ހަމަލާ ދިނުން ނުހުއްޓައިފިނަމަ ކޮންމެތާކުން އެމެރިކާ މީހަކު ފެނުނަސް މަރައިލާނަން: އައިއެސް

އިރާގުގައި ހަނގުރާމަ ކުރަމުން އަންނަ އިސްލާމިކް ސްޓޭޓް (އައިއެސް) ގެ ހަނގުރާމަ ވެރިންނަށް އެރިކާއިން ވައިގެ މަގުން ހަމަލާދިނުން ނުހުއްޓައިފިނަމަ ފެންނަ ކޮންމެތާކުން އެމެރިކާ މީހުންނަށް ހަމަލާދޭނެ ކަމަށް ބުނެފިއެވެ.

ސޯޝަލް މީޑިއާ މެދުވެރިކޮށް އައިސިސް އިން ނެރެފައިވާ އިންޒާރުގެ މެސެޖުގައި ބުނެފައިވަނީ އެމެރިކާގެ ބިމަށް އަރައިވެސް ހަމަލާ ދޭން އެމީހުން ފަސް ނުޖެހޭނެ ކަމަށެވެ. 

އައިއެސް އިންވަނީ ދުރުމި ހަރުކޮށްފައިވާ ބަޑިއަކުން ހަމަލާދީ އެމެރިކާ ސިފައިންގެ މީހަކަށް މަރައިލާ ވީޑިއޯއެއްވެސް އާންމުކޮށްފައެވެ. އަދި އެމެރިކާއިން އިރާގު ހިފި ދުވަސްވަރުގައި އެމެރިކާ ސިފައިންގެ މީހެއްގެ ބޯ ބުރިކޮށްލާ ވީޑިއޯއެއްވެސް އާންމުކޮށްފައެވެ. 

 މީގެ ކުރިން އެމެރިކާއަށް ދިން އިންޒާރެއްގައި ބުނެފައިވަނީ "އަހަރުމެން ކަލޭމެންގެ ގައުމުގައި ވެސް އެބަތިބިން. ކަލޭމެންގެ ސިޓީތަކުގައި ވެސް އެބަތިބިން. ކަލޭމެންގެ މަގުތަކުގައި ވެސް އެބަތިބިން،" ކަމަށެވެ. އަދި އެ މެސެޖާއެކު އެމީހުންގެ ދިދައެއް ފޯނުން ފެންނަގޮތަށް ހިފައިގެން ހުރެ ވައިޓްހައުސް ކުރިމަތީގައި ނަގާފައިވާ ފޮޓޯއެއްވެސް ޝާއިއުކޮށްގައިވެއެވެ. 

އެމެރިކާއިން ދަނީ އިރާގުގައި ތިބި ކުރުދީ ހަނގުރާމަވެރިންނަށް އެހީތެރިވެދެމުންނެވެ. އެގޮތުން ފާއިތުވީ ހަފުތާއެއްހާ ދުވަހުގެ ތެރޭގައިވަނީ އައިއެސް އިން ހިފާފައިވާ ބައެއް ސަރަހައްދުތައް ކުރުދީ ހަނގުރާމަވެރިންގެ ބާރުގެ ދަށަށްގެނެސްފައިއެވެ.