަލް ޖަޒީރާއިން" ބުނެއެވެ.
އިޒްރޭލުން މީގެ ކުރިން ވެސް ފަލަސްތީނު ރައްޔިތުން ބޭނުންކޮށްގެން ހަމާސްއަށް ޖާސޫސުކޮށްފައިވެއެވެ. ބައެއް ފަހަރު އެމީހުންގެ އާއިލާ މީހުން މަރައިލާނެކަމުގެ އިންޒާރު ދިނުމަށްފަހު އެމީހުންގެ އަތުން ގަދަކަމުން މައުލޫމާތު ހޯދައިފައިވާ ކަމަށް ވެސް "އަލް ޖަޒީރާ" އިން ބުނެއެވެ.
ޖުލައި މަހުން ފެށިގެން އިޒްރޭލާއި ހަމާސް ކުރަމުން އައި ހަނގުރާމަ މިމަހު 14 ވަނަ ދުވަހު ހަފްތާއަކަށް މެދު ކަނޑައިލައިފައިވަނީ މިސްރުގައި ކުރިއަށްދާ ސުލްހައިގެ ވާހަކަ ތަކަށް ތަންދިނުމަށެވެ. އެހެން ނަމަވެސް މިދިޔަ ބުދަ ދުވަހުން ފަށައިގެން އަލުން ހަމަލާތައް ބަދަލުކުރަން ފެށުމުގެ ސަބަބުން ސުލްހައިގެން ވާހަކަތައް ވަނީ ހުއްޓުމަކަށް އައިސްފައިއެވެ.
މިއަދު އެކަނިވެސް އިޒްރޭލުން ޣައްޒާއަށް ވައިގެ މަގުން 20 ހަމަލާ ދީފައިވެއެވެ. ފާއިތުވީ ސައުވީސް ގަޑީރުގެ ތެރޭގައި ޣައްޒާގެ 31 މީހުން ވަނީ އިޒްރޭލުގެ ހަމަލާތަކުގައި ޝަހީދު ވެފައިއެވެ. އިޒްރޭލާއި ހަމާސްގެ ހަމަނުޖެހުމަށް މިހާރުވަނީ 46 ދުވަސް ވެފައެވެ. މިމުއްދަތުގައި ޣައްޒާގެ 2087 މީހުން ވަނީ ޝަހީދުވެފައެވެ.
ކިޔުންތެރިންގެ ހިޔާލު