ތައީލެންޑު އަސްކަރިއްޔާގެ ވެރިޔާ އަމިއްލަފުޅަށް ވެރިކަމާ ހަވާލުވެ ވަޑައިގެންފި

ތައިލެންޑުގެ އަސްކަރީ ބަޣާވާތުގެ ލީޑަރު ކޮމާންޑަރ ޖެނަރަލް ޕަޔޫތު ޗަނޯޗާ އަމިއްލަ ފުޅަށް އެގައުމުގެ ވެރިކަމާ ހަވާލުވެ ވަޑައިގެންފިއެވެ.

ޕަޔޫޗު އެގައުމުގެ ވެރިކަމަށް ވަޑައިގަނެފައިވަނީ އިންތިގާލީ ސަރުކާރެއް ބިނާ ކުރެއްވުމަށް ކަމަށް ވިދާޅުވެއެވެ. އެހެން ނަމަވެސް އޭނާ ވެރިކަމާ ހަވާލުވެ ވަޑައިގެންނެވީ ސިފައިންގެ ތެރޭގައި އަމިއްލަ ފުޅަށް ބޭއްވެވި މުނާސަބަތެއް ގައެވެ. ތައިލެންޑުގެ ގާނޫނު ބުނާގޮތުން ޕްރައިމް މިނިސްޓަރު ހުވާކުރުމުގެ ރަސްމިއްޔާތު ބާއްވަން ޖެހޭނީ އެގައުމުގެ ރައްޔިތުންގެ މަޖިލީހުގައިއެވެ.

އެގައުމުގެ ސަރުކާރު މެއި މަހުގެ 22 ވަނަ ދުވަހު ބަޣާވާތަކުން ވައްޓައިލިފަހުން ވެސް ވެރިކަމުގެ ހުރިހައި ބާރެއް ހިނގަވަމުން ގެންދިޔައީ ސިފައިންގެ ތެރެއިންނެވެ.

އޭނާ ނިންމަވާފައިވަނީ އަހަރެއްހައި ދުވަހު ވެރިކަން ހިންގެވުމަށްފަހު 2015 ވަނަ އަހަރުގެ ފަހުކޮޅުގައި އިންތިހާބެއް ބޭއްވުމަށެވެ. އެއީ އެގައުމުގެ ހިންގުމުގެ މަސައްކަތަށް ގެންނަންހުރި ބަދަލުތަކެއް އިންތިހާބުގެ ކުރިން ގެނައުމަށް ކަމަށް ޖެނެރަލް ޕަޔޫތު ވަނީ ވިދާޅުވެފައެވެ.

އުމުރުން 60 އަހަރުގެ ޕަޔޫޗު ވެރިކަމާ ހަވާލުވެ ވަޑައިގެންނެވިއިރު އަސްކަރިއްޔާއިންވަނީ ސިފައިންގެ ޖެނެރަލްކަމުގެ ވަޒީފާއިން އޭނާ މުސްކުޅިކޮށް އަންނަ މަހު މަގާމުން ދުރުކުރުމަށް ނިންމާފައެވެ.

ތައިލެންޑުގެ ވެރިކަން ވައްޓާލައި ވެރިކަމާ މިލިޓަރީން ހަވާލުވެފައިވަނީ އެގައުމުގެ ކުރީގެ ޕްރައިމް މިނިސްޓަރ ޔިންގްލަކް ޝިނަވަތުރާ އާ ދެކޮޅަށް އާންމުގެ ބަޔަކު ހަޅުތާލު ކުރުމުންނެވެ. އެކަމަނާގެ ވެރިކަމާ ދެކޮޅަށް ހަމަސް ވަންދެން އެގައުމުގައި ހަޅުތާލުކޮށްފައި ވެއެވެ. އެގައުމުގެ ސިފައިން މަގުތަކަށް ބަރު ހަތިޔާރާއެކު ނުކުމެފައިވަނީ "ގައުމުގެ ހަމަޖެހުން އަލުން ގާއިމް ކުރުމަށް" ކަމަށް ބުނެއެވެ.