އިޒްރޭލުން އަނެއްކާވެސް ޣައްޒާއަށް ހަމަލާދޭން ފަށައިފި

އެއް ހަފްތާއަށް ހަމަލާތައް މެދުކަނޑާލަފައި އޮތުމަށްފަހު އަނެއްކާވެސް ޣައްޒާއަށް ހަމަލާދޭން އިޒްރޭލުން ފަށައިފިއެވެ.

ހަމާލާތައް ފެށުމުގެ ޒިންމާ އަލުން ނަގަން ޖެހޭނީ އިޒްރޭލުން ކަމަށް ހަމާސް ޖަމާއަތުން ވަނީ ބުނެފައެވެ.

އިޒްރޭލުން ޣައްޒާގެ 10 ސަރަހައްދަކަށް މިސައިލު ހަމަލާދީފައިވެއެވެ. އެ ހަމަލާތަކުގައި ތިން މީހަކު ޝަހީދުވެފައި ވާކަމަށް ފަލަސްތީނުގެ މެޑިކަލް އޮފިސަރުންނާ ހަވާލާދީ "އަލް ޖަޒީރާއިން" ބުނެއެވެ. އެ ތިން މީހުންގެ ތެރޭގައި ހިމެނެނީ ދެ އަންހެނުންނާއި ކުޑަކުއްޖެކެވެ.

ހަމަލާދިން ނަމަވެސް އިޒްރޭލުން ބުނެފައިވަނީ އެމީހުން މިސްރުގެ ގާހިރާގައި ކުރިއަށްދާ ސުލްހައިގެ ވާހަކަތަކަށް ހުއްޓުމެއް ނާންނާނެކަމަށެވެ. "ހަނގުރާމަ މެދުކަނޑާލާފައި އޮއްވައި ހަމާސްއިން ހަމަލާދިނުމުން ޕްރައިމް މިނިސްޓަރާއި، ޑިފެންސް މިނިސްޓަރ އިޒްރޭލު ސިފައިންނަށް އަމުރުކުރެއްވީ ޓެރަރިސްޓުންގެ ސައިޓުތަކަށް ހަމަލާދިނުމަށް،" އިޒްރޭލުގެ އިސްވެރިއަކު "އަލް ޖަޒީރާ" އަށް މައުލޫމާތު ދެމުން ބުނެފައިވެއެވެ.

ހަމާސްގެ ހަނގުރާމަވެރިންގެ ގޮފި ކަމުގައިވާ "ޤައްސާމް ބްރިގޭޑް" ގެ ޓްވިޓަރގައި ބުނެފައިވެފައިވަނީ އެމީހުން އިޒްރޭލަށް ރޮކެޓު ހަމަލާތަކެއް ދީފައިވާނެ ކަމަށެވެ.

ދެފަރާތުން އަލުން ހަމަލާތައް ފަށާފައިވާއިރު އަދި މިހާތަނަށް އިޒްރޭލުގެ އެއްވެސް މީހަކު މަރެއްނުވެއެވެ.

ޖުލައި މަގުގެ 8 ވަނަ ދުވަހުން ފެށިގެން މަހެއްހާ ދުވަހަށް އިޒްރެލާއި ހަމާސްއާ ދެމެދުގައި ކުރި ހަނގުރާމައިގައި ޣައްޒާގެ 2000 އަށްވުރެ ގިނަ މީހުން ޝަހީދުވެފައިވެއެވެ.